ជាតិ
នយោបាយជាតិ
ក្រោយចេញពីពន្ធនាគារ លោក សួន សេរីរដ្ឋា នៅតែមានចិត្តចង់ធ្វើនយោបាយ រូបពីហ្វេសប៊ុកលោក សួន សេរីរដ្ឋា
× ភ្នំពេញ៖ ការធ្វើនយោបាយត្រូវប្រឈមមុខជាប់ពន្ធនាគារ។ វាជារឿងពិតមួយដែលលោក សួន សេរីរដ្ឋា អតីតប្រធានគណបក្សអំណាចខ្មែរ បានជួបប្រទះមួយឆ្នាំកន្លងមក ។ ប៉ុន្តែលោក សួន សេរីរដ្ឋា នៅតែមានចិត្តចង់ធ្វើនយោបាយដដែល ក្រោយពីទទួលបានការលើកលែងទោសពីព្រះមហាក្សត្រ តាមរយៈសំណើរបស់សម្ដេចនាយករដ្ឋមន្ត្រី ហ៊ុន សែន។
នៅពេលនេះ វាមិនទាន់ជាពេលវេលាសមស្រប សម្រាប់លោក សួន សេរីរដ្ឋា ដែលត្រូវបោះជំហានចូលឆាកនយោបាយវិញឡើយ។ ប៉ុន្តែក៏មិនមែនមានន័យថា លោក សួន សេរីរដ្ឋា នឹងបោះបង់ចោលអាជីពនយោបាយដែរ។ អតីតប្រធានគណបក្សអំណាចខ្មែរ ដែលទើបចេញពីពន្ធនាគាររូបនេះ បានបញ្ជាក់ដូច្នេះថា៖«កីឡាករប្រដាល់នៅពេលវាយគ្នាបែកមុខមាត់ប៉ុណ្ណា ក៏មិនបោះបង់ចោលការប្រកួតដែរ ហើយនៅតែបន្តប្រឹងហ្វឹកហាត់ថែមទៀត ដើម្បីឡើងសង្វៀងវាយប្រដាល់បន្តទៀត។ ដូច្នេះសម្រាប់ខ្ញុំ មិនទាន់អាចបញ្ជាក់ថា ខ្ញុំនឹងចូលធ្វើនយោបាយនៅពេលណាទេ ប៉ុន្តែខ្ញុំក៏មិនបោះបង់ចោលអាជីពនយោបាយដែរ។ ហើយនៅពេលនេះខ្ញុំ នៅតែគិតថាខ្ញុំជាអ្នកនយោបាយ»។
អំឡុងពេល ដែលខ្លួនជាប់ពន្ធនាគារ លោក សួន សេរីរដ្ឋា បានប្រកាសលាលែងចេញពីតំណែង ដោយទុកគណបក្សអំណាចខ្មែរ ឲ្យលោក សួង សោភណ្ឌ ធ្វើជាប្រធានបក្ស ដឹកនាំជំនួស។ ដូច្នេះអ្នកនយោបាយ ដែលធ្លាប់រិះគន់មិនសំចៃមាត់ រហូតដល់មានទោសជាប់ពន្ធនាគាររូបនេះ មិនទាន់អាចផ្ដល់ចម្លើយច្បាស់ថា លោកនឹងធ្វើជាប្រធានគណបក្សអំណាចខ្មែរ ឬបង្កើតគណបក្សថ្មីនោះទេ ដោយរង់ចាំពេលវេលាមកដល់សិន។
