បង្រៀននៅសាលាដាច់ស្រយាលមួយនៅស្រុកសូទ្រនិគម ខេត្តសៀមរាប លោក អឿ ពុទ្ធី ហាក់មិនដែលមានអារម្មណ៍នឿយហត់នោះឡើយ ព្រោះលោកបានបំពេញការងារក្នុងអាជីពនៃក្តីសុបិនរបស់ខ្លួន ជាពិសេសលោកមានឱកាសផ្តល់ចំណេះដឹងដល់កុមារ និងបង្កើតស្នាមញញឹមដល់ពួកគេ។
រូប «ជល់ដៃគ្នា សំពះគ្នា បេះដូង ចាប់ដៃគ្នា និងទះដៃគ្នា» ត្រូវបានបិទនៅលើទ្វារនៃបន្ទប់រៀនថ្នាក់ទី១ និងទី២ ដែលលោក អឿ ពុទ្ធី បង្រៀន។ មុនចេញទៅផ្ទះ គ្រូបង្រៀនវ័យ២២រូបនេះ បានតម្រូវឲ្យសិស្សប៉ះទៅលើផ្ទាំងរូប ហើយធ្វើកាយវិការជាមួយប្រធានថ្នាក់ ដោយក្តីគោរពស្រឡាញ់គ្នា។ ឃ្លីបវីដេអូនៃសកម្មភាពរបស់ក្មេងៗ ត្រូវបានបង្ហោះនៅលើទំព័រហ្វេសប៊ុករបស់លោកគ្រូ ពុទ្ធី ផ្ទាល់ ដោយមានការចុច Like និងចែករំលែករាប់ពាន់ដង។
ផ្តល់ចំណេះដឹង និងបង្កើតបរិយាកាសរីករាយដល់ក្មេងៗ លោក អឿ ពុទ្ធី ធ្វើបែបនេះយ៉ាងពេញចិត្ត ក្នុងតួនាទីជាគ្រូបង្រៀនម្នាក់។ វាជាក្តីសុបិនដែលបានក្លាយជាការពិតសម្រាប់យុវជនដែលមានកំណើតនៅស្រុកប្រាសាទបាគង ខេត្តសៀមរាប រូបនេះ។
បច្ចុប្បន្ន លោក ពុទ្ធី បង្រៀនថ្នាក់ទី១ និងទី២នៅសាលាបឋមកន្ទូ ភូមិសន្ទៃ ឃុំដារុន ស្រុកសូទ្រនិគម ដែលមានចម្ងាយជាង៣០គីឡូម៉ែត្រពីលំនៅដ្ឋានរបស់លោក។ មិនងាយស្រួលនោះឡើយសម្រាប់លោក ពុទ្ធី និងគ្រូបង្រៀនផ្សេងទៀត ក្នុងការធ្វើដំណើរទៅកាន់សាលារៀន នារដូវវស្សា ដោយសារផ្លូវពោរពេញទៅដោយភក់ ពេលខ្លះត្រូវប្រើប្រាស់មធ្យោបាយម៉ូតូផង និងកាណូតផង។
«យើងចាប់អាជីពជាគ្រូបង្រៀនទៅហើយ ទោះត្រូវធ្វើដំណើរផ្លូវឆ្ងាយ ឬពិបាកក្តី យើងត្រូវតែតស៊ូ ទៅមានឱកាសផ្ទេរចំណេះដឹងដល់ក្មេងៗ ពោលគឺកូនអ្នកស្រុកនៅតំបន់ដាច់ស្រយាល»។ លោក អឿ ពុទ្ធី បានពន្យល់ប្រាប់ ThmeyThmey25 តាមទូរសព្ទ។
លោក ពុទ្ធី ពិតជាពេញយ៉ាងខ្លាំងចំពោះអាជីពរបស់ខ្លួនដែលចាប់ផ្តើមតាំងពីឆ្នាំ២០១៨មក។ វាជាការតាំងចិត្តរបស់លោកក៏ពិតមែន តែនេះក៏ជាការបំពេញតាមបំណងរបស់ឪពុកផងដែរ។ កើតក្នុងគ្រួសារដែលមានកូន៩នាក់ យុវជនពុទ្ធី បានរៀបរាប់ថា៖ «ខ្ញុំមានបងពីរនាក់ធ្លាប់ប្រឡង តែមិនបានជាប់ជាគ្រូបង្រៀនឡើយ ពុកខ្ញុំស្តាយខ្លាំងណាស់។ តាំងពីពេលនោះមក ខ្ញុំបានតាំងចិត្តរៀន ហើយប្រឡងឲ្យជាប់ ទោះជាគ្រូបឋម ឬអនុវិទ្យាល័យក៏ដោយ»។
តាមពិត យុវជន ពុទ្ធី មានក្តីស្រមៃខ្ពស់ជាងនេះដោយចង់ក្លាយជាគ្រូគណិតវិទ្យា ប៉ុន្តែជីវភាពគ្រួសារ ក៏កត្តារាំងស្ទះមួយផងដែរ ដោយលោកមិនលទ្ធភាពមកបន្តការសិក្សានៅភ្នំពេញឡើយ ទើបលោកបានដាក់ពាក្យប្រឡងនៅសាលាគរុកោសល្យ និងវិក្រឹតការ ខេត្តសៀមរាប ភ្លាមៗ ក្រោយប្រឡងជាប់សញ្ញាបត្រមធ្យមសិក្សាទុតិយភូមិនៅឆ្នាំ២០១៦។
កូនអ្នកលក់ត្រីនៅផ្សារអង្គ្រងរូបនេះ បានលើកឡើងថា៖«ការសិក្សាពិតជាមានតម្លៃខ្លាំងណាស់។ នៅពេលយើងមានចំណេះដឹង យើងអាចប្រកបរបរដ៏សមរម្យ មិនចាញ់បោកគេ និងក្លាយជាធនធានមនុស្សសម្រាប់អភិវឌ្ឍសង្គមជាតិ»។
តាមរយៈហ្វេសប៊ុករបស់ខ្លួន លោក អឿ ពុទ្ធី បានចែករំលែកសកម្មភាពរីករាយជាច្រើនរបស់លោកជាមួយសិស្សតូចៗរបស់ខ្លួន ដូចជាកាយវិការគោរពគ្នា សាមគ្គីគ្នា រួមទាំងការសម្តែងសិល្បៈផ្សេងៗ៕