គ.ជ.ប ចំណាយថវិកាជាង២លានដុល្លារ សម្រាប់បោះពុម្ពសន្លឹកឆ្នោត

ជាតិ

នយោបាយជាតិ

គ.ជ.ប ចំណាយថវិកាជាង២លានដុល្លារ សម្រាប់បោះពុម្ពសន្លឹកឆ្នោត

02, Jun 2018 , 5:39 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានត្រៀមកញ្ចប់ថវិកាជាង២លានដុល្លារ សម្រាប់ការបោះពុម្ពសន្លឹកឆ្នោត ជាង១០លានសន្លឹក ក្នុងដំណើរការបោះឆ្នោត នៅថ្ងៃទី២៩ កក្កដាខាងមុខ។

អ្នកនាំពាក្យគ.ជ.ប លោក ឌឹម សុវណ្ណារុំ បាននិយាយថា សន្លឹកឆ្នោតជាង១០លានសន្លឹកនេះ ត្រូវចំណាយទឹកប្រាក់៩០០រៀលក្នុងមួយសន្លឹក ស្មើនឹងជាង២លានដុល្លារ ។ បើតាមលោក សុវណ្ណារុំ មូលហេតុដែលគ.ជ.ប បោះពុម្ពសន្លឹកឆ្នោត ច្រើនជាងចំនួនអ្នកបោះឆ្នោតនេះ គឺសម្រាប់យកទៅបណ្ដុះបណ្ដាលមន្ត្រីគ.ជ.ប និងអប់រំអ្នកបោះឆ្នោតមួយចំនួនធំផង ដើម្បីឲ្យពួកគេយល់ដឹង និងអនុវត្តឲ្យបានត្រឹមត្រូវ ក្នុងអំឡុងពេលបោះឆ្នោត។ បើតាមលោក ឌឹម សុវណ្ណារ៉ា ក្នុងចំណោមសន្លឹកឆ្នោតជាង១០លាននេះ ត្រូវមានសន្លឹកឆ្នោតគំរូជាង៣លាន ហើយក៏សម្រាប់យកប្រើប្រាស់ជាសន្លឹកឆ្នោតបម្រុងតាមមណ្ឌលបោះឆ្នោតទូទាំងប្រទេសផងដែរ។

«ក្នុងការិយាល័យបោះឆ្នោតនីមួយៗ គឺត្រូវមានសន្លឹកឆ្នោតបម្រុង សម្រាប់បម្រើអ្នកបោះឆ្នោត ហើយក្នុងការធានាថា ការបោះឆ្នោតត្រូវមានសន្លឹកឆ្នោតគ្រប់គ្រាន់។ លើសពីនេះទៀតច្បាប់ក៏មានចែងដែរ ក្នុងករណីដែលពលរដ្ឋយកសន្លឹកឆ្នោត មួយសន្លឹកយកមកគូស ប៉ុន្តែការគូសរបស់លោក មិនសមប្រកប ហើយលោកមានឱកាសនឹងមានសិទ្ធអាចទាមទារសន្លឹកឆ្នោតមួយសន្លឹកទៀត ដូច្នេះជាការត្រៀមស្របតាមច្បាប់ ទៅតាមនីតិវិធីបោះឆ្នោតជ្រើសតាំងតំណាងរាស្ត្រនីតិកាលទី៦»។ នេះបើតាមអ្នកនាំពាក្យគ.ជ.ប។

គ.ជ.ប បានទទួលស្គាល់គណបក្សនយោបាយចំនួន២០ ដែលត្រូវចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅថ្ងៃទី២៩ កក្កដាខាងមុខ។

តែយ៉ាងណាដំណើរការបោះឆ្នោតនេះ ត្រូវបានគេមើលឃើញថា អាចនឹងកើតមានរូបភាពអាក្រក់ ដោយសារតែពលរដ្ឋមួយចំនួន ដែលមិនពេញចិត្តដំណើរការបោះឆ្នោតនេះ។ ជាក់ស្ដែងនៅពេលនេះ ពលរដ្ឋគាំទ្រអតីតគណបក្សសង្គ្រោះជាតិ ផ្ដើមធ្វើយុទ្ធនាការ«ដេកផ្ទះ ឈ្នះឯង» ដើម្បីបង្ហាញអារម្មណ៍មិនពេញចិត្តដំណើរការបោះឆ្នោត រីឯអ្នកគាំទ្រគណបក្សប្រជាជនកម្ពុជា ធ្វើយុទ្ធនាការ«ខ្ញុំទៅបោះឆ្នោត ព្រោះខ្ញុំស្រលាញ់ប្រទេសខ្ញុំ» ដើម្បីប្រឆាំងយុទ្ធនាការអ្នកគាំទ្របក្សប្រឆាំង។

អត្ថបទទាក់ទង

គ.ជ.ប៖ យុទ្ធនាការ«ដេកផ្ទះ ឈ្នះឯង» អាចប្រឈមនឹងច្បាប់ ឯយុទ្ធនាការ«តោះ!ទៅបោះឆ្នោត» មានច្បាប់ធានា

គ.ជ.ប៖ ទោះជាចំនួនពលរដ្ឋបោះឆ្នោតក្រោម៥០ភាគរយ ក៏ចាត់ទុកជាបានការ

តាមរយៈយុទ្ធនាការដ៏ចម្រូងចម្រាស់នេះ ត្រូវបានគេសន្និដ្ឋានថា ដំណើរការបោះឆ្នោតខាងមុខ អាចនឹងមានពលរដ្ឋពហិការបោះឆ្នោតច្រើន ដែលវាជារូបភាពអាក្រក់មួយ សម្រាប់ការបោះឆ្នោតនៅកម្ពុជា។

ប៉ុន្តែទោះជាចំនួនពលរដ្ឋ ទៅបោះឆ្នោតក្រោម៥០ភាគរយក្តី ក៏ចាត់ទុកជាសំឡេងបានការ ក្នុងការជ្រើសតំណាងរាស្ត្រ ឈ្នះឆ្នោតដឹកនាំរដ្ឋាភិបាល ។ នេះជាការបញ្ជាក់របស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានបន្ថែមថា ច្បាប់បោះឆ្នោតនៅកម្ពុជា មិនបានកំណត់ពីចំនួនអ្នកបោះឆ្នោតឡើយ ៕