ចិន បញ្ចុះថ្លៃចំណាយលើគម្រោងផ្លូវដែកជាមួយថៃ ១០០លានដុល្លារ

អន្តរជាតិ

ចិន បញ្ចុះថ្លៃចំណាយលើគម្រោងផ្លូវដែកជាមួយថៃ ១០០លានដុល្លារ

01, May 2019 , 8:19 pm

រូបភាព

ដោយ:

រដ្ឋាភិបាលថៃ ទទួលជោគជ័យក្នុងការចរចាបញ្ចុះតម្លៃចំនួន ៣,២ពាន់លានបាត ឬស្មើនឹងជាង១០០លានដុល្លារ លើគម្រោងផ្លូវដែកល្បឿនលឿនរវាងចិន និងថៃ ដែលតភ្ជាប់រដ្ឋធានីបាងកក និងខេត្តនគររាជសីមា។ ស្ថិតក្នុងដំណាក់កាលទីមួយនៃការសាងសង់ផ្លូវដែកប្រវែង៦០៧គីឡូម៉ែត្រ ថៃ នឹងបន្តសាងសង់ពីខេត្តនគររាជសីមាទៅកាន់ខេត្ត ណងខៃ ភាគឦសាននៃប្រទេសថៃ ដើម្បីតភ្ជាប់ទៅកាន់ទីក្រុងគន់មិញ ខេត្តយូណាន ភាគនិរតីនៃប្រទេសចិន ដោយកាត់តាមឡាវ។

ការបញ្ចុះតម្លៃនេះ ត្រូវបានយល់ស្របអំឡុងកិច្ចពិភាក្សានៅវេទិកាខ្សែក្រវាត់ និងវិថីលើកទីពីរ នារដ្ឋធានីប៉េកាំង ប្រទេសចិន កាលពីសប្តាហ៍មុន។ នេះបើតាមការបញ្ជាក់ឲ្យដឹងពីរដ្ឋមន្ត្រីក្រសួងដឹកជញ្ជូនថៃ លោក Arkhom Termpittayapaisith នៅថ្ងៃទី៣០ មេសា ដោយបន្ថែមថា ភាគីថៃ និងចិន យល់ព្រមតួលេខចុងក្រោយ ៥០,៦ពាន់លានបាត ឬស្មើនឹងជាង ១,៥៨ពាន់លានដុល្លារសម្រាប់ផ្នែកទីមួយនៃគម្រោងនេះ។

តាមការចុះផ្សាយរបស់កាសែតបាងកកប៉ុស្តិ៍ «កិច្ចសន្យា 2.3» រវាងចិន និងថៃ សំដៅលើកិច្ចព្រមព្រៀងចំនួន១៤ ដែលរាប់បញ្ចូល ការចំណាយលើការសាងសង់ផ្លូវដែក ទិញប្រព័ន្ធអគ្គិសនី គ្រឿងម៉ាស៊ីន និងទូរថភ្លើង ក៏ដូចជា ការហ្វឹកហាត់បុគ្គលិកផងដែរ។ លាតសន្ធឹងចម្ងាយប្រមាណ២៥២គីឡូម៉ែត្រ ការសាងសង់ផ្លូវពីទីក្រុងបាងកក ទៅកាន់ខេត្តនគររាជសីមានេះ ត្រូវការទុនវិនិយោគសរុបដល់ទៅជាង ១៧៩ ពាន់លានបាត ឬស្មើនឹង ៥,៥៩ពាន់លានដុល្លារ។

យោងតាមរបាយការណ៍ពីក្រសួងហិរញ្ញវត្ថុថៃ ៨០ ភាគរយនៃកម្ចីទាំងនេះ ត្រូវបានធ្វើឡើងក្នុងទម្រង់ជាលុយបាត ខណៈចិនគ្រាន់តែផ្តល់ការហ្វឹកហាត់ផ្នែកបច្ចេកទេសសម្រាប់បុគ្គលិក ដែលនឹងបើកប្រតិបត្តិការប្រព័ន្ធផ្លូវដែកល្បឿនលឿននេះប៉ុណ្ណោះ។ ការសាងសង់សម្រាប់ដំណាក់កាលនេះ សម្រេចរួចរាល់ប្រមាណ៥០ភាគរយហើយ ដោយចាប់ផ្តើមកាលពីចុងឆ្នាំ២០១៧មក។

អត្ថបទទាក់ទង

ថៃ ហាក់ប្រយ័ត្នប្រយែងនឹងកម្ចីចិនព្រោះខ្លាចធ្លាក់ចូលក្នុង«អន្ទាក់បំណុល»?

តាមកាសែតបាងកកប៉ុស្តិ៍ លោករដ្ឋមន្ត្រី Arkhom បានបញ្ជាក់ថា ថៃ គ្រោងស្នើកម្ចីចំនួន ៣៨,២ពាន់លានបាតពីចិន ដែលស្មើនឹង ៨៥ភាគរយនៃការចំណាយវិនិយោគក្នុងកិច្ចសន្យា 2.3 ។ របាយការណ៍មួយចំនួន ចុះផ្សាយថា ចិនរៀបចំផ្តល់កម្ចីជាមួយអត្រាការប្រាក់ ៣ភាគរយ។

សូមបញ្ជាក់ថា បច្ចុប្បន្ននេះ ប្រទេសថៃ កំពុងសាងសង់ផ្លូវប្រវែង ៦០៧គីឡូម៉ែត្រ ដែលតភ្ជាប់ពីរាជធានី បាងកក ទៅកាន់ខេត្តណងខៃ ភាគឦសាននៃប្រទេសថៃ និងស្ថិតតាមបណ្តោយទន្លេមេគង្គ។ បន្តពីដំណាក់កាលទីមួយពីរដ្ឋធានីបាងកកទៅកាន់ខេត្តនគររាជសីមា ដំណាក់កាលទីពីរនៃផ្លូវដែកដ៏វែងនេះវិញ ត្រូវបានប៉ាន់ស្មានថានឹងចំណាយអស់ ២១១ ពាន់លានបាត ឬស្មើនឹង ៦,៥៩ ពាន់លានដុល្លារ។ វាមានប្រវែង ៣៥៥គីឡូម៉ែត្រ។

លាតសន្ធឹងពីខេត្តនគររាជសីមា ទៅកាន់ ខេត្តណងខៃ ផ្លូវនេះ រំពឹងនឹងត្រូវផ្គត់ផ្គង់លុយប្រមាណ ៨៥ភាគរយពីកម្ចីអន្តរជាតិ និងគ្រោងដាក់ឲ្យប្រើប្រាស់ នាឆ្នាំ២០២៣។ វានឹងបូកសរុបខ្ទង់ចំណាយលើផ្លូវដែកល្បឿនលឿនរបស់ថៃ ដល់ចំនួន ៣៩០ពាន់លានបាត ឬស្មើនឹងជាង ១២,១៨ពាន់លានដុល្លារ៕