ជាតិ
សង្គមជាតិ
សមត្ថកិច្ចឃាត់ខ្លួនជនជាតិចិនម្នាក់ទៀត ពាក់ព័ន្ធនឹងលុយគ្មានប្រភពច្បាស់លាស់ជិត១លានដុល្លារ
× ភ្នំពេញ៖ ជនជាតិចិនម្នាក់ទៀត ត្រូវបានសមត្ថកិច្ចឃាត់ខ្លួន ពាក់ព័ន្ធនឹងលុយគ្មានប្រភពច្បាស់លាស់ជិត១លានដុល្លារ នៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៩ ឧសភា។
លោក កែវ វណ្ណថន អគ្គនាយករងអន្តោប្រវេសន៍នៃក្រសួងមហាផ្ទៃ បានប្រាប់សារព័ត៌មានថ្មីៗថា ការឈានទៅឃាត់ខ្លួនជនជាតិចិននេះ ដោយសារសមត្ថកិច្ចសង្ស័យថាប្រាក់ទាំងនោះ ជាលុយកខ្វក់ សម្រាប់យកមកចរាចរណ៍ប្រើប្រាស់(លាងសម្អាតប្រាក់)នៅកម្ពុជា។ ដោយសារសង្ស័យបែបនេះ ទើបសមត្ថកិច្ចឃាត់ខ្លួនជនជាតិរូបនោះ ដោយដកហូតបានប្រាក់ ៨៨៥,០០០ ដុល្លារ។
តាមរយៈចម្លើយសារភាពប្រាប់សមត្ថកិច្ច ជនសង្ស័យឈ្មោះ LIAO JINGQING នេះ បានរៀបរាប់ថា ប្រាក់ទាំងនេះ គឺរូបគេយកមកពីទីក្រុងហុងកុង នៃប្រទេសចិន ដើម្បីបោះទុនវិនិយោគលើផ្នែកដេគ័រ នៅក្នុងខេត្តព្រះសីហនុ។ ប៉ុន្តែចម្លើយរបស់ជនសង្ស័យនេះ ហាក់មិនដូចការស៊ើបអង្កេតរបស់សមត្ថកិច្ចឡើយ។ នេះជាការបញ្ជាក់របស់លោក កែវ វណ្ណថន។
អគ្គនាយករងអន្តោប្រវេសន៍នៃក្រសួងមហាផ្ទៃរូបនេះ បានបញ្ជាក់ដូច្នេះថា៖«គាត់(ជនសង្ស័យ) ឆ្លើយមិនច្បាស់សោះ គាត់ថា លុយនោះយកមកពីហុងកុង ប៉ុន្តែសមត្ថកិច្ចស្រាវជ្រាវទៅ មិនដូចចម្លើយគាត់។ លុយគាត់នេះ វាគ្មានប្រភពច្បាស់លាស់ទេ។ ហើយឥឡូវសមត្ថកិច្ចកំពុងឃាត់ខ្លួនគាត់ ដើម្បីសាកសួរចម្លើយបន្ថែម»។
បើតាមលោក កែវ វណ្ណថន ប្រាក់ជិត១លានដុល្លារនេះ ត្រូវបានសមត្ថកិច្ចបង្កកទុកសិន ដើម្បីស្រាវជ្រាវប្រភពច្បាស់លាស់។ ហើយបើគ្មានប្រភពត្រឹមត្រូវទេ ករណីប្រាក់ទាំងនេះ នឹងបញ្ជូនទៅតុលាការដើម្បីចាត់ការតាមនីតិវិធី។
កាលពីថ្ងៃទី២៣ មេសា កន្លងមក សមត្ថកិច្ច ក៏បានឃាត់ខ្លួនជនជាតិចិន៣នាក់ ដោយដកហូតប្រាក់៣,៥ លានដុល្លារ ដែលគ្មានប្រភពច្បាស់លាស់ផងដែរ។ ប្រាក់ទាំងនោះ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ ទៅតម្កល់ទុកនៅធនាគារជាតិកម្ពុជាជាបណ្ណោះអាសន្នសិន ដើម្បីធ្វើជាវត្ថុតាងក្នុងសំណុំរឿងនេះ៕
Tag:
មហាផ្ទៃ
អន្តោប្រវេសន៍
ចិន
សម្អាតប្រាក់
© រក្សាសិទ្ធិដោយ thmeythmey.com