អន្តរជាតិ
បន្ទាប់ពីថៃ ផ្សារទំនើបវៀតណាមមផ្តើមប្រើស្លឹកចេកជំនួសប្លាស្ទិកដើម្បីវេចខ្ចប់ទំនិញ
រូបថត៖ VnExpress
×![]()
ផ្សារទំនើបមួយចំនួននៅប្រទេសវៀតណាម បានចាប់ផ្តើមប្រើប្រាស់ស្លឹកចេកដើម្បីវេចខ្ចប់ផលិតផលខ្លួន។ គំនិតផ្តួចផ្តើមនេះ មានគោលដៅចូលរួមកាត់បន្ថយសំណល់ប្លាស្ទិក ដែលប៉ះពាល់យ៉ាងធ្ងន់ធ្ងរដល់បរិស្ថាន។
ប្រជាជនវៀតណាមភ្ញាក់ផ្អើល ក្រោយពីផ្សារទំនើបមួយឈ្មោះថា Lotte Mart ដែលស្ថិតក្នុងទីក្រុងហូជីមិញ កាលពីថ្មីៗនេះ បានចាប់ផ្តើមយកស្លឹកចេកមកវេចខ្ចប់ផលិតផលរបស់ខ្លួន។ យោងតាមការចុះផ្សាយរបស់សារព័ត៌មាន Vietnam Express តំណាងម្នាក់មកពីឧស្សាហកម្មផ្សារទំនើប បានគូសបញ្ជាក់ថា ក្រុមហ៊ុនកំពុងសាកល្បងគំនិតថ្មីមួយ ដោយប្រើប្រាស់ស្លឹកចេកដើម្បីវេចខ្ចប់បន្លែ ជំនួសឲ្យប្លាស្ទិក។
បើតាមតំណាងដដែលនេះ ក្រុមហ៊ុនក៏នឹងពង្រីកការអនុវត្តគំនិតនេះទៅកាន់គ្រប់ផ្សារទំនើបនៅទូទាំងប្រទេសតែម្តង។ នេះគឺជាផ្នែកមួយនៃគម្រោងបង្កើនការប្រើប្រាស់ផលិតផល ដែលល្អសម្រាប់បរិស្ថាន។ ការវេចខ្ចប់ដោយប្រើស្លឹកចេកនេះ មិនធ្វើឡើងតែសម្រាប់បន្លែ និងផ្លែឈើប៉ុណ្ណោះទេ ប៉ុន្តែក៏សម្រាប់សាច់ស្រស់ៗផងដែរ។
ប្រជាជននៅតំបន់នោះ បង្ហាញការគាំទ្រយ៉ាងខ្លាំងលើគំនិតដ៏ឈ្លាសវៃនេះ ហើយពេញចិត្តនឹងទិញផលិតផលដែលវេចខ្ចប់ដោយស្លឹកចេកនេះក្នុងបរិមាណច្រើន។ ពួកគេយល់ឃើញថា គំនិតផ្តួចផ្តើមនេះ នឹងជួយឲ្យប្រជាជនក្នុងតំបន់មានការប្រុងប្រយ័ត្នពីផលប៉ះពាល់របស់ប្លាស្ទិក និងរួមគ្នាការពារបរិស្ថាន។
បើតាមសារព័ត៌មាន Vietnam Express ក្រុមហ៊ុនដ៏ធំមួយឈ្មោះថា Saigon Co.op ដែលគ្រប់គ្រងហាងទំនិញជាច្រើនក្នុងទីក្រុងហូជីមិញ ក៏ចាប់ផ្តើមប្រើប្រាស់ស្លឹកចេកដើម្បីវេចខ្ចប់ផលិតផលតាមហាងទំនិញមួយចំនួនរបស់ខ្លួនផងដែរ។ ភាគច្រើននៃទីតាំងហាងទាំងនោះ ស្ថិតនៅតំបន់ភាគខាតកើតនៃទីក្រុងហូជីមិញ។
ក្រៅពីនេះ ឧស្សាហកម្មផ្សារទំនើបដ៏ធំមួយទៀតប្រចាំទីក្រុងហាណូយ ឈ្មោះថា The Big C ក៏អនុវត្តគំនិតផ្តួចផ្តើមនេះផងដែរ កាលពីថ្ងៃទី១ ខែមេសា ព្រមទាំងមានបំណងពង្រីកការអនុវត្តខ្លួននៅបណ្តាផ្សារទំនើបក្នុងតំបន់ភាគកណ្តាល និងភាគខាងកើតនាប៉ុន្មានឆាប់ៗខាងមុខ។
អ្វីដែលពិសេសនោះ ផ្សារទំនើបទាំងនោះ ក៏ផ្តល់នូវផលិតផលដែលល្អសម្រាប់បរិស្ថានផ្សេងៗទៀតផងដែរ ក្នុងនោះរួមមាន បំពង់បឺតក្រដាស និងប្រអប់អាហារធ្វើពីកាកអំពៅ។ ស៊ុតត្រូវបានវេចខ្ចប់ក្នុងប្រអប់ក្រដាស ជំនួសឲ្យប្លាស្ទិក។ ផ្សារទំនើបខ្លះ ក៏ចែកថង់ដាក់ទំនិញ ដែលត្រូវបានផលិតឡើងពីម្សៅពោតទៀតផង។
សូមបញ្ជាក់ថា ការអនុវត្តបែបនេះ ធ្វើឡើងក្រោយពីមានរបាយកាណ៍មួយបង្ហាញថា បរិមាណនៃសំណល់ប្លាស្ទិកយ៉ាងច្រើនសន្ធឹកសន្ធាប់ ត្រូវផលិតដោយប្រជាជនវៀតណាម។ ប្រទេសវៀតណាមបោះចោលសំរាមប្លាស្ទិកប្រមាណ ២៥០០តោនក្នុងមួយថ្ងៃ។ នេះបើយោងតាមតួលេខផ្លូវការរបស់រដ្ឋាភិបាល។
ម្យ៉ាងវិញទៀត វៀតណាមជាប់ចំណាត់ថ្នាក់លេខបួននៅទូទាំងសកលលោក ជាប្រទេសបោះចោលសំរាមប្លាស្ទិកច្រើនបំផុតចូលទៅក្នុងមហាសមុទ្រ។ នេះបើយោងតាមការឲ្យដឹងរបស់ភ្នាក់ងារទទួលបន្ទុកកម្មវិធីបរិស្ថានរបស់អង្គការសហប្រជាជាតិ (UNEP) ។ បច្ចុប្បន្ននេះ ភោជនីយដ្ឋាន និងហាងកាហ្វេមួយចំនួន បានលើកទឹកចិត្តឲ្យកាត់បន្ថយការប្រើប្រាស់ប្លាស្ទិក ដោយផ្តល់ឲ្យអតិថជននូវបំពង់បឺត ដែលអាចកែច្នៃឡើងវិញ ឬល្អសម្រាប់បរិស្ថាន៕
Tag:
វៀតណាម
ស្លឹកចេក
ប្លាស្ទិក
បរិស្ថាន
© រក្សាសិទ្ធិដោយ thmeythmey.com
