​កំណាព្យ​បទ មេ​បួន​

-​ថ្លែង​ពី​ឆន្ទៈ​ ​ ​ ​ស្ទើរ​ស្ទាក់​តាម​កាល​

​គ្មាន​ក្នុង​ខួរក្បាល ​ ​ខ្លះ​ធ្វើតាម​គ្នា​។​

-​គេ​ថា​នេះ​ល្អ​ ​ ​ ​ផ្អើល​ឆ​គាំពារ​

​រួច​តាំងខ្លួន​ជា​ ​ ​ ​អ្នក​រួម​ផ្តាច់​ប្តូរ​។​

-​រឿង​វប្បធម៌​ ​ ​ ​ធ្វើ​ញ័រ​ដើរ​កូរ​

​ខ្លះ​បាន​ត្រឹម​ប្រូ​ ​ ​កូរ​យកឈ្មោះ​ល្បី​។​

-​អួតថា​ស្រឡាញ់​ ​ ​គិត​កាញ់​ឃ្មាតខ្មី​

​បាន​ត្រឹម​ទ្រឹស្តី​ ​ ​ស្តី​ឲ្យ​ពីរោះ​។​

-​ល្ខោនខោល​ឃើញ​ជាក់​ ​ឆន្ទៈ​ថែ​ឈ្មោះ​ ​

​កុំ​ឲ្យ​រងគ្រោះ​ ​ ​ ​ព្រោះ​គេ​បំបាត់​។​

-​បាន​ត្រឹម​មួយ​ប្រាវ​ ​ ​ចូល​បាវ​ពូន​ស្ងាត់​

​ក្រុម​អ្នក​ចែង​ចាត់​ ​ ​ស្ងាត់បាត់​ដំណឹង​។​

-​ចម្រៀង​កុន​ខ្មែរ​ ​ ​ស្បថស្បែ​ថា​ប្រឹង​

​ធ្វើ​ឲ្យ​គេ​ដឹង​ ​ ​ ​ថា​ខ្មែរ​ធ្វើបាន​។​

-​បាន​ត្រឹម​ប្រកាស​ ​ ​ឃើញច្បាស់​មិន​ស្មាន​

​អ្នកមើល​គ្រប់​ប្រាណ​ ​ ​មិនបាន​គាំទ្រ​។​ ​ ​ ​ ​ ​ ​ ​ ​ ​

-​មាន​ទាំង​រឿង​ជាតិ​ ​ ​ខ្លះទៀត​ប្រឹង​ភរ​

​បាន​ត្រឹម​បន្ទរ​ ​ ​ ​ភួ​ត​ភរ​ក្មេងៗ​។​

-​អួតថា​ស្រឡាញ់​ ​ ​គិត​កាញ់​មិន​កេង​

​ថែម​ប្រាប់​ក្មេងៗ​ ​ ​ឲ្យ​ត្រាប់​តាម​ខ្លួន​។​

-​ក្រោយខ្នង​ធ្វើ​ផ្សេង​ ​ ​កិបកេង​បំពួន​

​មាន​បក្ស​ពួកខ្លួន​ ​ ​ឲ្យ​ជាតិ​ដុនដាប​។​

-​ឆន្ទៈ​បន្លំ​ ​ ​ ​ឃើញ​ចំ​ជា​បាប​

​ជាតិ​ចុះ​សូន្យ​សាប​ ​ ​ខ្មាស​បាប​កែ​ទៅ​៕

​និពន្ធ​ដោយ​ប៉ាកកា​ខ្មៅ​!