ជាតិ
សង្គមជាតិ
សៀវភៅ«អ្នករូតវាំងននសង្គម» ត្រូវបានដាក់លក់ក្នុងថ្ងៃបុណ្យខួប១០០ថ្ងៃលោក កែម ឡី
× ភ្នំពេញ៖ ជីវិតបានបាត់បង់ទៅហើយក៏ពិតមែន តែលោក កែម ឡី បានបន្សល់ទុកនូវស្នាដៃជាច្រើនដល់កូនខ្មែរជំនាន់ក្រោយសម្រាប់ទុកពិចារណាក្នុងន័យអភិវឌ្ឍសង្គម។ លោក កែម ឡី តែងតែផ្ដល់គំនិត និងទស្សនៈតាមរយៈបទវិភាគនានាដល់អ្នកសារព័ត៌មាន និងតាមបណ្ដាញសង្គមហ្វេសប៊ុក។
ស្របពេលដែលក្រុមគ្រួសារ និងប្រជាពលរដ្ឋច្រើននាក់កំពុងប្រារព្ធពិធីបុណ្យខួប១០០ថ្ងៃជូនលោក កែម ឡី គេសង្កេតឃើញវត្តមានសៀវភៅជាច្រើនក្បាលកំពុងត្រូវបានគេដាក់លក់ក្នុងពិធីនោះផងដែរ។ សៀវភៅដែលមានចំណងជើងថា អ្នករូតវាំងននសង្គម ទទួលបានការគាំទ្រយ៉ាងច្រើនពីសំណាក់អ្នក កែម ឡី និយម។ សៀវភៅនេះ ត្រូវបានគេលក់ក្នុងតម្លៃ៣ដុល្លារ។
សៀវភៅ អ្នករូតវាំងននសង្គម បង្កប់អត្ថន័យរិះគន់សង្គមតាមរយៈរឿងកប្លែង ឬរឿងខ្លីៗដែលបង្កើតឡើងដោយផ្នែកលើស្ថានភាពជាក់ស្តែងរបស់សង្គមពិតនាពេលបច្ចុប្បន្ន។ រឿងទាំងនោះ មានដូចជា អ្នកវិភាគអត់ចេះអ្វីទេ។ មន្ត្រីស្អាតស្អំមានរាងបែបណា?។ តើយួនបោះឆ្នោតឲ្យគណបក្សណា?។ល។ ម្យ៉ាងទៀត សៀវភៅនេះ ក៏បានចងក្រងពាក្យស្លោករបស់លោក កែម ឡី ផងដែរ ដូចជា ជូតទឹកភ្នែករបស់អ្នករួចបន្តដំណើរទៅមុខទៀត។ ពាក្យស្លោកនេះ ត្រូវបានយុវជន និងប្រជាពលរដ្ឋដឹងថាជាបណ្ដាំចុងក្រោយរបស់លោក កែម ឡី។
គួរម្លឹកផងដែលថា លោក កែម ឡី ត្រូវបានខ្មាន់កាំភ្លើងបាញ់សម្លាប់នៅ Star Mart ស្ថានីយចាក់សាំង Caltex ស្តុបបូកគោ ក្រុងភ្នំពេញ ខណៈពេលដែលលោកកំពុងទទួលទានកាហ្វេ កាលពីថ្ងៃទី១០ ខែកក្កដា ឆ្នាំ២០១៦ កន្លងមក៕
© រក្សាសិទ្ធិដោយ thmeythmey.com