អន្តរជាតិ
វៀតណាម ទទូចឲ្យឥណ្ឌូណេស៊ីដោះលែងជនជាតិខ្លួន១២នាក់ជាបន្ទាន់ រូបភាព AFP
× ក្រសួងការបរទេសវៀតណាម នៅថ្ងៃទី១ ខែឧសភា បានផ្ញើកំណត់ទូតមួយច្បាប់ទៅកាន់ស្ថានទូតឥណ្ឌូណេស៊ី ជុំវិញការប្រើប្រាស់កម្លាំងពីសំណាក់យោធាឥណ្ឌូណេស៊ីទៅលើអ្នកនេសាទវៀតណាមកាលពីសប្ដាហ៍មុន។ ក្នុងហេតុការណ៍នោះ ជនជាតិវៀតណាមចំនួន១២នាក់ ត្រូវបានឥណ្ឌូណេស៊ីចាប់ខ្លួន ហើយទូកនេសាទវៀតណាមមួយគ្រឿងបានលិច។ ក្រុងហាណូយបានទទូចឲ្យក្រុងហ្សាការតាដោះលែងជនជាតិខ្លួនជាបន្ទាន់។
ហេតុការណ៍ប៉ះទង្គិចរវាងទូកនេសាទវៀតណាម និងទូកល្បាតយោធាជើងទឹកឥណ្ឌូណេស៊ី កើតឡើងនៅថ្ងៃទី២៧ ខែមេសា ក្នុងដែនទឹកដែលភាគីទាំងពីរអះអាងថា ជាកម្មសិទ្ធិរៀងៗខ្លួន។ ក្នុងកំណត់ទូតផ្ញើទៅកាន់ស្ថានទូតឥណ្ឌូណេស៊ីប្រចាំរដ្ឋធានីហាណូយ ក្រសួងការបរទេសវៀតណាមអះអាងថា អ្នកនេសាទរបស់ខ្លួនចំនួន១៤នាក់ កំពុងប្រកបរបរក្នុងដែនទឹកវៀតណាម មុននឹងនាវាល្បាតឥណ្ឌូណេស៊ីចាប់ឃាត់ ហើយអូសសណ្ដោងពីក្រោយ។
សកម្មភាពរបស់កងល្បាតឥណ្ឌូណេស៊ី ធ្វើឲ្យទូកវៀតណាមលិច។ នេះជាការលើកឡើងរបស់ក្រសួងការបរទេសវៀតណាមមុននឹងបន្តថា កងឆ្មាំសមុទ្រវៀតណាមដែលកំពុងធ្វើប្រតិបត្តិការក្បែរនោះ បានអន្តរាគមន៍ និងជួយសង្គ្រោះអ្នកនេសាទពីរនាក់ ឯ១២នាក់ទៀត ត្រូវបានឆ្មាំឥណ្ឌូណេស៊ីនាំចូលដែនទឹករបស់ខ្លួន។ ទីក្រុងហាណូយ បានបង្ហាញក្ដីបារម្ភជាខ្លាំងចំពោះទង្វើហិង្សារបស់កងឆ្មាំការពាររបស់ឥណ្ឌូណេស៊ី។
បើតាមលិខិតដែលផ្សាយដោយគេហទំព័រព័ត៌មាន VN Express ក្រសួងការបរទេសវៀតណាមរិះគន់ឥណ្ឌូណេស៊ីដោយប្រើពាក្យធ្ងន់ៗជាច្រើន។ វៀតណាមបានចោទឥណ្ឌូណេស៊ីដែលត្រូវបានចាត់ទុកបងធំអាស៊ានថា បំពានអធិបតេយ្យរបស់ខ្លួន និងធ្វើសកម្មភាពផ្ទុយពីច្បាប់អន្តរជាតិ មិនស្របតាមចំណងមិត្តភាពប្រពៃណី និងទំនាក់ទំនងយុទ្ធសាស្ត្រទ្វេភាគី ព្រមទាំងមិនស្របតាមសាមគ្គីភាពរបស់អាស៊ានទៀតផង។
ទន្ទឹមនឹងពាក្យរិះគន់ខ្លាំង ក្រុងហាណូយបានប្រាប់ឲ្យក្រុងហ្សាការតាគោរពឲ្យខ្ជាប់ខ្ជួនអនុញ្ញាអង្គការសហប្រជាជាតិស្ដីពីច្បាប់សមុទ្រឆ្នាំ១៩៨២ ដែលប្រទេសទាំងពីរជាសមាជិកដូចគ្នា។ អ្វីដែលសំខាន់នោះ កំណត់ទូតរបស់ក្រសួងការបរទេសវៀតណាមស្នើឲ្យរដ្ឋាភិបាលឥណ្ឌូណេស៊ីចេញបញ្ជាឲ្យកងទ័ពខ្លួនឈប់ធ្វើសកម្មភាពដូចហេតុការណ៍ថ្ងៃទី២៧ មេសា, ត្រូវដោះលែងអ្នកនេសាទវៀតណាមជាបន្ទាន់, សងការខូចខាតសម្រាប់អ្នកនេសាទវៀតណាមដែលបានបាត់បង់ទូកផង។
នេះជាលើកទីពីរដែលវៀតណាមផ្ញើកំណត់ទូតទៅកាន់ឥណ្ឌូណេស៊ី ក្រោយលិខិតលើកទីមួយគ្មានការឆ្លើយតបអ្វីពីក្រុងហ្សាការតា។ កាលពីឆ្នាំ២០១៨ ឥណ្ឌូណេស៊ី បានកម្ទេចទូកនេសាទវៀតណាមដល់ទៅ៨៦ទូក ដោយចោទថា នេសាទក្នុងដែនទឹករបស់ខ្លួន។ វៀតណាមឯណេះ ក៏មិននៅស្ងៀមដែរ ដោយតែងប្រាប់ឲ្យឥណ្ឌូណេស៊ីបន្ធូរដៃបន្តិច ចៀសវាងប៉ះពាល់ទំនាក់ទំនងទ្វេភាគី៕
© រក្សាសិទ្ធិដោយ thmeythmey.com