ជាតិ
ករណីភ្នំពេញប៉ុស្តិ៍ Brad Adam ថា រដ្ឋាភិបាលប្រើប្រព័ន្ធពន្ធគាបសង្កត់ តែអ្នកនាំពាក្យច្រានចោល
× ភ្នំពេញ៖ អ្នកឃ្លាំមើលសិទ្ធិមនុស្សប្រចាំអាស៊ីប៉ាស៊ីហ្វិច (HRW) រិះគន់ថា បញ្ហាប្រើប្រាស់ប្រព័ន្ធពន្ធ ដើម្បីគាបសង្កត់លើស្ថាប័នឯករាជ្យ ជាមូលហេតុដែលនាំឲ្យស្ថាប័នភ្នំពេញប៉ុស្តិ៍បង្ខំចិត្តលក់ ទៅឲ្យក្រុមហ៊ុនរបស់អ្នកជំនួញម៉ាឡេស៊ី ។ លោក សុខ ឥសាន ចាត់ទុកការលើកឡើងរបស់លោក Brad Adam នេះ គ្រាន់តែជាគោលបំណងវាយប្រហារមកលើរដ្ឋាភិបាលប៉ុណ្ណោះ។
នាយកអង្គការអ្នកឃ្លាំមើលសិទ្ធិមនុស្សប្រចាំអាស៊ីប៉ាស៊ីហ្វិច (HRW) លោក Brad Adam បាននិយាយថា រដ្ឋាភិបាលបានបង្ខំឲ្យកាសែតភ្នំពេញប៉ុស្តិ៍ដែលដំណើរការយូរមកហើយ សម្រេចចិត្តលក់ទៅឲ្យក្រុមហ៊ុនម៉ាឡេស៊ី ដែលជាក្រុមហ៊ុនមានទំនាក់ទំនងជាមួយរដ្ឋាភិបាល ហ៊ុន សែន ។ អ្នកឃ្លាំមើលសិទ្ធិមនុស្ស យល់ថា ការលក់ស្ថាប័នភ្នំពេញប៉ុស្តិ៍នេះ គឺវាអាចពាក់ព័ន្ធនឹងរដ្ឋាភិបាល ដែលរំឭកពន្ធលើភ្នំពេញប៉ុស្តិ៍ ដែលត្រូវបង់ ៣,៩លានដុល្លារ។
លោក Brad Adam បានបន្ថែមថា ករណីកាសែតភ្នំពេញប៉ុស្តិ៍នេះ ស្រដៀងគ្នានឹងករណីកាសែត The Cambodia Daily ដែរ ដែលវាស្ថិតនៅក្នុងគោលបំណងរបស់រដ្ឋាភិបាល ចង់បិទស្ថាប័នឯករាជ្យក្នុងស្រុក។
សេចក្ដីថ្លែងការណ៍របស់លោក Brad Adam នាយកអង្គការឃ្លាំមើលសិទ្ធិមនុស្សប្រចាំតំបន់អាស៊ី បានបញ្ជាក់ដូច្នេះថា៖«រដ្ឋាភិបាលកម្ពុជា ប្រើប្រាស់ពន្ធដើម្បីដាក់សម្ពាធលើកាសែតភ្នំពេញប៉ុស្តិ៍ដើម្បីបង្ខំឲ្យស្ថាប័នមួយនេះលក់ ទៅក្រុមហ៊ុនថ្មី ដែលបានបណ្ដេញនិពន្ធនាយកភ្នំពេញប៉ុស្តិ៍ ដែលបានការពារអត្ថបទរបស់អ្នកកាសែតឯករាជ្យភាព។ នេះជាការប្រើប្រាស់អំណាចខុសឆ្គងមួយ របស់រដ្ឋាភិបាលកម្ពុជា ដើម្បីបិទស្ថាប័នផ្សព្វផ្សាយឯករាជ្យ និងរាយការណ៍ ក្នុងដំណើរការបោះឆ្នោតជាតិ នៅខែកក្កដា ដែលឈានចូលមកដល់នាពេលខាងមុខនេះ»។
ជាការឆ្លើយតបអ្នកនាំពាក្យគណបក្សប្រជាជនកម្ពុជា លោក សុខ ឥសាន បាននិយាយថា ការលក់កាសែតភ្នំពេញប៉ុស្តិ៍ គឺមិនពាក់ព័ន្ធជាមួយរដ្ឋាភិបាលឡើយ ព្រោះករណីបង់ពន្ធនេះ វាគឺជាកាតព្វកិច្ច និងភាពទទួលខុសត្រូវរបស់ស្ថាប័នភ្នំពេញប៉ុស្តិ៍ ។
ចំណែកការបញ្ឈប់ ឬការលាលែងពីការងាររបស់អ្នកកាសែតភ្នំពេញប៉ុស្តិ៍នោះ វាជាបញ្ហារបស់បុគ្គលិក និងម្ចាស់ក្រុមហ៊ុនថ្មីរបស់ភ្នំពេញប៉ុស្តិ៍ ដែលមិនពេញចិត្តគ្នាទៅវិញទៅមកប៉ុណ្ណោះ។ នេះបើតាមលោក សុខ ឥសាន ដែលបានបន្ថែមថា ការលើកឡើងរបស់លោក Brad Adam នេះ គ្រាន់តែជាគោលបំណងវាយប្រហារមកលើរដ្ឋាភិបាលទេ។
សារព័ត៌មាន Phnom Penh Post បានបង្កើតឡើងដោយជនជាតិអាមេរិកាំងលោក Michel Hayes កាលពីឆ្នាំ១៩៩២។ នៅឆ្នាំ២០០៨ កាសែតខាងលើនេះបានលក់ឲ្យទៅអ្នកជំនួញជនជាតិអូស្ត្រាលី ហើយនៅឆ្នាំ២០១៨នេះ ជនជាតិអូស្រា្តលីក៏សម្រេចចិត្តលក់កាសែតជូនឲ្យទៅអ្នកវិនិយោគជនជាតិម៉ាឡេស៊ី។
Tag:
HRW
ភ្នំពេញប៉ុស្តិ៍
© រក្សាសិទ្ធិដោយ thmeythmey.com