អន្តរជាតិ
តៃវ៉ាន់ ពិចារណាផ្ដល់សិទ្ធិជ្រកកោនដល់បាតុករហុងកុងដែលរត់គេចពីការចាប់ខ្លួន ប្រធានាធិបតីតៃវ៉ាន់ Tsai Ing-wen ។ រូបភាព AFP
× ប្រធានាធិបតីតៃវ៉ាន់ Tsai Ing-wen នៅថ្ងៃទី១៨ ខែកក្កដា បានទទួលស្គាល់វត្តមានរបស់ពលរដ្ឋហុងកុងនៅតៃវ៉ាន់ដែលរត់គេចពីការចាប់ខ្លួនជុំវិញការធ្វើបាតុកម្មនៅតំបន់រដ្ឋបាលពិសេសមួយនេះ។ នេះជាលើកដំបូងដែលប្រធានាធិបតីតៃវ៉ាន់ បញ្ជាក់ពីព័ត៌មាននៃការភៀសខ្លួនរបស់បាតុករហុងកុងមកកាន់ដែនកោះនេះ។ លោកស្រី Tsai អះអាងថា តៃវ៉ាន់ នឹងពិចារណាផ្ដល់សិទ្ធិជ្រកកោនដល់ពួកគេក្រោមហេតុផលមនុស្សធម៌។
តៃវ៉ាន់ បានក្លាយជាគោលដៅសម្រាប់ការជ្រកកោនរបស់បាតុករហុងកុងដែលរត់គេចពីការចាប់ខ្លួនដោយសារការធ្វើបាតុកម្មនាពេលថ្មីៗនេះ។ បើតាមការរាយការណ៍ជាច្រើន បាតុករហុងកុងដែលចូលរួមក្នុងការចូលលុកលុយអគារសភាទីក្រុងនេះនាពេលកន្លងមកនោះ បានទៅដល់ទឹកដីតៃវ៉ាន់ហើយ ឯខ្លះទៀតកំពុងរៀបចំផែនការគេចខ្លួនផងដែរ។ ក្រុមដែលរត់គេចនេះ ប្រឈមមុខការជាប់ទោស៥ឆ្នាំ បើរកឃើញកំហុស។
ប្រធានាធិបតីតៃវ៉ាន់ Tsai Ing-wen និយាយថា ពិតជាមានបាតុករហុងកុងរត់ភៀសខ្លួនទៅតៃវ៉ាន់មែន។ ពីទឹកដី Saint Lucia លោកស្រី Tsai ជឿថា ស្ថាប័ននានារបស់តៃវ៉ាន់បានដឹងពីស្ថានការណ៍នេះ ហើយមិត្តភក្តិមកពីហុងកុង នឹងទទួលបានការរាប់រកក្រោមមូលហេតុមនុស្សធម៌។ នេះបើតាមការផ្សាយរបស់កាសែតហុងកុង South China Morning Post នៅថ្ងៃទី១៩ ខែកក្កដា ដែលស្រង់ប្រភពពីទីភ្នាក់ងារព័ត៌មានកណ្ដាលតៃវ៉ាន់។
សូមរំឭកថា បាតុកម្មនៅហុងកុងពាក់ព័ន្ធសំណើច្បាប់ធ្វើបត្យាប័នជាមួយចិន ធ្វើឲ្យរំជើបរំជួលទីក្រុងនេះយ៉ាងខ្លាំង។ តៃវ៉ាន់វិញ ក៏បានប្រកាសគាំទ្រការធ្វើបាតុកម្មផ្ទួនៗនេះ ដែលជាការអនុវត្តសេរីភាពបញ្ចេញមតិ។ ប៉ុន្តែពេលខ្លះ បាតុកម្មអហិង្សា ក៏ក្លាយជាហិង្សា និងការចូលអុកឡុកអគារសភាហុងកុងដោយបំពានជាដើម។ សកម្មភាពបំពានបែបនេះ មិនត្រូវបានអាជ្ញាធរហុងកុងលើកលែងឡើយ ដែលនេះជាមូលហេតុនាំឲ្យមានការភៀសខ្លួនតែម្ដង។
ទោះជាយ៉ាងណា តៃវ៉ាន់អះអាងថា ខ្លួននឹងអនុវត្តតាមនីតិវិធី បើមានសំណើសុំជ្រកកោន។ ក្រុមប្រឹក្សាកិច្ចការដីគោកដែលជាស្ថាប័នទទួលកិច្ចការជាមួយចិន ប្រកាសថា តៃវ៉ាន់ នឹងគោរពតាមគោលការណ៍ការពារសិទ្ធិមនុស្ស និងបញត្តិទាំងឡាយដែលចែងពីទំនាក់ទំនងជាមួយហុងកុង និងម៉ាកាវ។ លើសពីនោះ តៃវ៉ាន់ ក៏នឹងផ្ដល់ជំនួយចាំបាច់ដល់ពលរដ្ឋហុងកុងដែលសុវត្ថិភាព និងសេរីភាពរបស់ពួកគេ ត្រូវបានគំរាមកំហែងដោយសារកត្តានយោបាយ។
តៃវ៉ាន់ មានច្បាប់ស្ដីពីការគ្រប់គ្រងទំនាក់ទំនងជាមួយហុងកុង និងម៉ាកាវ ដែលបានចែងពីការផ្ដល់ជំនួយចាំបាច់ណាមួយសម្រាប់ប្រជាជនហុងកុង ឬម៉ាកាវ ដែលជួបគ្រោះភ័យផ្នែកនយោបាយ។ ពលរដ្ឋហុងកុងដែលភៀសខ្លួន អាចពឹងលើច្បាប់នេះដើម្បីសុំសិទ្ធិជ្រកកោន។ យ៉ាងណាមិញ រឿងដែលលំបាកនោះ គឺពួកគេមិនអាចបញ្ជាក់ថា ពិតជាស្ថិតក្នុងចំណោមបាតុករអុកឡុកអគារសភា ព្រោះកាលនោះ បាតុករភាគច្រើនបំផុតពាក់ម៉ាសបិទមុខ៕
Tag:
តៃវ៉ាន់
ហុងកុង
ចិន
© រក្សាសិទ្ធិដោយ thmeythmey.com