ការបោះឆ្នោតព្រឹទ្ធសភានីតិកាលទី៤ មានអង្គបោះឆ្នោតសរុបជាង១ម៉ឺននាក់

ជាតិ

ការបោះឆ្នោតព្រឹទ្ធសភានីតិកាលទី៤ មានអង្គបោះឆ្នោតសរុបជាង១ម៉ឺននាក់

30, Dec 2017 , 4:59 pm

រូបភាព

ដោយ: ថ្មីៗ

ភ្នំពេញ៖ ការបោះឆ្នោតជ្រើសរើសតាំងសមាជិកព្រឹទ្ធសភានីតិកាលទី៤ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០១៨ មានការិយាល័យបោះឆ្នោតចំនួន ៣៣ នៅក្នុង ២៥រាជធានី-ខេត្ត និងមានអង្គបោះឆ្នោត (អ្នកបោះឆ្នោត) សរុបចំនួន ១១,៦៩៥នាក់។ នេះបើតាមសេចក្ដីប្រកាសព័ត៌មានរបស់គណៈកម្មាធិការជាតិរបចំការបោះឆ្នោត គ.ជ.ប។

សេចក្ដីប្រកាសព័ត៌មាន បានឲ្យដឹងថា គ.ជ.ប បានញ្ជូនបញ្ជីបោះឆ្នោតដំបូងសម្រាប់ការបោះឆ្នោតជ្រើសរើសតាំងសមាជិកព្រឹទ្ធសភា នីតិកាលទី៤ ទៅកាន់គណៈកម្មការ រាជធានី-ខេត្ត រៀបចំការបោះឆ្នោត (គធ.ខប) ទាំង២៥រួចហើយ។ បើតាមសេចក្ដីប្រកាសព័ត៌មានដដែល បញ្ជីបោះឆ្នោតដំបូងនេះ ត្រូវបិទផ្សាយនៅតាមការិយាល័យបោះឆ្នោតក្នុងរាជធានី-ខេត្ត នៅថ្ងៃទី៣០ ខែធ្នូ ឆ្នាំ២០១៧។

គ.ជ.ប បានបញ្ជាក់ក្នុងសេចក្តីប្រកាសព័ត៌មានយ៉ាងដូច្នេះ៖«បញ្ជីបោះឆ្នោតដំបូងត្រូវបិទផ្សាយជាសាធារណៈរយៈពេល ១០ថ្ងៃ។ ក្នុងរយៈពេលកំណត់នេះ ជនណាក៏ដោយ មានសិទ្ធិប្ដឹងតវ៉ា ឬ ប្ដឹងជំទាស់ដែរ ទាក់ទងទៅនឹងបញ្ជីបោះឆ្នោតដំបូងនេះ»។

គ.ជ.ប បានអំពាវនាវ ដល់អង្គបោះឆ្នោតទាំងអស់ ទៅពិនិត្យមើលឈ្មោះ និងទិន្នន័យពាក់ព័ន្ធក្នុងបញ្ជីបោះឆ្នោតដំបូង នៅតាមការិយាល័យបោះឆ្នោត ឬ អាចចូលទៅមើលគេហទំព័រ www.voterist.org.kh។

សូមបញ្ជាក់ថា អង្គបោះឆ្នោត គឺក្រុមប្រឹក្សាឃុំ សង្កាត់ និងតំណាងរាស្ត្រ ក្នុងតំណែង។ ក្រុមប្រឹក្សាឃុំ-សង្កាត់ មានចំនួន ១១,៥៧២នាក់ និងតំណាងរាស្ត្រ មានចំនួន ១២៣នាក់ ដែលនឹងត្រូវចូលរួមបោះឆ្នោតជ្រើសតាំងសមាជិកព្រឹទ្ធសភានីតិកាលទី៤នេះ៕

អត្ថបទទាក់ទង

មានគណបក្ស៤ប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភា