ពីនេះ ពីនោះ
លោក ឈាង វុន មានសិទ្ធិដេញតំណាងរាស្ត្រ និងអ្នកកាសែតចេញពីទីលានសភា មិនយល់…?
× កាលពីថ្ងៃទី១ ខែកក្កដាកន្លងមក លោក ឈាង វុន តំណាងរាស្ត្រមកពីគណបក្ស ប្រជាជនកម្ពុជាបានបណ្តេញតំណាងរាស្ត្រគណបក្សសង្គ្រោះជាតិ និងក្រុមអ្នកកាសែតមិនអោយផ្តល់បទសម្ភាសន៍នៅក្នុងទីធ្លាមន្ទីរដ្ឋសភាដោយសំអាងថា បទបញ្ជាផ្ទៃក្នុងរដ្ឋសភា មិនអនុញ្ញាត។
តាមធម្មតា អ្នកកាសែតមានតួនាទី តាមច្បាប់ស្តីពីរបបសារព័ត៌មាន អាចបំពេញកិច្ចការរបស់ខ្លួនបាននៅតាមទីលានស្ថាប័នរបស់រដ្ឋ ពោល គឺមិនចូលទៅក្នុងបន្ទប់របស់មន្ត្រីនៃ ស្ថាប័ននោះ។ បើនិយាយពីសេចក្តីព្រាងច្បាប់ស្តីពីសិទ្ធិទទួលព័ត៌មានវិញ ប្រជាពលរដ្ឋ រួមទាំងក្រុមអ្នកកាសែត មានសិទ្ធិស្នើសុំព័ត៌មានជាផ្លូវការពីស្ថាប័នរបស់រដ្ឋ រួមទាំងរដ្ឋសភា ផងដែរ។
នៅក្នុងសេចក្តីព្រាងច្បាប់ថ្មីនេះ មន្ត្រីដែលព្យាយាមលាក់បាំងព័ត៌មានដែលមិនត្រូវលាក់បាំងអាចមានទោស។ នៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា មាត្រាមួយចំនួនបានធានានូវសិទ្ធិសេរីភាពប្រជាពលរដ្ឋគ្រប់រូប។ ម្យ៉ាងទៀត មន្ទីរដ្ឋសភា គឺជាទីតាំងតស៊ូមតិតំណាងអោយប្រជាពលរដ្ឋគ្រប់និន្នាការនយោបាយ។
សរុបសេចក្តីមកវិញ បទបញ្ជាផ្ទៃក្នុងនៃរដ្ឋសភាមិនអាចមានអំណាចគ្របដណ្តប់ច្បាប់ ដែលបានរៀបរាប់ខាងលើនេះទេ។ ប្រសិនបើមិនអាចគ្របដណ្តប់បាន ចុះហេតុអ្វីបានជាតំណាងរាស្ត្រ លោក ឈាង វុន អាចបណ្តេញតំណាងរាស្ត្រ និងអ្នកកាសែតមិនអោយ ផ្តល់បទសម្ភាសន៍នៅក្នុងទីលានមន្ទីរដ្ឋសភា? មិនយល់…?
© រក្សាសិទ្ធិដោយ thmeythmey.com