«ខ្ញុំមិនដឹងថា គណៈកម្មាធិការបក្សអំណាចខ្មែរ នឹងរើសខ្ញុំឲ្យធ្វើជាប្រធានវិញឬក៏អត់ទេ? ប៉ុន្តែបើគណៈកម្មាធិការបក្សមិនរើស ខ្ញុំក៏នៅមានជម្រើសនយោបាយច្រើន ប្រៀបដូចកីឡាករប្រដាល់ ដែលចាកចេញពីក្លឹប ហើយគេមិនឲ្យចូលវិញ គឺយើងអាចបង្កើតក្លឹបថ្មីមួយទៀតបាន ។ ដូច្នេះខ្ញុំអាចបង្កើតគណបក្សអំណាចខ្មែរឡើង ដូច្នេះខ្ញុំក៏អាចបង្កើតផ្សេងបានដែរ ដោយវាអាស្រ័យលើការប្រមូលអ្នកចូលរួមជាមួយយើង»។ នេះជាការបញ្ជាក់របស់លោក សួន សេរីរដ្ឋា ដែលបានបន្ថែមថា លោកនឹងបន្តនិយាយបញ្ហាក្នុងសង្គមដូចមុន ពោលគឺមិនទម្លាក់ចោលអ្វី ដែលខ្លួនធ្លាប់ធ្វើឡើយ។
លោក សួន សេរីរដ្ឋា អតីតប្រធានគណបក្សអំណាចខ្មែរ ត្រូវបានព្រះមហាក្សត្រ សម្តេចព្រះបរមនាថ នរោត្តម សីហមុនី ចេញព្រះរាជក្រឹត្យលើកលែងទោស តាមសំណើរបស់សម្ដេចនាយករដ្ឋមន្ត្រី ហ៊ុន សែន។ ព្រះរាជក្រឹត្យរបស់ព្រះមហាក្សត្រ បានចេញនៅថ្ងៃទី២៣ សីហា ឆ្នាំ២០១៨នេះ។ មូលហេតុដែលនាយករដ្ឋមន្ត្រី ហ៊ុន សែន ស្នើសុំព្រះមហាក្សត្រលើកលែងទោសលោក សួន សេរីរដ្ឋា នេះ គឺដោយសារតែអតីតប្រធានគណបក្សអំណាចខ្មែររូបនេះ ធ្លាប់បានសរសេរលិខិតសុំទោសសម្ដេច ចំនួន២ដងកន្លងមក។
គួរបញ្ជាក់ថា លោក សួន សេរីរដ្ឋា ត្រូវបានតុលាការចោទប្រកាន់ចំនួន៣បទល្មើស រួមមាន បទញុះញង់កុំឲ្យយោធិនស្ដាប់បង្គាប់ បទធ្វើឲ្យខូចទឹកចិត្ត និងបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ នៃក្រមព្រហ្មទណ្ឌ ។ ការចោទប្រកាន់នេះ ធ្វើឡើងបន្ទាប់ពីលោក សួន សេរីរដ្ឋា បញ្ចេញមតិតាមហ្វេសប៊ុក (Facebook) របស់លោក កាលពីអំឡុងខែសីហា ឆ្នាំ២០១៧ ទាក់ទងនឹងការបញ្ជាកងទ័ពឲ្យទៅត្រៀមប្រយុទ្ធនឹងកងទ័ពឡាវថា៖ «បើសង្គ្រាមកើតឡើងជាមួយនឹងប្រទេសឡាវមែន កូនខ្មែរកងទ័ពជាតិ នឹងស្លាប់ក្នុងសមរភូមិយ៉ាងវេទនា ហើយមេទ័ពចោរនឹងឡើងបុណ្យ ប្រមូលលុយ សប្បាយស្រីញីយ៉ាងគគ្រឹក គគ្រេង»។ តាមរយៈបទចោទនេះ តុលាការបានសម្រេចផ្តន្ទាទោសលោក សួន សេរីរដ្ឋា ឲ្យជាប់ពន្ធនាគារ៥ឆ្នាំ និងពិន័យប្រាក់១០លានរៀល កាលពីថ្ងៃទី២៥ សីហា ឆ្នាំ២០១៧៕
Tag:
សួន សេរីរដ្ឋា
ពន្ធនាគារ
© រក្សាសិទ្ធិដោយ thmeythmey.com