ជាតិ
សេដ្ឋកិច្ច
ពាណិជ្ជកម្មកម្ពុជា-វៀតណាម កើនដល់ជាង៤ពាន់លានដុល្លារ ខណៈកំពុងអនុវត្តការមិនយកពន្ធត្រួតគ្នា
× ភ្នំពេញ៖ គិតមកដល់ពេលនេះ ទំហំពាណិជ្ជកម្ម កម្ពុជា-វៀតណាម មានជាង៤ពាន់លានដុល្លារហើយ ស្របតាមគោលនយោបាយអភិវឌ្ឍន៍ វិស័យធុរកិច្ចរវាងប្រទេសទាំងពីរ។
កិច្ចសហប្រតិបត្តិការណ៍រវាងប្រទេសទាំងពីរ មានការរីកចម្រើនជាលំដាប់ ដោយក្នុងនោះទំហំពាណិជ្ជកម្មបានកើនឡើងជាង ៤ពាន់លានដុល្លារ ដែលកើនជាង២៥ភាគរយ ។ ចំណែកការវិនិយោគរវាងប្រទេសទាំងពីរ ក៏មានការកើនឡើងកាន់តែខ្លាំងផងដែរ។ នេះជាការលើកឡើងរបស់លោកនាយករដ្ឋមន្ត្រីវៀតណាម Nguyen Xuan Phuc ក្នុងជំនួបជាមួយសម្ដេចនាយករដ្ឋមន្ត្រី ហ៊ុន សែន កាលពីថ្ងៃទី៤ មេសា។
លោកនាយករដ្ឋមន្ត្រីវៀតណាម រំពឹងថា ទំហំពាណិជ្ជកម្មរវាងប្រទេសទាំងពីរ នឹងបន្តកើនឡើងបន្ថែមទៀត តាមរយៈការចុះហត្ថលេខាមិនយកពន្ធត្រួតគ្នាកន្លងមកនោះ ដែលវានឹងជួយជំរុញការវិនិយោគឲ្យកាន់តែច្រើនឡើងថែមទៀត។
តាមរយៈហ្វេសប៊ុកសម្ដេច ហ៊ុន សែន បានស្រង់សម្ដីលោក ង្វៀន សួនហ្វ៊ុក (Nguyen Xuan Phuc) យ៉ាងដូច្នេះ៖«សូមថ្លែងអំណរគុណសម្តេច ក្នុងការចូលរួមកិច្ចប្រជុំធុរៈកិច្ច ហើយក៏បានចុះហត្ថលេខាលើកការមិនយកពន្ធត្រួតគ្នា ដែលនេះជាឱកាសមួយបានបើកបង្ហាញលើទឹកចិត្តវិនិយោគិន មកវិនិយោគនៅវៀតណាម និងកម្ពុជាកាន់តែច្រើនឡើង»។
មិនខុសគ្នាទេ សម្តេចនាយករដ្ឋមន្ត្រី ហ៊ុន សែន សង្ឃឹមយ៉ាងមុតមាំថា ការចុះហត្ថលេខាមិនយកពន្ធត្រួតគ្នា នឹងធ្វើឲ្យទំហំពាណិជ្ជកម្ម និងការវិនិយោគនៃប្រទេសទាំង២ មានកើនឡើងកាន់តែខ្លាំងបន្ថែមទៀត។ ប៉ុន្តែអ្វីដែលប្រមុខរដ្ឋាភិបាល ចង់ឃើញនោះ គឺភាពរីកចម្រើនកាន់តែខ្លាំងរបស់ប្រជាពលរដ្ឋនៅតាមព្រំដែន។ «យើងគប្បីពិនិត្យមើល និងបង្កលក្ខណៈថែមទៀតដើម្បីការធ្វើទំនាក់ទំនងអាជីវកម្មរវាងប្រជាពលរដ្ឋ និងប្រជាពលរដ្ឋឲ្យកាន់តែខ្លាំងឡើងបន្ថែមទៀតជាពិសេសនៅតាមតំបន់ព្រំដែន»។ នេះជាការបញ្ជាក់របស់នាយករដ្ឋមន្ត្រី ហ៊ុន សែន។
ក្រៅពីការចុះហត្ថលេខាមិនយកត្រួតស៊ីគ្នាជាមួយវៀតណាមនេះ កម្ពុជា ធ្លាប់ចុះកិច្ចព្រមព្រៀងជាមួយបណ្ដាប្រទេសមួយចំនួនដូចជា ថៃ ព្រុយណេ សិង្ហបុរីជាដើម ក្នុងការមិនយកពន្ធត្រួតគ្នាផងដែរ។
ជុំវិញការយកពន្ធត្រួតគ្នានេះ គឺសំដៅទៅលើកាតព្វរបស់អ្នកវិនិយោគ ដែលតម្រូវឲ្យបង់ពន្ធ២ដង សម្រាប់ការងាររកស៊ីរបស់ខ្លួន។ ត្រង់ចំណុចនេះ បានន័យថា ឧទាហរណ៍ ! បើអ្នកវិយោគវៀតណាម ដាក់ទុនវិនិយោគលើជំនួញអ្វីមួយនៅកម្ពុជានោះ គឺគេត្រូវបង់ពន្ធឲ្យកម្ពុជាផង និងបង់ពន្ធឲ្យរដ្ឋាភិបាលវៀតណាមផង។ ហើយក៏មានលក្ខណៈពិសេស មួយចំនួនទៀតដែរ។
ដោយសារបញ្ហានេះហើយទើបរដ្ឋាភិបាលកម្ពុជា កំពុងចរចារជាមួយប្រទេសនានា ដើម្បីបញ្ចៀសការយកពន្ធត្រួតគ្នា ពោលគឺកំណត់ឲ្យអ្នកវិនិយោគបង់ពន្ធតែមួយម្ដង ហើយថាតើភាគីណាមួយត្រូវមានកាតព្វប្រមូលពន្ធពីអ្នកវិនិយោគ ដោយអាស្រ័យលើការចរចានៃកិច្ចព្រមព្រៀងគ្នាវិញទៅមក៕
Tag:
កម្ពុជា
វៀតណាម
សេដ្ឋកិច្ច
© រក្សាសិទ្ធិដោយ thmeythmey.com