អន្តរជាតិ
ពលរដ្ឋប៉ាគីស្ថានស្នើផ្តល់រង្វាន់ណូបែលដល់មេដឹកនាំខ្លួន ក្រោយដោះលែងទាហានឥណ្ឌា
× ប្រជាជនប៉ាគីស្ថានជាង៣០ម៉ឺននាក់ បានចុះហត្ថលេខាលើសំណើតាមប្រព័ន្ធអនឡាញ ស្នើឲ្យនាយករដ្ឋមន្ត្រី Imran Khan ទទួលរង្វាន់ណូបែលសន្តិភាព។ ការស្នើសុំនេះ គឺធ្វើឡើងក្រោយមេដឹកនាំរូបនេះបានដោះលែងអ្នកបើកយន្តហោះឥណ្ឌាម្នាក់ ដើម្បីបន្ធូរបន្ថយភាពតានតឹងជាមួយឥណ្ឌា។
ការចាប់ខ្លួនមន្ត្រីយោធាអាកាសឥណ្ឌា លោក Abhinandan Varthaman បានក្លាយជាប្រធានដ៏ក្តៅគគុករវាងមហាអំណាចនុយក្លេអ៊ែរឥណ្ឌានិងប៉ាគីស្ថាន ដែលបានបង្កភាពភ្ញាក់ផ្អើលដល់សហគមន៍អន្តរជាតិ។ ភាពតានតឹងកើនខ្លាំង ចាប់តាំងពីមានហេតុការណ៍បំផ្ទុះគ្រាប់បែកក្នុងតំបន់កាស្មៀរកាលពីទី១៤ ខែកុម្ភៈ បង្កដោយក្រុមឧទ្ទាមមានមូលដ្ឋានក្នុងប៉ាគីស្ថាន ដែលសម្លាប់មន្ត្រីយោធាឥណ្ឌា៤០នាក់។
ពាក្យ #NobelPeaceForImranKhan ចាប់ផ្តើមរីកសាយភាយដូចផ្សិតលើបណ្តាញសង្គម Twitter កាលពីថ្ងៃ២៨ ខែកុម្ភៈ ក្រោយពីលោកនាយករដ្ឋមន្ត្រីប៉ាគីស្ថាន Imran Khan បានប្រកាសយ៉ាងភ្ញាក់ផ្អើលថា អ្នកបើកបរយន្តហោះចម្បាំងឥណ្ឌាដែលត្រូវបានចាប់ខ្លួន នឹងត្រូវដោះលែងដើម្បីជា«កាយវិការសន្តិភាព»។
លោក Abhinandan ដែលយន្តហោះចម្បាំងប្រភេទ MiG ត្រូវបានបាញ់ទម្លាក់កាលពីថ្ងៃពុធដោយយោធាប៉ាគីស្ថានក្នុងតំបន់ជម្លោះកាស្មៀរនោះ បានវិលត្រឡប់ទៅកាន់ប្រទេសកំណើតវិញ កាលពីយប់ថ្ងៃសុក្រទី១ ខែមីនា ។
ទាក់ទិននឹងការដោះលែងនេះដែរ រដ្ឋមន្ត្រីក្រសួងព័ត៌មានប៉ាគីស្ថាន Fawad Chaudhry ក៏បានបញ្ជូនសេចក្តីសម្រេចមួយទៅកាន់សភាប៉ាគីស្ថាន ក្នុងគោលបំណងទាមទារឲ្យផ្តល់រង្វាន់ដល់លោក Khan សម្រាប់ការផ្តល់វិភាគទានរបស់លោកដល់សន្តិភាពក្នុងតំបន់។ សេចក្តីសម្រេចដែលដកស្រង់ដោយទីភ្នាក់ងារព័ត៌មាន AFP គូសបញ្ជាក់ថា៖«លោក Imran Khan បានដើរតួនាទីដ៏ឆ្លាតវៃក្នុងការកាត់បន្ថយភាពតានតឹងរវាងប៉ាគីស្ថាននិងឥណ្ឌា»។
គួររម្លឹកផងដែរថា យោធាប៉ាគីស្ថាន កាលពីថ្ងៃទី២៧ ខែកុម្ភៈ បានបញ្ជាក់ថា ខ្លួនបានបើកប្រតិបត្តិការយោធាមួយនៅក្នុងតំបន់កាស្មៀរ ដែលគ្រប់គ្រងដោយឥណ្ឌា។ ក្នុងប្រតិបត្តិការនេះ ប៉ាគីស្ថានបានបាញ់ទម្លាក់យន្តហោះចម្បាំង២គ្រឿងរបស់ឥណ្ឌាក្នុងតំបន់ដែនអាកាសរបស់ខ្លួន ព្រមទាំងបានឃាត់ខ្លួនអ្នកបើកបរយន្តហោះម្នាក់របស់ឥណ្ឌាផងដែរ៕
© រក្សាសិទ្ធិដោយ thmeythmey.com