កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ពីរគ្រាប់របស់ខ្សែបម្រើ Aaron Ramsey គ្រប់គ្រាន់ដើម្បីនាំវេលស៍ឡើងទៅកាន់វគ្គផ្តាត់ព្រ័ត្រ Euro 2020 តាមរយៈការយកឈ្នះហុងគ្រី ២-០ នាការប្រកួតចុងក្រោយនៃវគ្គជម្រុះពូល E នៅយប់ថ្ងៃទី១៩ ខែវិច្ឆិកា។
វេលស៍ ដែលដឹកនាំដោយគ្រូបង្វឹកលោក Ryan Giggs បានក្លាយជាក្រុមទី២០ ដែលទទួលបានកៅអីទៅលេងក្របខណ្ឌទ្វីបអឺរ៉ុបឆ្នាំ២០២០ បន្ទាប់ពីពួកគេធ្វើព្យុះភ្លៀងម្តងរួចមកហើយកាលពី Euro 2016 ដោយអាចឈានដល់វគ្គពាក់កណ្តាលផ្តាច់ព្រ័ត្រ។
នាការប្រកួតនៅកីឡដ្ឋាន Cardiff City Stadium ខ្សែប្រយុទ្ធឆ្នើមនិងជាប្រធានក្រុម Gareth Bale បានបញ្ជូនបាល់យ៉ាងល្អដើម្បីឲ្យ Ramsey ខ្សែបម្រើក្រុម Juventus សម្រេចគ្រាប់បាល់ដំបូងនៅនាទី១៥នៃវគ្គទី១។ គ្រាប់បាល់ទី២របស់អតីតសមាជិកក្រុម Arsenal កើតឡើងនៅដើមតង់ទី២ ពោលគឺបន្ទាប់ពីការប្រកួតដំណើរការបាន២នាទីប៉ុណ្ណោះ តាមរយៈការបញ្ជូនពីមិត្តរួមក្រុមកីឡាករ Kieffer Moore។ ចប់ការប្រកួតម្ចាស់ផ្ទះវេលស៍ឈ្នះក្រុមភ្ញៀវហុងគ្រី ២-០។
ក្រោយឈ្នះហុងគ្រី វេលស៍បញ្ចប់ទៅក្នុងចំណាត់ថ្នាក់ទី២ ពូល E ក្រោយប្រកួត៨លើកទទួលបាន១៤ពិន្ទុ តាមពីក្រោយក្រូអាស៊ីដែលឈរកំពូលតារាងមាន១៧ពិន្ទុ។ ហុងគ្រីស្ថិតដែលមាន១២ពិន្ទុ នៅចំណាត់ថ្នាក់ទី៤ក្នុងពូល អស់ឱកាសទៅវគ្គ play-off ខណៈស្លូវ៉ាគីដែលឈ្នះអាស៊ែបៃហ្សង់ ២-០ ឡើងទៅឈរលេខ៣ក្នុងពូល E ដោយបានកៅអីលេងវគ្គជម្រុះបន្តយក៤ក្រុមទៀត ដើម្បីបង្គ្រប់២៤ក្រុមទៅ Euro 2020។
ក្រុមដែលទទួលបានកៅអីរួចស្រេចចំនួន២០ រួមមាន អង់គ្លេស ឆែក អ៊ុយក្រែន អេស្ប៉ាញ ស៊ុយអែត ប៉ូឡូញ បារាំង តួកគី បែលហ្ស៊ិក រុស្ស៊ី អ៊ីតាលី ហ្វាំងឡង់ ក្រូអាស៊ី ហូឡង់ អូទ្រីស អាល្លឺម៉ង់ ម្ចាស់ការពារជើងឯកព័រទុយហ្គាល់ ដាណឺម៉ាក ស្វ៊ីស និងវេលស៍។
ដោយឡែកក្រុមដែលត្រូវលេង play-off ដើម្បីយក៤ក្រុម មានចំនួន១០ក្រុមដែលទទួលបានលេខ៣តាមពូលនិមួយៗ រួមមាន កូសូវ៉ូ ស៊ែប៊ី អៀរឡង់ខាងជើង សាធារណរដ្ឋអៀរឡង់ ស្លូវ៉ាគី ន័រវែស ម៉ាសេដ្វានខាងជើង អ៊ីស្លង់ ស្កុតឡែន និងក្រិក៕
Tag:
Euro 2020
© រក្សាសិទ្ធិដោយ thmeythmey.com
