ជាតិ
សង្គមជាតិ
ស្ត្រីចំណាស់ខ្មែរនៅទីជនបទ។ រូបថត AFP
×![]()
ភ្នំពេញ៖ ជំរឿនទូទៅនូវប្រជារាស្ត្រលើកទីបី នឹងប្រព្រឹត្តចាប់ពីថ្ងៃទី៣-១៣មីនា ឆ្នាំ២០១៩។ បើតាមសម្តេចនាយករដ្ឋមន្ត្រី ហ៊ុន សែន នេះជាជំរឿនលើកទីមួយ ដែលប្រើប្រាស់ថវិកាជាតិ បន្ទាប់ពីកម្ពុជា បានក្លាយជាប្រទេសមួយដែលមានចំណូលមធ្យមកម្រិតទាប។ 
សម្តេច ហ៊ុន សែន កាលពីថ្ងៃទី១ កុម្ភៈ បានអំពាវនាវដល់ប្រជាពលរដ្ឋឲ្យចូលរួមក្នុងក្នុងជំរឿនទូទៅនៃប្រជារាស្ត្រសម្រាប់ឆ្នាំ២០១៩នេះ។ សម្តេចលើកឡើងថា នេះគឺជាការងារដ៏ធំរបស់ប្រទេសជាតិ ដែលមានសារសំខាន់ខ្លាំងណាស់ ហើយគឺការងារស្ថិតិពិតប្រាកដ។ ការធ្វើជំរឿនប្រជាជន ជាការងារដែលប្រទេសទាំងអស់នៅលើពិភពលោក ត្រូវធ្វើគ្រប់ៗគ្នា។
«ការធ្វើជំរឿនប្រជាជនកម្ពុជានេះ នឹងអាចឲ្យយើងបានទន្និន័យប្រជាសាស្ត្រ ពិតប្រាកដរបស់ប្រទេស និងជួយឲ្យរដ្ឋាភិបាលអាចរៀបចំ តាក់តែងគោលនយោបាយត្រឹមត្រូវ ព្រមទាំងអនុវត្តកម្មវិធីផ្សេងៗឲ្យទទួលបានតុល្យភាពនៃការអភិវឌ្ឍសម្រាប់ប្រជាពលរដ្ឋទូទាំងប្រទេស»។
សម្តេចនាយករដ្ឋមន្ត្រី បានបញ្ជាក់ថា ជំរឿនប្រជាសាស្ត្រ គឺជាប្រភពតែមួយគត់ ដែលអាចផ្តល់ទន្និន័យពេញលេញអំពីចំនួនប្រជាជន និងចរិតលក្ខណៈប្រជាជន នៅក្នុងប្រទេស។ ជំរឿនប្រជាជន គឺជាការអនុវត្ត លើវិសាលភាពពេញផ្ទៃប្រទេស ដែលអាចផ្តល់ព័ត៌មានអំពីប្រជាជនក្នុងមូលដ្ឋាន រហូតដល់មូលដ្ឋានថ្នាក់ទាបបំផុត ដែលជាតម្រូវការមិនអាចមានប្រភពទិន្នន័យផ្សេងមកជំនួសបាន។
សូមបញ្ជាក់ថា ការងារជំរឿនប្រជាជនកម្ពុជា ត្រូវបានធ្វើឡើង២ដងរួចមកហើយ គឺនៅឆ្នាំ១៩៩៨ និងឆ្នាំ២០០៨ ដែលស្របតាមច្បាប់ស្តីពីស្ថិតិ ដោយកំណត់នូវកាតព្វកិច្ច របស់ប្រជាពលរដ្ឋម្នាក់ៗ ត្រូវចូលរួមសហការ ក្នុងការធ្វើជំរឿន។ ការធ្វើជំរឿនទាំង៣លើកនេះ មានការជួយជ្រោមជ្រែងពីអង្គការដៃគូ ដូចជាអង្គការUNFPA អង្គការJICA រាជរដ្ឋាភិបាលជប៉ុន និងប្រទេសអាល្លឺម៉ង់។
ការធ្វើជំរឿនផ្លូវការលើកដំបូងកាលពីឆ្នាំ១៩៩៨ កម្ពុជាមានពលរដ្ឋចំនួន១១,៤៣៧,៦៥៦នាក់ ហើយឡើងដល់ ១៣,៣៩៥,៦៨២នាក់នៅឆ្នាំ២០០៨ ។ នៅឆ្នាំ២០១៥ អង្គការសហប្រជាជាតិ បានប៉ាន់ប្រមាណថា ចំនួនប្រជាជនកម្ពុជាកើនដល់១៥,៥៨លាននាក់៕
Tag:
ជំរឿន
© រក្សាសិទ្ធិដោយ thmeythmey.com
