មុនមកដល់កម្ពុជា សំរាមប្លាស្ទិក បានឆ្លងកាត់សិង្ហបុរី ម៉ាឡេស៊ី និងវៀតណាម

ជាតិ

មុនមកដល់កម្ពុជា សំរាមប្លាស្ទិក បានឆ្លងកាត់សិង្ហបុរី ម៉ាឡេស៊ី និងវៀតណាម

30, Jul 2019 , 5:52 pm

រូបភាព

ដោយ: ថ្មីៗ

ភ្នំពេញ៖ យ៉ាងយូរត្រឹមថ្ងៃទី២៤ សីហា ក្រុមហ៊ុន Chungyuen Plastic Manufacture ត្រូវដឹកសំរាមចេញពីកម្ពុជាវិញឲ្យអស់។ នេះបើតាមការដាក់កំហិតរបស់រដ្ឋាភិបាល ដែលបានបញ្ជាក់ជាថ្មីថា កាកសំណល់ប្លាស្ទិកជិត១៦០០តោននោះ មានប្រភពមកពីអាមេរិក និងកាណាដា។

កាកសំណល់ប្លាស្ទិកចំនួន៨៣ កុងតឺន័រ ទម្ងន់១,៥៩២តោន ត្រូវបាននាំចូលកម្ពុជា តាមនាវាដឹកជញ្ជូនចំនួន២៧លើក ហើយបានចតនៅទីលានកំពង់ផែស្វយ័តក្រុងព្រះសីហនុ ។ កាកសំណល់ប្លាស្ទិកទាំងនេះ បាននាំចូលកម្ពុជា កាលពីថ្ងៃទី១ កញ្ញា ឆ្នាំ២០១៨ និងចុងក្រោយខែមករា ឆ្នាំ២០១៩។ មុននឹងមកដល់កម្ពុជា សំរាមប្លាស្ទិកទាំង៨៣កុងតឺន័រនេះ បានឆ្លងកាត់កំពង់ផែសិង្ហបុរី ២២ជើង ម៉ាឡេស៊ី២ជើង និងវៀតណាម៣ជើង។ នេះបើតាមលោក គុណ ញឹម អគ្គនាយកដ្ឋានគយ និងរដ្ឋាករកម្ពុជា ដែលបានធ្វើសន្និសីទកាសែត នៅថ្ងៃទី៣០ កក្កដា។

លោក គុណ ញឹម បានបញ្ជាក់ថា ក្នុងចំណោមកុងតឺន័រទាំង៨៣នេះ មានការនាំចេញប្លាស្ទិក១,៣២២តោន ពីអាមេរិក តាមកុងតឺន័រចំនួន៧០ និង១៣កុងតឺន័រ ដែលមានផ្ទុកកាកសំណល់២៧០តោន ពីកាណាដា។

«តាមការពិនិត្យដោយឧបករណ៍របស់អគ្គនាយកដ្ឋានគយ និងរដ្ឋាករកម្ពុជា និងដោយឧបករណ៍មន្ទីរពិសោធន៍របស់ក្រសួងបរិស្ថាន ទំនិញជាកាកសំណល់ប្លាស្ទិកនោះ មិនមានផ្ទុកសារធាតុគ្រោះថ្នាក់ផ្សេងឡើយ»។ នេះបើតាមលោក គុណ ញឹម។

អត្ថបទទាក់ទង

រដ្ឋាភិបាលដាក់កំហិតឲ្យនាំសំរាមចេញពីកម្ពុជា ត្រឹមថ្ងៃទី២៤ សីហា

ថ្លែងក្នុងសន្និសីទកាសែត នៅថ្ងៃទី៣០ កក្កដានេះ លោក គុណ ញឹម បានបញ្ជាក់ថា រដ្ឋាភិបាល បានដាក់កំហិតឲ្យក្រុមហ៊ុន Chungyuen នាំកាកសំណល់ប្លាស្ទិកចេញពីកម្ពុជា នៅត្រឹមថ្ងៃទី២៤ សីហា ដោយក្រុមហ៊ុននេះ ត្រូវរងពិន័យជាង១ពាន់លានរៀល ស្មើជាង២៥ម៉ឺនដុល្លារអាមេរិកផងដែរ។

«ក្នុងករណីក្រុមហ៊ុនខកខានមិនបានអនុវត្តនូវចំណុចទាំង៣ (នាំចេញកាកសំណល់ពីកម្ពុជា និងបង់ប្រាក់ពិន័យ) អគ្គនាយកដ្ឋានគយ និងរដ្ឋាករកម្ពុជា នឹងបន្តចាត់វិធានការតាមផ្លូវតុលាការស្របតាមច្បាប់ជាធរមាន»។ នេះជាការបញ្ជាក់របស់លោក គុណ ញឹម ដែលបានបន្ថែមថា ក្រុមហ៊ុននាំចូលសំរាមនេះ មានប្រធាន សួន ឡុក ជនជាតិខ្មែរ ដែលបានចុះបញ្ជីដំណើរការក្រុមហ៊ុននៅក្រសួងពាណិជ្ជកម្ម ក្នុងទំហំទឹកប្រាក់វិនិយោគ៤០០០លានរៀល៕