ជាតិ
នយោបាយជាតិ
ឆ្នាំថ្មី! អតីតប្រធានបក្សប្រឆាំង អំពាវនាវឲ្យមានការផ្សះផ្សារជាតិ
× ភ្នំពេញ៖ អតីតប្រធានគណបក្សសង្គ្រោះជាតិលោក កឹម សុខា អំពាវនាវឲ្យអ្នកនយោបាយ ងាកមករួមគ្នាផ្សះផ្សារជាតិវិញ ដើម្បីការអភិវឌ្ឍប្រទេស។ ការអំពាវនាវរបស់លោក កឹម សុខា ដែលកំពុងឃុំខ្លួននៅក្នុងពន្ធនាគារនេះ ធ្វើឡើងតាមរយៈលិខិតអបអរសាទរមួយ សម្រាប់ឆ្នាំថ្មី ២០១៨នេះ។
ក្នុងលិខិតអបអរសាទរឆ្នាំថ្មីនេះ លោក កឹម សុខា មិនភ្លេចរំឮកពីរឿងរ៉ាវអវិជ្ជមាននយោបាយ ដែលកើតឡើងនៅក្នុងឆ្នាំ២០១៧ឡើយ។ អ្វីដែលលោក កឹម សុខា បន្តរៀបរាប់នោះ គឺការរំលាយគណបក្សសង្គ្រោះជាតិ ការរឹតត្បិតសេរីភាពសង្គមស៊ីវិល និងប្រព័ន្ធផ្សព្វផ្សាយ ការចាប់ខ្លួនអ្នកនយោបាយ និងសកម្មជនដីធ្លី ដែលតវ៉ាប្រឆាំងរដ្ឋាភិបាល។ លោក កឹម សុខា ចាត់ទុកទង្វើរទាំងនេះ នាំឲ្យបញ្ហាសិទ្ធិមនុស្ស និងប្រជាធិបតេយ្យនៅកម្ពុជាធ្លាក់ចុះ។
តាមរយៈលិខិតអបអរឆ្នាំថ្មីនេះ អតីតប្រធានគណបក្សសង្គ្រោះជាតិលោក កឹម សុខា អំពាវនាវឲ្យអ្នកនយោបាយ ងាកមករួមគ្នាផ្សះផ្សារជាតិ ដើម្បីលើកស្ទួយប្រជាធិបតេយ្យ និងការអភិវឌ្ឍប្រទេសវិញ ក្នុងការចៀសវាងការប្រឈមមុខជាមួយសម្ពាធបរទេស។
ក្នុងវីដេអូឃ្លីបជាង៥នាទី កញ្ញា កឹម មនោវិទ្យា កូនស្រីលោក កឹម សុខា បានអានលិខិតនេះយ៉ាងដូច្នេះ៖«ខ្ញុំយល់ឃើញថា ខ្មែរត្រូវតែរួមគ្នាដោះស្រាយបញ្ហាជាតិ បញ្ហាប្រជាពលរដ្ឋ និងបញ្ហានយោបាយ។ ទី១ តាមរយៈការផ្សះផ្សារជាតិ ដោយប្រកាន់យកគោលការណ៍អហិង្សា ខ្មែរតែមួយមិនគុំគួន មិនសងសឹកមិនយកខ្មែរណាជាសត្រូវ។ ទី២ ទុកឱកាសជូនប្រជាពលរដ្ឋ ជាអ្នកជ្រើសរើសមេដឹកនាំតាមរយៈការបោះឆ្នោតដោយសេរី និងយុត្តិធម៌។ ទី៣ ត្រូវអនុវត្តឲ្យបានពេញលេញតាមកិច្ចព្រមព្រៀងសន្តិភាពទីក្រុងប៉ារីស ស្តីពីកម្ពុជា ២៣ តុលា ឆ្នាំ១៩៩១។ ទី៤ ត្រូវមានគោលនយោបាយច្បាស់លាស់ក្នុងការរៀបចំសង្គម និងអភិវឌ្ឍសមភាព និងមាននិរន្តភាព ព្រមទាំងលើកស្ទួយជីវភាពប្រជាពលរដ្ឋ មន្ត្រីរាជការ និងកងកម្លាំងគ្រប់ប្រភេទឲ្យបានសមរម្យ…»។
