ជាតិ
ដំរីនៅអង្គរ ត្រូវទៅរស់នៅតាមធម្មជាតិ នៅព្រៃសហគមន៍បុស្សធំ ក្នុងស្រុកសូទ្រនិគម
រូបភាពពីអាជ្ញាធរជាតិអប្សរា
×![]()
ដោយ: ឡាយ សុភាវតី
ភ្នំពេញ៖ សមាគមគ្រប់គ្រងសត្វដំរី សហការជាមួយអាជ្ញាធរជាតិអប្សរា នឹងដឹកសត្វដំរីមួយចំនួនចេញរមណីយដ្ឋានអង្គរ ទៅព្រៃសហគមន៍បុស្សធំ ដែលស្ថិតក្នុង ឃុំខ្នារពោធិ៍ ស្រុកសូទ្រនិគម ខេត្តសៀមរាប ដើម្បីឲ្យទៅរស់នៅតាមធម្មជាតិ និងបញ្ឈប់សេវាកម្មសត្វដំរីដឹកភ្ញៀវទេសចរនៅតំបន់អង្គរ។ 
លោក ឡុង កុសល អ្នកនាំពាក្យអាជ្ញាធរជាតិអប្សរាបានបញ្ជាក់ប្រាប់សារព័ត៌មានថ្មីៗតាមទូរស័ព្ទនៅថ្ងៃទី១៤ វិច្ឆិកា នេះថា ដំរី១៤ក្បាលនៅតំបន់អង្គរ នឹងត្រូវដឹកទៅព្រៃសហគមន៍បុស្សធំឲ្យបានមុនឆ្នាំ២០២០ ដើម្បីរសើនៅតាមបែបធម្មជាតិ ក្រោយការមើលថែពីសមាគមគ្រប់គ្រងសត្វដំរី។
«ដំរីនៅរមណីយដ្ឋាននេះ គឺមានមើលថែផ្ដល់ចំណីគ្រប់គ្រាន់ ប៉ុន្តែដើម្បីបញ្ឈប់រូបភាពអាជីវកម្ម ទើបឲ្យសមាគមគ្រប់គ្រងដំរីសហការជាមួយអាជ្ញាធរជាតិអប្សរា បញ្ជូនទៅព្រៃសហគមន៍បុស្សធំ ក្រោមការមើលថែរបស់សមាគមគ្រប់គ្រងដំរី ដើម្បីឲ្យមានជីវិតរស់នៅតាមបែបធម្មជាតិ» នេះជាការអះអាងរបស់អ្នកនាំពាក្យអាជ្ញាធរជាតិអប្សរា។
ជាមួយគ្នា លោក ឡុង កុសល ឲ្យដឹងថា នៅថ្ងៃទី១៤នេះ ដំរីពីរក្បាលបានដឹកតាមរថយន្តទៅដល់ព្រៃសមាគមបុស្សធំ ហើយនឹងបន្តដឹកជញ្ជូនបន្តទៀត។
សូមបញ្ជាក់ថា ចាប់ពីឆ្នាំ២០២០តទៅ សត្វដំរីដែលកំពុងបម្រើសេវាកម្មដឹកជញ្ជូនភ្ញៀវនៅក្នុងរមណីយដ្ឋានអង្គរ នឹងលែងមានវត្តមានតទៅទៀតហើយ។ សត្វដំរីដែលកំពុងបម្រើសេវាដឹកជញ្ជូនភ្ញៀវសរុបមានចំនួន ១៤ក្បាល ដែលដឹកជាប្រចាំថ្ងៃនៅជុំវិញប្រាសាទបាយ័ន ខ្លោងទ្វារទន្លេអុំ និងភ្នំបាខែង៕
រូបភាពពីអាជ្ញាធរជាតិអប្សរា
Tag:
ដំរី
© រក្សាសិទ្ធិដោយ thmeythmey.com
