សង្គមអន្តរជាតិ
អាជ្ញាធរថៃ ឃាត់ខ្លួនពលរដ្ឋវៀតណាម ដែលឆ្លៀតឱកាសលួចរបស់ភ្ញៀវពេលសង្ក្រាន្តឆ្នាំថ្មី
×
ប៉ូលិសជាតិថៃ បានឲ្យដឹងថា អាជ្ញាធរបានឃាត់ខ្លួនពលរដ្ឋបរទេសជាច្រើននាក់ ដែលបានចូលទៅក្នុងប្រទេសថៃខុសច្បាប់ ជាពិសេសនោះនាឱកាសសង្ក្រាន្តឆ្នាំថ្មី ដែលទើបតែកន្លងផុតទៅថ្មីៗនេះ ។ តាមរបាយការណ៍របស់ប៉ូលិសថៃ ក្នុងចំណោមពលរដ្ឋបរទេសទាំងនោះ ក៏មានពលរដ្ឋវៀតណាមផងដែរ ដោយពួកគេ ជាប់ចោទពីបទចូលបន្លំលួចរបស់របរមានតម្លៃរបស់ភ្ញៀវទេសចរ ។
ប៉ូលិសទទួលបន្ទុកពាក់ព័ន្ធផ្នែកអន្តោប្រវេសន៍ថៃ នៅថ្ងៃ១៩ មេសា បានធ្វើសន្និសីទសារព័ត៌មានរួមមួយពាក់ព័ន្ធនឹងបទល្មើសបង្កឡើងដោយជនបរទេស ដែលបានកើតឡើងនាឱកាសពិធីបុណ្យចូលឆ្នាំ ។ តាមសន្និសីទនោះ ប៉ូលិសជាតិថៃបានអះអាងថា ពួកគេបានឃាត់ខ្លួនពលរដ្ឋបរទេស ៦០ នាក់ ពាក់ព័ន្ធបទល្មើសស្នាក់នៅលើសពេលកំណត់ក្នុងទិដ្ឋាការ ចូលថៃដោយខុសច្បាប់ និងបទល្មើសលួចជាដើម ។
តាមការចុះផ្សាយរបស់សារព័ត៌មានថៃ Bangkok Post ក្នុងចំណោមពលរដ្ឋបរទេស ៦០នាក់នោះ ក៏មានស្ត្រីពលរដ្ឋវៀតណាមម្នាក់ផងដែរ ។ តាមរបាយការណ៍របស់ប៉ូលិសថៃ ប៉ូលិសបានរកឃើញវត្ថុតាងនៃបទលួចដូចជា ទូរសព្ទ Iphone ១៩ គ្រឿង , កាបូបប្រាក់ និងសៀវភៅធនាគារជាច្រើន ដែលជនសង្ស័យបានលួចពីភ្ញៀវទេសចរនាថ្ងៃសង្ក្រាន្ត ។
អ្វីដែលគួរកត់សម្គាល់នោះ តាមប្រភពអត្ថបទរបស់ Bangkok Post ដែលរំលេចយកពលរដ្ឋវៀតណាមជាចំណងជើងធំពាក់ព័ន្ធនឹងបទល្មើសនាសង្ក្រាន្តឆ្នាំថ្មីដដែលនោះ មន្ត្រីនគរបាល ក៏បានបញ្ជាក់ផងដែរ ថា ការឈានដល់ការចាប់ខ្លួនស្ត្រីពលរដ្ឋវៀតណាមខាងលើ ធ្វើឡើងបន្ទាប់ពីប៉ូលិសថៃ បានចាប់ខ្លួនបក្សពួករបស់គេបីនាក់ផ្សេងទៀដែលជាជនដៃដល់ក្នុងការលួចឆក់ ។
គួរជម្រាបផងដែរថា ពលរដ្ឋវៀតណាម បានក្លាយជាមុខសញ្ញាមួយសម្រាប់ប៉ូលិសថៃនាឱកាសពិធីបុណ្យនានារបស់ថៃ ។ គ្រាន់តែនាឱកាសនៃការគោរពព្រះសពមហាក្សត្រភូមិបុល អាឌុលយ៉ាដេត ក្នុងឆ្នាំ២០១៦ កន្លងទៅ ចោរជាពលរដ្ឋវៀណាម បានក្លាយជាប្រធានបទមួយធំសម្រាប់សារព័ត៌មានថៃផ្សព្វផ្សាយដើម្បីដាស់តឿនឲ្យមានការប្រុងប្រយ័ត្ន ។
នាពេលនោះ តាមការចុះផ្សាយរបស់សារព័ត៌មាន Bangkok Post ដដែល មានពលរដ្ឋវៀតណាមច្រើនរូប បានហ៊ានទាំងចំណាយលើការទិញសំបុត្រយន្តហោះដើម្បីទៅលូកហោលូកហោប៉ៅអ្នកចូលរួមកាន់ទុក្ខនៃពិធីគោរពព្រះសពមហាក្សត្រ ភូមិបុល អាឌុលយ៉ាដេតទៀតផង ៕
Tag:
វៀតណាម
ថៃ
សង្ក្រាន្ត
© រក្សាសិទ្ធិដោយ thmeythmey.com