កំណាព្យ
ជាតិ
×
បុណ្យ ព្រះលោកថាអំពើល្អ បុណ្យ ទោះមានក្រក៏ធ្វើបាន
បុណ្យ កើតពីចិត្តយើងគ្រប់ប្រាណ បុណ្យ នាំឆ្ងាយឋានថោកអប្រិយ។
បុណ្យ បានបើយើងចេះខ្មាសបាប បុណ្យ មិនចេះសាបលើករាសី
បុណ្យ មិនបាច់បន់បារមី បុណ្យ គឺអ្វីៗយើងអ្នកសាង។
បុណ្យ កើតពីចិត្តដែលស្មោះស បុណ្យ ព្រោះចិត្តល្អជួយអ្នកខាង
បុណ្យ ជួយសង្គមនាំសំណាង បុណ្យ ជួយអ្នកសាងផុតហ្មងសៅ។
បុណ្យ សាងស្ពានថ្នល់ផ្តល់សាលា បុណ្យ តាមសាសនាជួយប្រដៅ
បុណ្យ ជួយបង្រៀនដល់អ្នកខ្លៅ បុណ្យ នេះព្រះហៅ ធម្មទាន។
បុណ្យ មួយព្រះឲ្យធ្វើខែភ្លឺ បុណ្យ ត្រចៀកឮមាត់នៅឃ្លាន
បុណ្យ ជួយម៉ែឪមិនបំពាន បុណ្យ នេះផលមានហុចហាក់ស្តែង។
បុណ្យ កើតពីការចេះរំលែក បុណ្យ ឃើញនឹងភ្នែកច្បាស់មិនក្លែង
បុណ្យ អាចធ្វើបានគ្រប់កន្លែង បុណ្យ ព្រះសម្តែងតែងឈ្នះបាប៕
Tag:
ជាតិ កំណាព្យ ប៉ាកកាខ្មៅ
© រក្សាសិទ្ធិដោយ thmeythmey.com