សមត្ថកិច្ច បញ្ជូនអតីតអ្នកកាសែតវិទ្យុអាស៊ីសេរី២នាក់ ទៅតុលាការ

ជាតិ

សមត្ថកិច្ច បញ្ជូនអតីតអ្នកកាសែតវិទ្យុអាស៊ីសេរី២នាក់ ទៅតុលាការ

16, Nov 2017 , 2:43 pm

រូបភាព

រូបពីហ្វេសប៊ុកលោក យាង សុជាមេត្តា៖ រាប់ពីឆ្វេងលោក អ៊ួន ឈិន លោក យាង សុជាមេត្តា (ខាងស្តាំ)

ដោយ: រំដួល ចិត្រា (Romdoul Chetra)

ភ្នំពេញ៖ សមត្ថកិច្ច បានបញ្ជូនខ្លួនអតីតអ្នកកាសែតវិទ្យុអាស៊ីសេរី២នាក់ ទៅសាលាដំបូងរាជធានីភ្នំពេញ ដើម្បីបន្តនីតិវិធីតាមផ្លូវច្បាប់ នៅរសៀលថ្ងៃទី១៦ វិច្ឆិកា ។អតីតបុគ្គលិកវិទ្យុអាស៊ីសេរី ២នាក់ គឺ លោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានសមត្ថកិច្ចឃាត់ខ្លួននៅក្នុងផ្ទះសំណាក់ម៉ារ៉ាឌី ក្រោមការសង្ស័យថា លួចផលិតព័ត៌មានពីកម្ពុជា ហើយផ្ញើទៅស្ថាប័នអាស៊ីសេរី ដែលមានមូលដ្ឋាននៅរដ្ឋធានីវ៉ាស៊ីនតោននៃសហរដ្ឋអាមេរិក ។

ក្រោយពីបញ្ចប់ការសាកសួរ សមត្ថកិច្ចបានបញ្ជូនខ្លួនបុគ្គលទាំងពីររូបនេះទៅតុលាការហើយ។ នេះជាការបញ្ជាក់របស់លោក ស៊ីម វុទ្ធី ស្នងការរងនគរបាលជាតិ ដែលបានប្រាប់សារព័ត៌មានថ្មីៗ តាមទូរស័ព្ទមុននេះបន្តិច។ លោក ស៊ីម វុទ្ធី បានបញ្ជាក់ថា បុគ្គលិកអាស៊ីសេរីទាំង២នាក់ ត្រូវប្រឈមមុខនឹងបទចោទ «ប្រគល់ឲ្យបរទេសនូវព័ត៌មានជាអាទិ៍ ដែលអាចធ្វើឲ្យមហន្តរាយការការពារជាតិ» តាមមាត្រា ៤៤៥ នៃក្រមព្រហ្មទណ្ឌ។ ប្រសិនជាតុលាការរកឃើញកំហុសនោះ លោក អ៊ួន ឈិន និងលោក យាង សុធារិន ហៅ យាង សុជាមេត្តា អាចប្រឈមមុខនឹងការជាប់ទោសពី ៧ឆ្នាំ ទៅ១៥ ឆ្នាំតាមខ្លឹមសារនៃមាត្រាច្បាប់នេះ។

អតីតបុគ្គលិកអាស៊ីសេរី២នាក់ គឺលោក អ៊ួន ឈិន និងលោក យាង សុជាមេត្តា ត្រូវបានសមត្ថកិច្ច និងអាជ្ញាធរខណ្ឌមានជ័យ ឃាត់ខ្លួនកាលពីយប់ថ្ងៃទី ១៤ វិច្ឆិកា ក្រោមការសង្ស័យថា ពួកគេបានរៀបចំបើកអាជីវកម្មថតរូបមិនបានសុំច្បាប់អនុញ្ញាត និង លួចផលិតព័ត៌មានផ្ញើទៅក្រៅប្រទេស។

ប៉ុន្តែជុំវិញការសង្ស័យរបស់សមត្ថកិច្ចនេះ ត្រូវបានអតីតបុគ្គលិកវិទ្យុអាស៊ីសេរីលោក អ៊ួន ឈិន បានលើកឡើងថា លោកបានជួលបន្ទប់ផ្ទះសំណាក់មួយនេះ ដើម្បីបើកជាស្ទូឌីយូសម្រាប់ច្រៀងខារ៉ាអូខេ ថតវីដេអូក្នុងកម្មវិធីរៀបអាពាហ៍ពិពាហ៍ ឬពិធីបុណ្យផ្សេងៗ និងគ្រោងរៀបចំថតចម្រៀងសម្រាប់លក់ កម្សាន្តជាគ្រួសារប៉ុណ្ណោះ។ នេះបើតាមកំណត់ហេតុរបស់អាជ្ញាធរខណ្ឌមានជ័យ ដែលបានសួរនាំលោក អ៊ួន ឈិន៕

អត្ថបទទាក់ទង

សមត្ថកិច្ច បានបញ្ជូនអតីតបុគ្គលិកអាស៊ីសេរី ទៅស្នងការដ្ឋាននគរបាល ក្រោយឆែកឆេររកភស្តុតាងបន្ថែម