អន្តរជាតិ
រូបថត លោក James Cameron នៅពេលដឹកនាំរឿង Titanic (ប្រភពរូប៖ Pramount Picture)
×![]()
លោក James Cameron ដែលជាអ្នកដឹកនាំរឿង Avatar និង Titanic បានចេញសារអបអរសាទរចំពោះភាពជោគជ័យរបស់ភាពយន្ត Avengers: Endgame របស់ផលិតកម្ម Marvel Studio ។ ការសរសើរបែបនេះ បានធ្វើឡើងប៉ុន្មានថ្ងៃប៉ុណ្ណោះ ក្រោយពីរឿង Endgame បានដណ្តើមតំណែងរឿង Titanic របស់លោក និងក្លាយជារឿងរកចំណូលច្រើនបំផុតលំដាប់ទី២។
២សប្តាហ៍ក្រោយផ្តើមចាក់បញ្ចាំងនៅតាមរោងកុននៅទូទាំងពិភពលោក ភាពយន្តរបស់ចក្រវាល Marvel ដែលដឹកនាំរឿងដោយផលិតករបងប្អូន The Russo Brothers ក្រោមចំណងជើងថា Avengers: Endgame បានផ្តួលរឿង Titanic ក្លាយជាភាពយន្តរកចំណូលច្រើនបំផុតលំដាប់ទី២។ បើតាមអ្នកជំនាញក្នុងវិស័យភាពយន្ត Hollywood ភាពយន្តនេះ ក៏ត្រៀមឈោងចាប់តំណែងកំពូលលេខមួយផងដែរ។
រឿង Titanic ដែលបានចាក់បញ្ចាំងកាលពីឆ្នាំ១៩៩៧នោះ រកចំណូលបាន២,១៨ពាន់លានដុល្លារពីការលក់សំបុត្រនៅទូទាំងពិភពលោក។ ហើយវាបានគ្រងតំណែងនេះអស់ជាច្រើនឆ្នាំមកហើយ បន្ទាប់ពី Avatar។ ប៉ុន្តែទើបតែមកដល់ដើមសប្តាហ៍នេះ រឿង Avengers: Endgame បានរកចំណូលលើសរឿង Titanic ជាមួយចំណូល២,២៧ពាន់លានដុល្លារ (គិតត្រឹមថ្ងៃ៩ ខែឧសភា)។
រូបថត លោក James Cameron នៅពេលដឹកនាំរឿង Avatar (ប្រភពរូប៖ Pramount Picture)
ទោះបីជាបែបនេះក្តី ភាពយន្តដែលរកចំណូលខ្ពស់ជាងគេបំផុតនោះគឺនៅតែភាពយន្ត Avatar ។ ភាពយន្តបែបប្រឌិតបែបវិទ្យាសាស្ត្រនេះ បានចាក់បញ្ចាំងកាលពីឆ្នាំ ២០០៩ ដោយរកចំណូលបាន ២,៧៨ពាន់លានដុល្លារនៅទូទាំងពិភពលោក។ ទាំងរឿង Titanic និង Avatar សុទ្ធតែជាស្នាដៃដឹកនាំរបស់លោក James Cameron ។
លើបណ្តាញសង្គម Twitter កាលពីថ្ងៃទី៩ ខែឧសភា លោក Cameron សរសេរបែបនេះថា៖« ផ្ទាំងទឹកកកក្រោមសមុទ្រ (Iceberg) មួយដុំបានពន្លិចនាវា Titanic ។ តែឥឡូវនេះ ភាពយន្ត Avengers បានពន្លិចភាពយន្ត Titanic ខ្ញុំ»។ បន្ថែមពីសំណេរបែបនេះ អ្នកដឹកនាំរឿងដ៏ល្បីល្បាញរូបនេះ ក៏បានបង្ហោះរូបភាពដ៏មានអត្ថន័យមួយ ដែលបង្ហាញពី រូបតំណាងក្រុម Avengers បុកនាវា Titanic ផងដែរ។
— James Cameron (@JimCameron) May 9, 2019
សូមបញ្ជាក់ថា បច្ចុប្បន្ននេះ គេនៅរង់ចាំមើលថា តើវគ្គ Endgame របស់ផលិតកម្ម Marvel អាចដណ្តើមតំណែងពី Avatar និងឡើងគ្រងជាភាពយន្តដែលរកចំណូលច្រើនបំផុតបានឬយ៉ាងណានោះ? កាលពីថ្មីៗនេះ អ្នកជំនាញក្នុងវិស័យភាពយន្តរំពឹងថា ភាពយន្តដែលដកស្រង់ចេញពីសៀវភៅរូបត្លុកប្រភេទវីរបុរសនេះ នឹងអាចរកចំណូលដល់ ៣ពាន់លានដុល្លារ ដោយការលក់សំបុត្រនៅទូទាំងសកលលោក៕
Tag:
James Cameron
Avengers:Endgame
Titanic
Avatar
© រក្សាសិទ្ធិដោយ thmeythmey.com
