ជាតិ
បុរសជះស្រាបៀលើ កញ្ញា ទេព បូព្រឹក្ស ចេញមុខសុំទោស ដោយអះអាងថា មកពីខ្លួនស្រវឹង
× ភ្នំពេញ៖ បុរសម្នាក់ ដែលបានជះស្រាបៀលើកញ្ញា ទេព បូព្រឹក្ស បានចេញមុខសុំទោសជាសាធារណៈ ដោយអះអាងថា មកពីខ្លួនស្រវឹង។ បុរសម្នាក់នោះ ក៏យល់ព្រមសងជំងឺចិត្ត ដល់កញ្ញា ទេព បូព្រឹក្ស ផងដែរ។
លោក ឆេង រស្មី ដែលបានជះស្រាបៀលើ កញ្ញា ទេព បូព្រឹក្ស នេះ បានរៀបរាប់នៅក្នុងសន្និសីទកាសែតថា ទង្វើដែលខ្លួនបានប្រព្រឹត្តមិនគប្បីលើតារាចម្រៀងស្រីនេះ គឺមកពីខ្លួនស្រវឹងពេក ទើបធ្វើឲ្យបាត់បង់ស្មារតី ហើយធ្វើទង្វើមិនល្អនេះ។ «ខ្ញុំសោកស្ដាយ ដែលបានជះស្រាលើកញ្ញា ទេព បូព្រឹក្ស ដោយសារថ្ងៃនោះ ជាថ្ងៃជួបជុំក្នុងថ្ងៃគ្រីស្មាស ហើយខ្ញុំបានញាំគ្រឿងស្រវឹងច្រើន ទើបធ្វើឲ្យខ្ញុំស្រវឹងប្រព្រឹត្តខុសឆ្គងនេះ…។ហើយខ្ញុំក៏មិនបានចាំថាខ្ញុំបានធ្វើអ្វីខ្លះនោះទេ »។ នេះជាការបញ្ជាក់របស់លោក ឆេង រស្មី ដែលយល់ព្រមអនុវត្តតាមការទាមទាររបស់កញ្ញា ទេព បូព្រឹក្ស។
មេធាវីការពារក្តីឲ្យកញ្ញា ទេព បូព្រឹក្ស បានបញ្ជាក់បន្ថែមថា ជនបង្កកំហុស បានសន្យាមិនគុំគួនលើកញ្ញា ទេព បូព្រឹក្ស ហើយនឹងយល់ព្រមផ្ដល់សំណងជូនតារាចម្រៀងរូបនេះផងដែរ។ ប៉ុន្តែមេធាវីរូបនេះ មិនបានបញ្ជាក់ថា សំណងដែលជនប្រព្រឹត្តកំហុស អាចសងក្នុងទំហំទឹកប្រាក់ប៉ុន្មាននោះទេ។
គួរបញ្ជាក់ថា អ្នកចម្រៀងវ័យជាង២០ឆ្នាំរូបនេះ ត្រូវបានលោក ឆេង រស្មី គប់កំប៉ុង និងជះស្រាបៀរទៅលើខ្លួន នៅពេលដែលនាងកំពុងច្រៀងនៅក្នុងភោជនីយដ្ឋានមួយក្នុងសង្កាត់ទឹកល្អក់ទី១ ខណ្ឌទួលគោក កាលពីថ្ងៃទី ២៥ ធ្នូ កន្លងមក៕
Tag:
ទេព បូព្រឹក្ស
សិល្បៈ
© រក្សាសិទ្ធិដោយ thmeythmey.com