សម្តេច ហ៊ុន សែន៖ គេថា អាមេរិក វាស់ដីឲ្យខ្ញុំដើរ គឺត្រឹមត្រូវហើយ

ជាតិ

នយោបាយជាតិ

សម្តេច ហ៊ុន សែន៖ គេថា អាមេរិក វាស់ដីឲ្យខ្ញុំដើរ គឺត្រឹមត្រូវហើយ

28, Sep 2018 , 11:30 am

រូបភាព

ដោយ: ថ្មីៗ

នៅលើទឹកដីអាមេរិក សម្តេចនាយករដ្ឋមន្ត្រី ហ៊ុន សែន មិនធ្វើដំណើរទៅណាផ្សេង ឲ្យហួសពីព្រំដែន ដែលត្រូវបានកំណត់ទុកក្នុងកម្មវិធីនោះទេ។ នេះជាការអះអាងរបស់សម្តេច ហ៊ុន សែន ខ្លួនឯង ទៅកាន់អ្នកកាសែត ពេលចុះពីលើយន្តហោះ នៅទីក្រុងញូវយ៉ក សហរដ្ឋអាមេរិក។

«អ្នកប្រឆាំង ថាគេ វាស់ដីឲ្យសម្តេចដើរ ពេលមកអាមេរិក។ តើសម្តេច អាចដើរទៅណាផ្សេងបានទេ?»។ នេះជាសំណួររបស់អ្នកកាសែត ដែលសួរទៅកាន់សម្តេច ហ៊ុន សែន។ នាយករដ្ឋមន្ត្រីកម្ពុជា ឆ្លើយយ៉ាងដូច្នេះថា៖«កម្មវិធីខ្ញុំទៅណា ជាកម្មវិធីរបស់ខ្ញុំ។ សូមផ្តាំទៅវិញផងថា គេនិយាយហ្នឹង ត្រឹមត្រូវហើយ គឺអាមេរិកវាស់ដីឲ្យខ្ញុំដើរ ព្រោះខ្ញុំ អត់ដើរទៅផ្លូវណាផ្សេង ក្រៅពីផ្លូវព្រលានយន្តហោះ មកសណ្ឋាគារ ចេញពីសណ្ឋាគារ ចូលអង្គការសហប្រជាជាតិ។ វា តែប៉ុណ្ណឹង»។

លោក សម រង្ស៊ី អតីតប្រធានគណបក្សសង្គ្រោះជាតិ គឺជាអ្នកចំអកឲ្យសម្តេច ហ៊ុន សែន ថាមិនអាចដើរទៅកន្លែងណាផ្សេងនោះទេ នៅពេលទៅដល់សហរដ្ឋអាមេរិក។ លោក សម រង្ស៊ី និយាយកាលពីប៉ុន្មានថ្ងៃមុនថា សម្តេច ហ៊ុន សែន អាចដើរបានតែនៅលើផ្លូវ ដែលគេកំណត់ឲ្យប៉ុណ្ណោះ។

សម្តេច ហ៊ុន សែន និងគណៈប្រតិភូកម្ពុជា បានទៅដល់ទីក្រុងញូវយ៉ក សហរដ្ឋអាមេរិក នៅម៉ោងជិត៤រសៀល ថ្ងៃទី២៧ ខែកញ្ញា ដែលត្រូវជាម៉ោងជិត៣ទៀបភ្លឺ ថ្ងៃទី២៨ ខែកញ្ញា នៅកម្ពុជា។ តាមកម្មវិធី មេដឹកនាំកម្ពុជា នឹងឡើងថ្លែងសុទ្ទរកថា ក្នុងមហាសន្និបាតអង្គការសហប្រជាជាតិ នៅថ្ងៃទី២៨ ខែកញ្ញានេះ៕

អត្ថបទទាក់ទង

សម្តេច ហ៊ុន សែន ទៅដល់អាមេរិក ដោយជួបអ្នកស្វាគមន៍ មុនប្រឈមនឹងអ្នកប្រឆាំង

មានអ្នកត្រៀមប្រឆាំង និងអ្នកត្រៀមស្វាគមន៍ ចំពោះវត្តមានសម្តេច ហ៊ុន សែន នៅអាមេរិក