នៅពេលដែលលោកគ្រប់គ្រងឱសថស្ថានរបស់ខ្លួនប្រទេសបារាំងកាលពីអំឡុងឆ្នាំ១៩៨០ លោក ហៃ លីអ៊ាង ដែលជាឱសថបណ្ឌិត បានផ្តួចផ្តើមផលិត Tabastop ដែលជាប្រភេទថ្នាំបៀមដើម្បីផ្តាច់បារី និង Phytorel ដែលជាប្រភេទថ្នាំបំប៉នផ្អែកតាមគោលការណ៍អាហារូបត្ថម្ភដែលផ្សំពីម្សៅផ្លែឈើគ្មានជាតិស្ករ និងរុក្ខឱសថ។
សកម្មភាព និងការច្នៃប្រឌិតទាំងនេះ ជាចំណែកដ៏ធំមួយរបស់លោក ហៃ លីអ៊ាង ស្ថាបនិកក្រុមហ៊ុន Confirel ក្នុងការចូលរួមអភិវឌ្ឍន៍ជនបទ។ បង្កើតឡើងនៅឆ្នាំ២០០១ ក្រុមហ៊ុន Confirel ដែលឈានមុខគេក្នុងវិស័យកសិ-ជីវសាស្ត្រ មានផលិតផលជាង៣០មុខ ដែលផលិតចេញពីស្ករត្នោតពីខេត្តកំពង់ស្ពឺ និងម្រេចពីខេត្តកំពត ដើម្បីនាំចេញទៅកាន់ទីផ្សារពិភពលោក។
តាមរយៈផលិតផលរបស់ Confirel លោក ហៃ លីអ៊ាង ដែលជាស្ថាបនិកក្រុមហ៊ុនឱសថ PPM ផងដែរនោះ បានលើកឡើងពីផលប្រយោជន៍នៃការច្របាច់បញ្ចូលគ្នារវាងជំនាញបែបប្រពៃណី និងការច្នៃប្រឌិត ដែលឈានទៅដល់ការលើកកម្ពស់ផលិតផលជាតិ ឲ្យមានវត្តមាននៅលើតុអាហារធំៗលើពិភពលោក ក៏ដូចជាក្នុងចំណោមគ្រឿងទេសល្អបំផុត។
ឱសថបណ្ឌិតរូបនេះ បានរំលឹកយ៉ាងដូច្នេះថា៖ «យើងបានចាប់ផ្តើមជាស្ករត្នោត។ អស់រយៈពេល១៨ឆ្នាំ ផលិតផលស្ករត្នោតជាប្រពៃណីដែលផលិតដោយប្រជាកសិករ មានវត្តមានតែនៅលើទីផ្សារក្នុងស្រុកប៉ុណ្ណោះ។ អ្នកឡើងត្នោតទៀតសោត បានផលិតទឹកត្នោតជូរដែលមានគុណភាពអន់ ហើយក្រុមមគ្គុទេសក៍ បានហាមភ្ញៀវទេសចរសាកល្បងរសជាតិ»។
លោកបានបន្ថែមថា៖ «តាមរយៈការចូលរួមប្រកួតប្រជែងផលិតដែលរៀបចំដោយមជ្ឈមណ្ឌលស្រាវជ្រាវកសិកម្ម និងអភិវឌ្ឍអន្តរជាតិ (CIRAD) នៅបារាំង យើងបោះជំហានទៅមុខយ៉ាងឆាប់រហ័ស ដោយយើងផលិតបានស្ករត្នោតសរីរាង្គដែលមានគុណភាពពិសេស ហើយឈានទទួលបានពានរង្វាន់ក្នុងព្រឹត្តិការណ៍ Salon Natexpo នៅក្រុងប៉ារីស កាលពីឆ្នាំ២០០៥។ នេះជាការចាប់ផ្តើមដ៏ជោគជ័យរបស់យើង ដែលនាំឲ្យមានការអភិវឌ្ឍន៍ជាបន្តបន្ទាប់»។
បន្ថែមលើស្ករត្នោត និងផលិតផលផ្សេងទៀត ក្រោមម៉ាកពាណិជ្ជកម្ម «ត្នោត» (Thnot) ដូចជាស្រា និងភេសជ្ជៈសរីរាង្គនានា ក្រុមហ៊ុន Confirel ក៍ដំណើរការផលិត និងធ្វើពាណិជ្ជកម្មលើដំណាំម្រេចសរីរាង្គនៅខេត្តកំពតផងដែរ។
