ជាតិ
សេដ្ឋកិច្ច
ខ្សែក្រវ៉ាត់ធ្វើពីឈើក្រញូងកំពុងត្រូវប៉ាន់
ភ្នំពេញ៖ ខ្សែក្រវ៉ាត់ធ្វើពីឈើក្រញូងកំពុងត្រូវប៉ាន់។ មិនមែនតែឈើក្រញូងទេដែលត្រូវបានគេយកមកច្នៃធ្វើជាខ្សែក្រវ៉ាត់នោះ តាមពិត ឈើបេង នាងនួន ក៏ត្រូវបានគេយកមកច្នៃធ្វើជាខ្សែក្រវ៉ាត់ដែរ។
កាលពីដើមឡើយ គេធ្លាប់លឺតែគេផលិតខ្សែក្រវ៉ាត់ពីជ័រ ពីស្បែកក្រពើ។ល។ តែនៅពេលបច្ចុប្បន្ននេះ ជាងឆ្លាក់ឈើនៅក្នុងប្រទេសកម្ពុជាមួយចំនួនបានឲ្យដឹងថា ខ្សែរក្រវ៉ាត់ធ្វើពីឈើប្រណិតកំពុងត្រូវប៉ាន់ខ្លាំងមែនទែន ជាពិសេស ឈើក្រញូងតែម្តង។
ជាងឈើនៅម្តុំតំបន់បឹងត្របែកនៅទីក្រុងភ្នំពេញបានឲ្យដឹងដោយលាក់អត្តសញ្ញាណថា កម្លាំងពលកម្មសម្រាប់ការកែច្នៃខ្សែក្រវ៉ាត់ឈើ គឺមានតម្លៃ១៥ដុល្លារ។ ថ្លៃប៉ាញ់ថ្នាំបូលា គឺ២ដុល្លារកន្លះ ដូច្នេះ សរុបទាំងអស់ សេវាកម្មកម្លាំងពលកម្ម មានតម្លៃជិត២០ដុល្លារ។ នេះគេនៅមិនទាន់គិតពីតម្លៃឈើនៅឡើយទេ។
ជាងឈើបានប្រាប់ឲ្យដឹងថា ខ្សែក្រវ៉ាតក្រញូងមួយត្រូវបានគេលក់ចេញទៅលើទីផ្សារក្នុងតម្លៃជាង១០០ដុល្លារអាមេរិក។ ខ្សែក្រវ៉ាត់ធ្វើពីឈើបេង និងនាងនួន មានតម្លៃថោកជាងឈើក្រញូងពី២០ទៅ៣០ដុល្លារ។ ជាងឈើដដែលបានឲ្យដឹងថា ឈើក្រញូងដែលកែច្នៃនេះ គឺជាកំទេចឈើក្រញូងតូចតាច ពោលគឺមិនមែនឈើក្រញូងដុំធំៗនោះទេ។ ឈើក្រញូងដុំធំៗ លែងមាននៅក្នុងប្រទេសកម្ពុជាទៀតហើយ។ ឈើប្រណិតកម្ពុជាមួយចំនួនធំត្រូវបានគេនាំចេញទៅកាន់ប្រទេសជិតខាងយ៉ាងច្រើនក្នុងរយៈប៉ុន្មានឆ្នាំចុងក្រោយនេះ៕
© រក្សាសិទ្ធិដោយ thmeythmey.com