កីឡាអន្តរជាតិ
អន្តរជាតិ
Klopp ទទួលស្គាល់បរាជ័យ តែមិនពេញចិត្តទង្វើរបស់កីឡាករ PSG ជាពិសេស Neymar
× លោក Jurgen Klopp អ្នកចាត់ការទូទៅ Liverpool ថាកូនក្រុមរបស់លោកត្រូវបានគេមើលទៅហាក់ដូចជាមនុស្សព្រៃផ្សៃបំផុតនៅពេលប៉ះទង្គិចគ្នាជាមួយកីឡាកររបស់ Paris Saint-Germain ម្តងៗជាពិសេសគឺ Neymar អំឡុងការប្រកួតដែលក្រុមលោកបរាជ័យ ២-១ ក្នុងក្របខណ្ឌ UEFA Champions League នៅរាត្រីថ្ងៃទី២៩ ខែវិច្ឆិកា។ បរាជ័យនេះបានធ្វើឲ្យ PSG ឡើងទៅឈរចំណាត់ថ្នាក់ទី២ ក្នុងពូល C ដែលនាំ Liverpool ត្រូវធ្លាក់ទៅលេខ៣វិញ ហើយ Klopp រងសម្ពាធខ្លាំងខណៈក្រុមប្រឈមនឹងការធ្លាក់ចេញពីពានកំពូលអឺរ៉ុបនេះ។
លោក Klopp ទទួលស្គាល់ថាក្រុមម្ចាស់ជើងឯកបារាំងពិតជាទទួលបានជ័យជម្នះសម្រាប់ការចាប់ផ្តើមដ៏លេចធ្លោតាំងពីដើមតង់ទីមួយ នៅកីឡដ្ឋាន Parc des Princes ដែលនាំឲ្យមានគ្រាប់បាល់ស៊ុតបញ្ចូលទីពីសំណាក់កីឡាករ Juan Bernat និង Neymar មុន James Milner រកបានបាល់ពិន័យ១១ម៉ែត្រមុនចប់តង់។
ប៉ុន្តែអ្វីដែលអ្នកចាត់ការសញ្ញជាតិអាល្លឺម៉ង់រូបនេះមិនពេញចិត្តនោះគឺសកម្មភាពធ្វើពុតដួលនៅលើទីលានរបស់កីឡាករក្រុមម្ចាស់ផ្ទះ ជាពិសេសគឺកីឡាករថ្លៃបំផុតលើលោក Neymar តែម្តង។ ខ្សែប្រយុទ្ធឆ្នើមសញ្ជាតិប្រេស៊ីលរូបនេះតែងតែទទួលបានបាល់ពិន័យ (Free Kick) រាល់ពេលប៉ះគ្នាជាមួយកីឡាករ Liverpool ដែលមើលទៅដូចជាមានសភាពរបួសធ្ងន់ធ្ងរ។
«ខ្ញុំដឹងថាវាជាការប្រកួតដ៏សំខាន់ ប៉ុន្តែចំនួននៃការរំខានក្នុងការប្រកួតច្រើនពេកគឺមិនសូវល្អទេ»។ យើងបានឈ្នះពានរង្វាន់លេងដោយយុត្តិធម៌ (Fair Play) ពីរដងនៅអង់គ្លេសរួចមកហើយ ប៉ុន្តែយប់នេះកីឡាកររបស់យើងមើលទៅដូចជាមនុស្សឃៅឃៅអ៊ីចឹងជាមួយនឹងចំនួនកាតលឿងដែលទទួលបាន។ វាជាភាពឆ្លាតវៃរបស់ PSG ជាពិសេសការរំអួយរបស់ Neymar ប៉ុន្តែកីឡាករដទៃទៀតមើលទៅដូចជាមិនមានអ្វីមួយធ្ងន់ធ្ងរឡើយ។ Klopp បញ្ចេញអារម្មណ៍មិនពេញចិត្តដូច្នេះ។
យ៉ាងណាក៏ដោយ សម្រាប់ការប្រកួតវគ្គសន្សំពិន្ទុពូល C ចំនួន៥ប្រួតមកនេះនៅមិនទាន់មានក្រុមណាមួយកក់កៅអីទៅវគ្គបន្តនោះទេ ដោយ Napoli, PSG និង Liverpool សុទ្ធតែមានឱកាសដូចគ្នា ខណៈ Red Star Belgrade ព្យាយាមរកកៅអីនៅ Europa League។ ក្រុមពីអ៊ីតាលី Napoli ឈ្នះ Red Star Belgrade ៣-១ ដែលនាំឲ្យពួកគេមាន៩ពិន្ទុ នាំមុខ PSG មាន៨ពិន្ទុ Liverpool មាន៦ពិន្ទុ និង Red Star Belgrade មាន៤ពិន្ទុ។ ទាំង៤ក្រុមត្រូវសម្រេចក្នុងការប្រកួតកាត់សេចក្តីលើកចុងក្រោយថាតើអ្នកណាត្រូវនៅ និងត្រូវឈានទៅវគ្គបន្ត ដោយ Liverpool ត្រូវទទួលភ្ញៀវ Napoli ចំណែក PSG ធ្វើដំណើរទៅជួប Red Star នៅយប់ថ្ងៃទី១២ ខែធ្នូ ឆ្នាំ២០១៨៕
Tag:
បាល់ទាត់
Jurgen Klopp
Neymar
UEFA Champions League
© រក្សាសិទ្ធិដោយ thmeythmey.com