ជាតិ
នយោបាយជាតិ
យុវជនខ្មែរ ដែលសង្ស័យជាប់ពាក់ព័ន្ធករណីFake News ពីលោក ប្រាយុទ្ធ ត្រូវបានបញ្ជូនមកកម្ពុជាវិញ
×![]()
ដោយ: ធឿន បញ្ញាឬទិ្ធ
ភ្នំពេញ៖ យុវជនខ្មែរ ដែលត្រូវបានអាជ្ញាធរថៃ នាំខ្លួនទៅសាកសួរចម្លើយ ជុំវិញករណីប្រឌិតព័ត៌មានមិនពិត(Fake News) ពីសម្តីលោក ប្រាយុទ្ធ ចន្ទអូចា នាយករដ្ឋមន្ត្រីថៃ ត្រូវបានបញ្ជូនមកកម្ពុជាវិញហើយ។ បើតាមសារព័ត៌មាន Bangkok Post ប៉ូលិសជំនាញបទឧក្រិដ្ឋបច្ចេកវិទ្យាថៃ បានមកចាប់ខ្លួនយុវជនកម្ពុជា ជំនាញផ្នែក IT (Information Technology ) នៅទីក្រុងភ្នំពេញ កាលពីថ្ងៃ៣០ ឧសភា ក្រោយពីរកឃើញថា យុវជនរូបនេះ បានសរសេរអក្សរជាភាសាថៃ នៅលើវេបសាយមួយ (ratstas.com ) ដែលស្រង់សម្ដីនាយករដ្ឋមន្ត្រីថៃ ទាក់ទងនឹងករណីសាំងឡើងថ្លៃ មកចុះផ្សាយខុសពីការពិត។
យុវជន ហេង រតនៈ ដែលត្រូវបានសមត្ថកិច្ចថៃនាំខ្លួន ទៅសាកសួរពីករណីព័ត៌មានមិនពិត ជុំវិញការស្រង់សម្តីនាយករដ្ឋមន្ត្រីថៃនោះ បានត្រឡប់មកកម្ពុជាវិញ កាលពីរសៀលថ្ងៃទី២ មិថុនា។ តាមរយៈកិច្ចសម្ភាសជាមួយសារព័ត៌មានFresh News នៅព្រលានយន្តហោះអន្តរជាតិភ្នំពេញ យុវជន ហេង រតនៈ បាននិយាយថា មូលហេតុដែលអាជ្ញាធរថៃ បញ្ជូនខ្លួនត្រឡប់មកវិញ ដោយសារតែរូបគេ មិនជាប់ពាក់ព័ន្ធនឹងករណីបទឧក្រិដ្ឋបច្ចេកវិទ្យាព័ត៌មាន (Cyber Crime) ដែលបង្កើតព័ត៌មានមិនពិតប៉ះពាល់នាយករដ្ឋមន្ត្រីថៃ ដូចការសង្ស័យកន្លងមក។
«តាមពិតទៅករណីនេះ ពាក់ព័ន្ធនឹង Cyber Crime ដែលទាក់ទងនឹងករណីមានគេបង្កើតព័ត៌មានក្លែងក្លាយដែលប៉ះពាល់ដល់លោកនាយករដ្ឋមន្ត្រីប្រទេសថៃ។ ហើយនិយាយរួមទៅ វាជាសមត្ថភាពរបស់សមត្ថកិច្ច យើងមិនអាចនិយាយបានដែរ គ្រាន់តែថា គេសួរនាំចម្លើយយើងធម្មតា…។ ហើយខ្ញុំអត់មាន(បង្ហោះសារប៉ះពាល់នាយករដ្ឋមន្ត្រីថៃ) ទេ ដូច្នេះទើបខ្ញុំអាចឈរនៅទីនេះ(កម្ពុជា)វិញបាន។ នេះជាការបញ្ជាក់របស់យុវជន ហេង រតនៈ ។
