កីឡាអន្តរជាតិ
អន្តរជាតិ
Formula 1 នឹងមានកីឡាករថៃបើកបរលើកដំបូង នៅរដូវកាល ២០១៩
× ក្រុមប្រណាំងរថយន្ត Toro Rosso ដែលជាកម្មសិទ្ធិរបស់ក្រុម Red Bull បានប្រកាសថាកីឡាករថៃ Alexander Albon នឹងចូលរួមប្រជែងក្នុងព្រឹត្តិការណ៍ប្រណាំងរថយន្តលំដាប់ពិភពលោក Formula One ឲ្យក្រុមខ្លួនចាប់ពីរដូវកាលក្រោយទៅ។
Albon សញ្ជាតិអង់គ្លេស-ថៃ អាយុ ២២ ឆ្នាំបានបញ្ចប់ក្នុងចំណាត់ថ្នាក់លេខ ៣ នៅក្នុងការប្រណាំងរថយន្ត Formula Two រដូវកាលនេះ និងធ្លាប់ចូលរួមប្រកួតប្រជែងជាមួយក្រុមហ៊ុន Nissan ក្នុងក្របខណ្ឌ Formula E series។ រូបគេនឹងធ្វើជាដៃគូជាមួយអ្នកប្រណាំងសញ្ញាតិរុស្ស៊ី Daniil Kvyat ជំនួសកីឡាករនូវែលសេឡង់ Brendon Hartley សម្រាប់ក្រុម Toro Rosso នៅឆ្នាំ២០១៩។
ការចូលរួមរបស់ Albon មានន័យថានឹងមានអ្នកបើកបរ៤នាក់ដែលកើតនៅចក្រភពអង់គ្លេសក្នុងយុទ្ធនាការណ៍ប្រណាំងរថយន្ត F1 ឆ្នាំ២០១៩ ប៉ុន្តែរូបគេនឹងប្រណាំងក្នុងនាមកីឡាករថៃ និងប្រើប្រាស់ទង់ជាតិថៃនោះទេ។
Albon នឹងប្រជែងជាមួយកីឡាកររួមជាតិអង់គ្លេសដូចគ្នាដូចជា Lando Norris របស់ McLaren កីឡាករ George Russell របស់ក្រុម Williams និងម្ចាស់ជើងឯក ៥ សម័យ Lewis Hamilton របស់ Mercedes។
«វាជាអារម្មណ៍ដ៏អស្ចារ្យមួយនៅពេលដឹងថាខ្ញុំបានចូលរួមប្រកួត Formula 1 ឆ្នាំក្រោយ។ ពេញមួយអាជីពរបស់ខ្ញុំ ខ្ញុំបានឆ្លងកាត់ឧបសគ្គជាច្រើន។ ខ្ញុំធ្លាប់ត្រូវបានក្រុម Red Bull ជម្រុះចេញកាលពីឆ្នាំ ២០១២ ដូច្នេះតាំងពីពេលនោះមកខ្ញុំបានដឹងថាផ្លូវរបស់ខ្ញុំទៅកាន់ Formula 1 គឺកាន់នឹងកាន់តែលំបាក»។ Albon រៀបរាប់ពីអារម្មណ៍របស់ខ្លួនដូច្នេះ។
រូបគេបន្ថែមថា៖«បន្តែខ្ញុំបានខិតខំប្រឹងប្រែងយ៉ាងខ្លាំងហើយព្យាយាមនៅរាល់ពេលដែលខ្ញុំចូលឡាន ហើយខ្ញុំត្រូវអរគុណដល់ Red Bull និងលោក Helmut Marko ជាប្រធានក្រុមប្រណាំង ដែលមានការជឿជាក់លើខ្ញុំ និងផ្តល់ឲ្យខ្ញុំសម្រាប់ឱកាសទីពីរនេះ»៕
Tag:
ប្រណាំងរថយន្ត
Formula One
Alexander Albon
© រក្សាសិទ្ធិដោយ thmeythmey.com