អន្តរជាតិ
ឥណ្ឌូណេស៊ី៖ ស្លាប់៦នាក់ និងរបួស២០០នាក់ ក្នុងបាតុកម្មតវ៉ាលទ្ធផលបោះឆ្នោតប្រធានាធិបតី ប្រភពរូប៖ AFP
× មនុស្ស៦នាក់បានស្លាប់ និងជាង២០០នាក់ផ្សេងទៀតរងរបួស ក្រោយពីផ្ទុះហេតុការណ៍ប៉ះទង្គិចគ្នារវាងកងសន្តិសុខ និងអ្នកធ្វើបាតកម្ម នៅរដ្ឋធានីហ្សាការតា។ ការធ្វើបាតកម្មនេះ ធ្វើឡើងក្រោយពីលទ្ធផលបោះឆ្នោតជាផ្លូវការនៅឥណ្ឌូណេស៊ី បង្ហាញថា លោក ចូកូ វីដូដូ នៅតែរក្សាតំណែងជាប្រធានាធិបតីសម្រាប់អាណត្តិទីពីរដដែល។
ថ្លែងប្រាប់កាសែតក្នុងស្រុក អ្នកនាំពាក្យប៉ូលីសជាតិឥណ្ឌូណេស៊ី Dedi Prasetyo បញ្ជាក់ឲ្យដឹងថា បាតុកម្មជាច្រើនទីតាំង ដែលបានធ្វើឡើងដោយក្រុមអ្នកគាំទ្របេក្ខភាពប្រធានាធិបតីចាញ់ឆ្នោត បានប្រែក្លាយជាហិង្សា កាលពីយប់ថ្ងៃអង្គារទី ២១ ឧសភា និងបានអូសបន្លាយពេញមួយយប់។ ក្នុងហេតុការណ៍នេះ សមត្ថកិច្ចឥណ្ឌូនេស៊ី បានឃាត់ខ្លួនបាតុករចំនួន ២០នាក់។
លោកអភិបាលក្រុងហ្សាការតា Anies Baswedan លើកឡើងថា មនុស្ស ៦នាក់ បានបាត់បង់ជីវិត និង២០០នាក់ផ្សេងទៀត រងរបួស ក្នុងអំពើហិង្សានេះ។ ទន្ទឹមនឹងគ្នានេះដែរ មន្ត្រីរូបនេះ បាននិយាយថា ខាងមន្ទីរពេទ្យ កំពុងពិនិត្យរកមូលហេតុនៃការស្លាប់។
តាមរយៈទូរទស្សន៍ក្នុងស្រុកឥណ្ឌូណេស៊ី Kompas TV ក្រុមអ្នកបាតុករ បានចោទដុំថ្ម និងដុតកម្ទេចរថយន្តរបស់សមត្ថកិច្ច។ បុរសម្នាក់ត្រូវបានរាយការណ៍ថា ស្លាប់ភ្លាមៗ ក្រោយត្រូវរបួសចំដៃដោយសារគ្រាប់កាំភ្លើង។
យ៉ាងណាមិញ មន្ត្រីអ្នកនាំពាក្យប៉ូលីសជាតិឥណ្ឌូណេស៊ី បានអះអាងថា កងកម្លាំងរក្សាសន្តិសុខ ពុំបានប្រើប្រាស់គ្រាប់កាំភ្លើងពិតក្នុងបេសកម្មបង្គ្រាបបាតុកម្មនេះឡើយ។ លោកបកស្រាយថា កងកម្លាំងសន្តិសុខ បានប្រើប្រាស់ឧស្ម័នបង្ហូរទឹកភ្នែក និងកាំភ្លើងបាញ់ទឹកទៅលើក្រុមបាតុករដែលបានគប់ដុំថ្មមកលើពួកគេ។
សូមបញ្ជាក់ថា បាតុកម្មនៅទីក្រុងហ្សាការតានេះ បានផ្ទុះឡើង ក្រោយពីលទ្ធផលបោះឆ្នោតជ្រើសរើសប្រធានាធិបតីឥណ្ឌូណេស៊ីជាផ្លូវការ បានបង្ហាញថា ប្រធានាធិបតីឥណ្ឌូនេស៊ី លោក ចូកូ វីដូដូ ជាប់ឆ្នោតបន្តអាណត្តិទីពីរ ៥ឆ្នាំទៀត ជាមួយសំឡេងគាំទ្រ ៥៥,៥ភាគរយ។ យ៉ាងណាមិញ គូប្រជែងរបស់លោក ចូកូវី លោក ប្រាបូវ៉ូ សូប៊ីយ៉ាន់តូ បានបដិសេធលទ្ធផលបោះឆ្នោតនេះ ដោយចោទប្រកាន់ថា ការបោះឆ្នោត ហ៊ុមព័ទ្ធដោយការកិបកេងសន្លឹកឆ្នោត៕
Tag:
ឥណ្ឌូណេស៊ី
បាតុកម្ម
បោះឆ្នោត
© រក្សាសិទ្ធិដោយ thmeythmey.com