កាលពីថ្ងៃទី៣០ ឧសភា ប៉ូលិសថៃ បានមកចាប់ខ្លួនយុវជនខាងលើ ទៅសួរចម្លើយ ពាក់ព័ន្ធនឹងសំណេរ ជាភាសាថៃ នៅលើវេបសាយមួយ (ratstas.com ) ដែលបានផ្សាយថា៖«នាយករដ្ឋមន្ត្រីថៃ បានប្រាប់ឲ្យប្រជាជនថៃ ចាក់ទឹកជំនួសសាំងវិញ នៅពេលដែលមានការចោទសួរពីរឿងសាំងឡើងថ្លៃ»។ ប៉ុន្តែពាក្យសម្ដីនេះ ត្រូវបានមន្ត្រីប៉ូលិសជាន់ខ្ពស់ថៃ លោក Surachate Hakparn បដិសេធថា នាយករដ្ឋមន្ត្រីថៃ មិនបាននិយាយដូចការសរសេរយុវជនកម្ពុជានេះឡើយ។ ដោយសារតែមូលហេតុនេះ ទើបបានជាប៉ូលិសថៃ មកចាប់ខ្លួនយុវជន ហេង រតនៈ ទៅសួរនាំឲ្យបានច្បាស់ពីករណីនេះ។ នេះបើតាមសារព័ត៌មានBangkok Post។
តែយ៉ាងណាយុវជន ហេង រតនៈ បានអះអាងថា ខ្លួនជាអ្នកស្ម័គ្រចិត្តឲ្យប៉ូលិសថៃនាំទៅសួរចម្លើយ ជុំវិញករណីសង្ស័យលើព័ត៌មានប៉ះពាល់លោក ប្រាយុទ្ធ ចន្ទអូចា នេះ ដើម្បីបង្ហាញភាពស្អាតស្អំរបស់ខ្លួន ពោលគឺមិនមែនជាការចាប់ខ្លួន ដូចការចុះផ្សាយឡើយ។ យុវជនរូបនេះ ស្នើឲ្យសមត្ថកិច្ចកម្ពុជា ស្វែងរកអ្នកដែលបង្កើតវេបសាយ ratstas.com សម្រាប់រិះគន់រដ្ឋាភិបាលថៃនេះ ទៅផ្តន្ទាទោសតាមច្បាប់ ដើម្បីផ្ដល់ភាពយុត្តិធម៌ដល់ខ្លួនវិញ។
កន្លងមកមន្ត្រីប៉ូលិសជាន់ខ្ពស់កម្ពុជា ធ្លាប់បានប្រាប់សារព័ត៌មានថ្មីៗថា កម្ពុជា និងថៃ គ្មានកិច្ចព្រមព្រៀងស្តីពីការចាប់ខ្លួន អ្នកដែលសរសេរព័ត៌មានប៉ះពាល់នាយករដ្ឋមន្ត្រីថៃទេ ខណៈដែលពួកគាត់ក៏មិនទទួលបានរបាយការណ៏ណាមួយពីការចាប់ខ្លួន យុវជនកម្ពុជា ទៅសួរចម្លើយពីករណីនេះដែរ។
ផ្ទុយពីការលើកឡើងរបស់មន្ត្រីប៉ូលិសជាន់ខ្ពស់កម្ពុជានេះ យុវជន ហេង រតនៈ ដែលត្រូវបានសមត្ថកិច្ចថៃនាំខ្លួនសួរចម្លើយនេះ បានបញ្ជាក់ថា រូបគេបានទៅផ្ដល់ចម្លើយ ដោយមានការសហការយ៉ាងល្អ ពីសំណាក់អាជ្ញាធរកម្ពុជា និងថៃ៕
Tag:
ប្រាយុទ្ធ ចន្ទអូចា
Fake News
© រក្សាសិទ្ធិដោយ thmeythmey.com
