អង្គការសេរីនិយមអន្តរជាតិ (Liberal International) បានអនុម័តលើសេចក្តីសម្រេចមួយ ពាក់ព័ន្ធនឹងដំណោះស្រាយនយោបាយនៅកម្ពុជា ដែលដាក់ជូនដោយអតីតគណបក្សសង្គ្រោះជាតិ។ ក្នុងសេចក្តីសម្រេច អង្គការសេរីនិយមអន្តរជាតិ ប្រកាសគាំទ្រនិងស្នើឲ្យសមាជិកខ្លួន រួមដំណើរជាមួយលោក សម រង្ស៊ី មកកម្ពុជា។
សេចក្តីសម្រេចនេះ ធ្វើឡើងថ្ងៃទី៦ ខែកក្កដា ឆ្នាំ២០១៩ ក្រោយពីបញ្ចប់កិច្ចប្រជុំគណៈកម្មាធិការប្រតិបត្តិនៃអង្គការសេរីនិយមអន្តរជាតិ នៅទីក្រុងឡុងដ៍ ដោយមានការចូលរួមពីរដ្ឋមន្ត្រី និងតំណាងរាស្ត្រនៃបណ្តាប្រទេសនានា ហើយលោក សម រង្ស៊ី ក៏មានវត្តមានផងដែរ។ អតីតគណបក្សសង្គ្រោះជាតិ គឺជាសមាជិកមួយនៃអង្គការអន្តរជាតិនេះ។
អង្គការសេរីនិយមអន្តរជាតិ យល់ឃើញថា ការធ្វើមាតុភូមិនិវិត្តរបស់ក្រុមប្រឆាំង គឺដើម្បីរកដំណោះស្រាយ ឲ្យមានការដោះលែងលោក កឹម សុខា និងឈានទៅស្តារលទ្ធិប្រជាធិបតេយ្យនៅកម្ពុជាឡើងវិញ។ អង្គការនេះ គិតថា ការដែលស្នើឲ្យសមាជិកខ្លួន រួមដំណើរមកជាមួយក្រុមប្រឆាំង «គឺដើម្បីធានាសុវត្ថិភាព»។
លោក សម រង្ស៊ី បានសរសេរលើទំព័រហ្វេសប៊ុករបស់លោកដូច្នេះថា៖«មានឥស្សរជនបរទេសជាច្រើន ដែលស្ម័គ្រចិត្តធ្វើដំណើរទៅប្រទេសកម្ពុជាជាមួយខ្ញុំ ក្នុងពេលឆាប់ៗខាងមុខនេះ»។
តាមរយៈសេចក្តីសម្រេច អង្គការសេរីនិយមអន្តរជាតិ បានអំពាវនាវឲ្យតុលាការកម្ពុជា ទម្លាក់បទចោទចេញពីលោក កឹម សុខា និងអ្នកនយោបាយប្រឆាំងដទៃទៀត ដោយរួមទាំងលោក សម រង្ស៊ី ផងដែរ។
មួយរយៈចុងក្រោយនេះ គេ ហាក់សង្កេតឃើញថា លោក សម រង្ស៊ី ព្យាយាមដើរបំផុសបំផុលមិត្តបរទេស ឲ្យមកកម្ពុជាជាមួយលោក។ ជាក់ស្តែង ថ្មីៗនេះ លោក បានធ្វើដំណើរទៅជួបសមាជិកសភាសហភាពអឺរ៉ុប។
បន្ទាប់មក អ្នកស្រី មូរ សុខហួរ ដែលបានធ្វើដំណើរទៅជាមួយដែរនោះ បានបង្ហោះលើបណ្តាញសង្គមថា មានសមាជិកសភាសហភាពអឺរ៉ុបមួយចំនួន បានបង្ហាញជំហរមកកម្ពុជាជាមួយលោក សម រង្ស៊ី។ អ្នកស្រី ប្រកាសកន្លងមកថា ថ្នាក់ដឹកនាំប្រឆាំង នឹងមកកម្ពុជា នៅខែសីហា ឬខែកញ្ញា ឆ្នាំ២០១៩។
សម្តេចនាយករដ្ឋមន្ត្រី ហ៊ុន សែន បានព្រមានជាថ្មីថា នឹងវាយខ្នោះលោក សម រង្ស៊ី យកទៅដាក់ពន្ធនាគារ ពេលលោក មកដល់កម្ពុជា។ ការព្រមានជាថ្មីនេះ គឺធ្វើឡើងពេលសម្តេច ជួបសំណេះសំណាលជាមួយប្រជាពលរដ្ឋកម្ពុជាក្នុងទីក្រុងហ្សឺណែវ ប្រទេសស្វីស កាលពីថ្ងៃទី៥ ខែកក្កដា ឆ្នាំ២០១៩។
ទន្ទឹមនឹងនេះ ប្រមុខរដ្ឋាភិបាល ក៏បានផ្ញើសារជូនសមាជិកសភាសហភាពអឺរ៉ុបផងដែរ ដែលស្តាប់ទៅហាក់ដូចជាចង់ព្រមានពួកគេ តាមរយៈការរម្លឹករឿងកម្ពុជា ធ្លាប់កាត់ទោសតំណាងរាស្ត្រថៃ។ ប្រមុខរដ្ឋាភិបាល ដាស់តឿនសមាជិកសភាសហភាពអឺរ៉ុបទាំងនោះថា៖«អ្នកឯងត្រូវសុំវីសាសិន មុននឹងមកកម្ពុជា។ បើខ្ញុំមិនឲ្យ អ្នកឯង ចូលសាកលមើល៍ទៅ...។ តំណាងរាស្ត្រថៃ ចូលកម្ពុជា កម្ពុជា កាត់ទោសតំណាងរាស្ត្រថៃ សុំចាំឲ្យច្បាស់»។
យ៉ាងណាក៏ដោយ សមាជិកសភាសហភាពអឺរ៉ុបទាំងនោះ ប្រហែលជាគ្មានឱកាសទទួលបានវីសាមកកម្ពុជានោះទេ ដ្បិតប្រមុខរដ្ឋាភិបាលកម្ពុជា បានបញ្ជាទៅទូតកម្ពុជាប្រចាំនៅប្រទេសនានារួចហើយ ថាកុំផ្តល់វីសាដល់ពួកគេ។
ក្រោយការថ្លែងរបស់នាយករដ្ឋមន្ត្រី ក្រសួងការបរទេសកម្ពុជា ក៏ចេញសេចក្តីថ្លែងការណ៍មួយ ដោយបង្ហាញការភ្ញាក់ផ្អើល ចំពោះបំណងរបស់សមាជិកសភាសហភាពអឺរ៉ុប ដែលចង់មកកម្ពុជាជាមួយក្រុមអ្នកប្រឆាំង។ ក្រសួងការបទេស ចាត់ទុកថាជាទង្វើគ្មានលក្ខណៈការទូត មិនគោរពអធិបតេយ្យភាព និងនីតិរដ្ឋកម្ពុជា បើសមាជិកសភាសហភាពអឺរ៉ុបទាំងនោះ ពិតជាសម្រេចមកម្ពុជាមែន។ ក្រសួងការបរទេស ស្នើសមាជិកសភាសហភាពអឺរ៉ុប ពិចារណាឡើងវិញពីការសម្រេចចិត្តបែបនេះ៕