ពីនេះ ពីនោះ
រដ្ឋគួរចាប់ផ្តើមគិតគូររក្សាដីរដ្ឋទុក ហើយសង់លំនៅដ្ឋានសម្រាប់ជួល ឬលក់ឲ្យគ្រួសារក្រីក្រ
×![]()
ដោយ: លីម តុលា
នៅក្នុងប្រទេសមួយចំនួននៅលើពិភពលោក រដ្ឋាភិបាលបានរក្សាដីរបស់រដ្ឋទុកក្នុងចំណែកណាមួយ ទាំងនៅតាមទីក្រុងធំៗ និងនៅតាមបណ្តាខេត្តនានាក្នុងគោលបំណងដើម្បីសាងសង់លំនៅដ្ឋានសម្រាប់ជួល ឬលក់ឲ្យគ្រួសារក្រីក្រដែលខ្វះលទ្ធភាពទិញផ្ទះសម្បែងល្អដែលមានតម្លៃថ្លៃកប់ពពក។ 
រដ្ឋាភិបាលនៃប្រទេសទាំងនោះ មិនផ្តល់លំនៅដ្ឋានឲ្យគ្រួសារក្រីក្រទាំងអស់នោះ ដោយមិនគិតប្រាក់នោះទេ។ តែគេអាចលក់ឲ្យអ្នកក្រីក្រក្នុងតម្លៃថោក ឬក៏អាចជួលឲ្យពួកគេក្នុងតម្លៃទាបបំផុត។ និយាយជារួម រដ្ឋត្រូវមានកាតព្វកិច្ចសម្រួលគ្រប់មធ្យោបាយដើម្បីឲ្យគ្រួសារក្រីក្រអាចមានដំបូលរស់នៅនឹងគេ។
ងាកមកប្រទេសកម្ពុជាវិញ តម្លៃដីនៅក្នុងក្រុង និងក្នុងខេត្តចាប់ផ្តើមឡើងថ្លៃកប់ពពកដែលជាប្រការរារាំងអ្នកក្រីក្រក្នុងការទិញផ្ទះសម្បែងដើម្បីរស់នៅ។ ពលរដ្ឋក្រីក្រនាពេលសព្វថ្ងៃនេះ គ្មានជម្រើសអ្វីក្រៅតែពីជួលផ្ទះឯកជនរស់នៅ។ ការធ្វើយ៉ាងនេះ អ្នកក្រក្រីធ្វើការបានត្រឹមតែបង់ថ្លៃឈ្នួលផ្ទះប៉ុណ្ណោះ។
ចាប់ពីពេលនេះតទៅ តើរដ្ឋាភិបាលគួរចាប់ផ្តើមរក្សាដីរដ្ឋទុកដើម្បីសាងសង់ខុនដូក្នុងតម្លៃថោកសម្រាប់ជួល ឬលក់ឲ្យពលរដ្ឋក្រីក្រហើយឬនៅ? បើមិនទាន់បានគិតទេ គួរចាប់ផ្តើមគិតចាប់ពីពេលនេះ បើមិនដូច្នោះទេ អ្នកក្រីក្រទាំងឡាយពិតជាគ្មានវាសនាអាចមានទ្រនំរស់នៅនឹងគេឡើយ បើតម្លៃអចលនទ្រព្យចេះតែឡើងថ្លៃគ្មានទីបញ្ចប់៕
© រក្សាសិទ្ធិដោយ thmeythmey.com