កន្លងមកសម្ដេច ហ៊ុន សែន ធ្លាប់បានប្រកាសឈប់ឆ្លើយឆ្លងពីដំណោះស្រាយនយោបាយ ជាមួយក្រុមមន្ត្រីអតីតគណបក្សសង្គ្រោះជាតិទៀតហើយ ក្រោយពីសម្ដេចបើកច្រកផ្លូវមួយ ឲ្យមានការបង្កើតគណបក្សថ្មីចូលរួមប្រកួតបោះឆ្នោតខាងមុខ។ ប៉ុន្តែយោបល់ប្រមុខរដ្ឋាភិបាល ត្រូវបានមន្ត្រីអតីតគណបក្សសង្គ្រោះជាតិចំអកទៅវិញ។
ទាក់ទងបញ្ហាគណបក្សប្រឆាំងនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បាននិយាយថា ជារឿងធម្មតា និងជាក្រឹត្យក្រមធម្មជាតិទៅហើយ ដែលមេដឹកនាំប្រទេសណាក៏ដោយ ឲ្យតែបានកាន់អំណាចហើយ ត្រូវតែចាត់វិធានការណ៏គ្រប់បែបយ៉ាង ដើម្បីពង្រឹងអំណាចរដ្ឋបាលរបស់ខ្លួន ។ ត្រង់ចំណុចនេះលោក សុខ ឥសាន បាននិយាយថា រាជរដ្ឋាភិបាលចាំបាច់ទប់ស្កាត់រាល់អំពើអនាធិបតេយ្យ អំពើល្មើសច្បាប់ អំពើវិទ្ធង្សនានយោបាយ សេដ្ឋកិច្ច រារាំងការរីកចម្រើនរបស់ប្រទេសជាតិ ដែលបង្កើតជាឧបសគ្គដល់ការអនុវត្តកម្មវិធីនយោបាយរបស់រាជរដ្ឋាភិបាល ។
លោក សុខ ឥសាន បានសរសេរលើបណ្ដាញសង្គមTelegram ដូច្នេះថា៖«រាជរដ្ឋាភិបាល ចាំបាច់ត្រូវអនុវត្តកម្មវិធីនយោបាយរបស់គណបក្សប្រជាជនកម្ពុជាដែលជាគណបក្សឈ្នះឆ្នោត ប្រែក្លាយឲ្យទៅជាកម្មវិធីនយោបាយរបស់រាជរដ្ឋាភិបាល ក្នុងការកសាងនិងអភិវឌ្ឈន៏ប្រទេសឲ្យបានរីកចម្រើន ស្របតាមបំណងប្រាថ្នារបស់ប្រជាជនជាម្ចាស់ឆ្នោត ដើម្បីម្ចាស់ឆ្នោតជឿទុកចិត្តនិងបោះឆ្នោតគាំទ្រតទៅទៀត …។ដូច្នេះ រាជរដ្ឋាភិបាលចាំបាច់ត្រូវតែចាត់វិធានការណបង្ក្រាបឲ្យបានទាន់ពេលវេលា មិនអាចបណ្តែតបណ្តោយឲ្យមានឧបាយកលផ្តួលរំលំបានជាដាច់ខាត»។
សម្រាប់អ្នកវិភាគវិញ ការវិវត្តនយោបាយនៅពេលខាងមុខ នឹងមានការប្រែប្រួលកាន់តែប្រសើរឡើងជាងនេះ តាមរយៈការសម្បទាននយោបាយគ្នាទៅវិញទៅមក ក្រោមរូបភាពដោះស្រាយបញ្ហារួមគ្នា។ ប៉ុន្តែការសម្បទាននយោបាយនោះ អ្នកវិភាគក៏មិនទាន់អាចវាយតម្លៃឲ្យច្បាស់ថា ស្ថិតនៅក្រោមរូបភាពបែបណាដែរ៕
© រក្សាសិទ្ធិដោយ thmeythmey.com