ជាមួយនឹងភាពល្បីល្បាញក្នុងនាមជាប្រភេទម្រេចដ៏ល្អមួយនៅលើពិភពលោក ក្រុមហ៊ុន Confirel ខិតខំបង្កើតផលិតផលថ្មីៗសម្បូរបែប ដើម្បីបំពេញតម្រូវការអតិថិជន។ អ្វីដែលពិសេសនោះ Confirel មានផលិតផលសរីរាង្គដែលបង្កើតចេញពីម្រេចកំពតខ្ចី ដូចជា តែម្រេច ជាដើម ដែលនាំឲ្យចម្ការម្រេចរបស់ក្រុមហ៊ុនទាំងមូល ទទួលបានប៉ាតង់ពីបារាំង និងបណ្តាប្រទេសជាច្រើន។
«ពលរដ្ឋខ្មែរមួយចំនួនវាយតម្លៃថា ផលិតផលក្នុងស្រុក មិនអាចប្រៀបផ្ទឹមជាមួយផលិតផលពីបរទេសបាននោះឡើយ។ សោកស្តាយខ្លាំងណាស់ ដែលពួកគាត់មើលឃើញខុសបែបនេះ»។ លោកបានត្អូញត្អែយ៉ាងដូច្នេះ មុននឹងបន្ថែមថា ក្រុមហ៊ុន Confirel របស់លោកប្រឹងធ្វើឲ្យពួកគាត់មើលឃើញវិជ្ជមានឡើងវិញ។
លោក លីអ៊ាង សំដែងការរីករាយនូវអ្វីដែលលោក និងដៃគូ ពោលគឺក្រុមអ្នកសមាជិកស្ករត្នោតនៅកំពង់ស្ពឺ និងម្រេចនៅកំពត ដែលបានរួមគ្នាជម្នះឧបសគ្គ ជាមួយនឹងការគាំទ្របន្ថែមពីទីភ្នាក់ងារអភិវឌ្ឍន៍បារាំង (AFD) ថែមទាំងផង។ អ្វីដែលបោះជំហានទៅមុខនោះ គឺ ផលិតផលរបស់ Confirel ទទួលបានវិញ្ញាបនបត្រសរីរាង្គលើកដំបូងពីស្ថាប័ន Ecocert International សម្រាប់ទីផ្សារអឺរ៉ុប អាមេរិក និងជប៉ុន។
បើគិតចាប់តាំងពីទទួលបានមេដាយមាសនៅព្រឹត្តិការណ៍ Natexpo និងជ័យលាភីជាច្រើនផ្សេងទៀត ផលិតផលរបស់ក្រុមហ៊ុន Confirel មានការទទួលស្គាល់កាន់ខ្លាំង ជាពិសេសកាលពីឆ្នាំ២០១៧ ស្ករត្នោតសរីរាង្គ បានជាប់ជាផលិតផលដែលល្អជាងគេនៅអាស៊ាន ក្រោមការទទួលស្គាល់របស់ Asean Food Conference និងជាផលិតផលល្អជាងប្រចាំឆ្នាំដែលទទួលស្គាល់ដោយទស្សនាវដ្តីជប៉ុន Kingdom Cuisine។
សម្រាប់លោក លីអ៊ាង ពលរដ្ឋខ្មែរខ្លួនឯង គឺជាអ្នកដែលដើរតួនាទីក្នុងការពង្រីកផលិតផលលើទីផ្សារអន្តរជាតិ និងជាការរួមចំណែកក្នុងកំណើនសេដ្ឋកិច្ចជាតិ។ លោកលើកឡើងពីគម្រោងអាជីវកម្មដ៏សាមញ្ញបំផុត គឺបង្កើតស្នាដៃនៅកម្ពុជា ដោយប្រើវត្ថុធាតុដើមលាយជាមួយនឹងការកែច្នៃបន្ថែមដើម្បីរួមចំណែកបង្កើនចំណូលដល់ប្រជាកសិករ។
លោកបានពន្យល់ថា៖ «នៅពេលដែលខ្ញុំបង្កើតក្រុមហ៊ុន Confirel មនុស្សជាច្រើននាពេលនោះ និយាយថា ខ្ញុំជាមនុស្សឆ្កួត ព្រោះមានសញ្ញាបត្រជាឱសថការី បែរជាប្រឡូកខ្លួនក្នុងពិភពកសិករទៅវិញ។ សម្រាប់ខ្ញុំ ខ្ញុំចូលចិត្តការងារជាមួយកសិករ ពីព្រោះកន្លងមក ខ្ញុំឃើញគម្លាតយ៉ាងឆ្ងាយទាក់ទងនឹងការអភិវឌ្ឍន៍រវាងទីក្រុង និងជនបទ។ តាមពិតទៅ ការអភិវឌ្ឍន៍ជនបទ គឺជាការងារដែលយើងត្រូវប្រឹងប្រែងដើម្បីភាពសុខដុមរមនាក្នុងសង្គម»៕