អន្តរជាតិ
នយោបាយអន្តរជាតិ
អាមេរិកជប់លៀងឲ្យ៦៤ប្រទេសដែលមិនគាំទ្រសេចក្ដីសម្រេចមហាសន្និបាត UN អគ្គរដ្ឋទូតអាមេរិក Nikki Haley ផ្ញើលិខិតអញ្ជើញទៅឲ្យតំណាងប្រទេស៦៤ ឲ្យចូលរួមពិធីជប់លៀងអរគុណ (រូបភាព៖ Xinhua)
× អាមេរិកនឹងរៀបចំពិធីជប់លៀងមិត្តភាពនៅដើមខែមករា ឆ្នាំ២០១៨ សម្រាប់ប្រទេសទាំងអស់ដែលមិនបានគាំទ្រដំណោះស្រាយរបស់មហាសន្និបាតអង្គការសហប្រជាជាតិជុំវិញបញ្ហាទីក្រុងហ្ស៊េរុយសាឡិម។ នេះបើតាមលិខិតអញ្ជើញរបស់លោកស្រី Nikki Haley អគ្គរដ្ឋទូតអាមេរិកប្រចាំងអង្គការសហប្រជាជាតិ។ ក្រៅពីអាមេរិក និងអ៊ីស្រាអែល ប្រទេសដែលបោះឆ្នោតប្រឆាំង ជាប្រទេសកោះតូចៗ និងក្រីក្រ។
អគ្គរដ្ឋទូតអាមេរិក Nikki Haley បានផ្ញើលិខិតមួយទៅកាន់តំណាងប្រទេសចំនួន៦៤ ដោយអញ្ជើញពួកគេឲ្យចូលរួមពិធីជប់លៀងអរគុណសម្រាប់មិត្តភាពចំពោះអាមេរិក ដែលគ្រោងរៀបចំនៅថ្ងៃទី៣ ខែមករា ឆ្នាំ២០១៨ ។ ជប់លៀងអរគុណ ព្រោះប្រទេសទាំងនេះមិនបានគាំទ្រដំណោះស្រាយប្រឆាំងការសម្រេចចិត្តរបស់អាមេរិកដែលទទួលស្គាល់ហ្ស៊េរុយសាឡិមជារដ្ឋធានីរបស់អ៊ីស្រាអែល ទោះជាលោក ដូណាល់ ត្រាំ គំរាមផ្ដាច់ជំនួយក្ដី។
ក្នុងចំណោមរដ្ឋសមាជិកអង្គការសហប្រជាជាតិទាំង១៩៣ប្រទេស ១២៨ប្រទេសបានបោះឆ្នោតគាំទ្រដំណោះស្រាយរបស់មហាសន្និបាត ឯប្រទេសចំនួនប្រាំបួនមានអាមេរិក និងអ៊ីស្រាអែលផងនោះបានបោះឆ្នោតប្រឆាំងដំណោះស្រាយនេះ ខណៈប្រទេស៣៥នាំគ្នាបោះអនុប្បវាទក្នុងនោះមានសម្ព័ន្ធមិត្តអាមេរិកដូចជាកាណាដា និងអូស្ត្រាលីផងដែរ។ ប្រទេសនៅសេសសល់គឺអនុវត្តមាន។ ជាសរុបប្រទេសចំនួន៦៥ ឈ្មោះក្នុងបញ្ជីជប់លៀងអរគុណខាងលើ។
តាមពិតទៅ ក្រោយការបោះឆ្នោតនៅថ្ងៃទី២១ ខែធ្នូ ភ្លាម លោកស្រី Haley ក៏បានអរគុណប្រទេសទាំង៦៤ម្ដងរួចទៅហើយ។ តាមរយៈបណ្ដាញសង្គម Twitter របស់ខ្លួន អគ្គរដ្ឋទូតអាមេរិករូបបានសរសេរដោយដោយរូបថតមានឈ្មោះប្រទេសទាំង៦៤ បូកអាមេរិកមួយផង ថា យើងអរគុណប្រទេសទាំងនេះដែលមិនធ្លាក់ចូលផ្លូវមិនមានការទទួលខុសត្រូវរបស់អង្គការសហប្រជាជាតិ។ នេះបើតាមការផ្សាយរបស់សារព័ត៌មានកាណាដា CBC ។
ក្រៅពីអាមេរិក និងអ៊ីស្រាអែល ប្រទេសចំនួន៧ដែលបោះឆ្នោតប្រឆាំងមានតូហ្គោ ហុងឌុយរ៉ាស់ ក្វាតេម៉ាឡា មីក្រណេស៊ី ប៉ាឡាវ ណូរុ និងកោះ Marshall Islands ។ ប្រទេសទាំងនេះមានទំនាក់ទំនងល្អជាមួយអ៊ីស្រាអែល ហើយកំពុងត្រូវការជំនួយខ្លាំង។ អ៊ីស្រាអែលបានប្រើប្រាស់លុយរបស់ខ្លួនដើម្បីអូសទាញប្រទេសទាំងនេះឲ្យគាំទ្រខ្លួនលើបញ្ហាផ្សេងៗនៅអង្គការសហប្រជាជាតិ។
សូមរំឭកថា នៅមុនការបោះឆ្នោតនៅមហាសន្និបាត លោកស្រី Haley បានប្រកាសជាមុនថា អាមេរិកនឹងកត់ចំណាំការបោះឆ្នោតប្រទេសទាំងអស់ ខណៈដែលលោកប្រធានាធិបតី ត្រាំ គំរាមផ្ដាច់ជំនួយប្រទេសណាដែលបោះឆ្នោតប្រឆាំងអាមេរិក។ ការគំរាមរបស់លោក ត្រាំ ពិតជាមានឥទ្ធិពលលើប្រទេស៨ ប៉ុន្តែសមាជិកលើសលប់ផ្សេងទៀតនាំគ្នាបោះឆ្នោតគាំទ្រនូវអ្វីដែលពួកគេចាត់ទុកជារឿងត្រឹមត្រូវ៕
Tag:
អាមេរិក
ហ្ស៊េរុយសាឡិម
Nikki Haley
© រក្សាសិទ្ធិដោយ thmeythmey.com