ជាតិ
ស្ពានអាកាសផ្សារដីហុយ៖ ពីរបីម៉ោងក្រោយសម្ពោធ រថយន្តបើកបុករនាំងស្លាកសញ្ញាបាក់ខ្ទេច
×![]()
ភ្នំពេញ៖ សម្ពោធព្រឹក ខូចខាតល្ងាច! ក្រោយសម្ពោធស្ពានអាកាសផ្សារដីហុយ ឲ្យប្រជាពលរដ្ឋប្រើប្រាស់បណ្តោះអាសន្ន សម្រាប់ធ្វើដំណើរមិនទាន់បានប៉ុន្មានម៉ោងផង ស្រាប់រថយន្តក្រុងមួយគ្រឿង បុកបាក់រនាំងស្លាកសញ្ញាដែលកំណត់ពីការធ្វើចរាចរណ៍លើស្ពាន បណ្ដាឲ្យខូចធ្លាក់លើដី។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បាននិយាយថា អាជ្ញាធរកំពុងត្រៀមរៀបចំរនាំងស្លាកសញ្ញានេះឡើងវិញហើយ ខណៈដែលរថយន្តបង្កហេតុនោះ ត្រូវបានយកទៅរក្សាទុកស្នងការនរគបាលរាជធានីភ្នំពេញ ដើម្បីដោះស្រាយបញ្ហាតាមផ្លូវច្បាប់។
តាមរយៈខ្លឹមសារនៅបារ៉ាស់លើស្ពាននេះ ក៏មានន័យបញ្ជាក់ពីការបើកបរយានយន្តឆ្លងកាត់ផងដែរ ដោយក្នុងនោះមានស្លាកសញ្ញាបង្ហាញពីកម្ពស់រថយន្តត្រឹម៣ម៉ែត្រចុះក្រោម ហើយអាចផ្ទុកចំណុះត្រឹម៣០តោន និងអនុញាតឲ្យរថយន្តតូចចរាចរណ៍ប៉ុណ្ណោះ ពោលគឺរថយន្តធុនធំ ត្រូវបានហាមឃាត់។ ប៉ុន្តែបារ៉ាស់នេះ ត្រូវបានខូចធ្លាក់ទៅហើយ ដោយសារការធ្វេសប្រហែសរបស់អ្នកបើកបរ ។
ស្ពានអាកាសផ្សារដីហុយ បានដាក់ឲ្យប្រើប្រាស់ជាបណ្តោះអាសន្ន ចាប់ពីថ្ងៃទី១២ ដល់ថ្ងៃទី ១៨ ខែមេសា ឆ្នាំ២០១៨។ ថ្លែងក្នុងពីធីដាក់ឲ្យប្រើប្រាស់ស្ពានអាកាសជាបណ្តោះអាសន្ន លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ស្ពានអាកាសផ្សារដីហុយ ដែលជាស្ពានអាកាសទី៥ ក្នុងរាជធានីភ្នំពេញ ហើយស្ពានេះអាចឲ្យឡានតូចធ្វើដំណើរសង់ខាងបាន២ជួរ នៅលើស្ពាន។ស្ពានអាកាសនេះបានប្រើប្រាស់ថវិកាសាងសង់អស់៦១លានដុល្លារអាមេរិក ដែលជាកម្ចីសប្បទានពីរដ្ឋាភិបាលចិន និងថវិការបស់រដ្ឋាភិបាលកម្ពុជា។
Tag:
ស្ពានអាកាស
© រក្សាសិទ្ធិដោយ thmeythmey.com
