អន្តរជាតិ
ប៉ូលិសថៃ រៀបចំចាត់វិធានការប្រឆាំងលោក Thanathorn រឿងប្រមូលអ្នកគាំទ្រធ្វើបាតុកម្ម
ប្រភព៖កាសែត បាងកកប៉ុស្តិ៍
×![]()
ប៉ូលិសថៃ កំពុងរៀបចំចាត់វិធានការផ្លូវច្បាប់ប្រឆាំងអ្នករៀបចំ បាតុកម្ម នៅទីក្រុង បាងកក កាលពីថ្ងៃសៅរ៍ ទី១៤ ធ្នូ ដោយលើកហេតុថា ពួកគេមិនបានទទួលការអនុញ្ញាតពីអាជ្ញាធរឡើយ។
ប៉ូលិសថៃ បានបញ្ជាក់នៅថ្ងៃអាទិត្យ ១៥ ធ្នូ ថា បាតុកម្មដែលត្រូវបានរៀបចំដោយមេដឹកនាំបក្សអនាគតឆ្ពោះទៅមុខ (FFP) លោក Thanathorn Juangroongruangkit ត្រូវបានមើលឃើញយ៉ាងច្បាស់ថា ល្មើសនឹងច្បាប់ប្រមូលផ្តុំជាសាធារណៈ។
បើតាមកាសែត បាងកកងប៉ុស្តិ៍ មេបញ្ជាការកងពលប៉ូលិសក្រុងទី៦ លោក Methi Rakphan បានអះអាងថា អ្នករៀបចំបាតុកម្មនេះ បរាជ័យក្នុងការទទួលបានការអនុញ្ញាត ឬប្រកាសពីគោលបំណងនៃព្រឹត្តិការណ៍នេះ។ លោក សង្កត់ធ្ងន់ថា វាច្បាស់ណាស់ថាការប្រមូលផ្តុំនេះមិនស្របច្បាប់ទេ ពីព្រោះគ្មានការអនុញ្ញាតណាមួយត្រូវបានទទួល ហើយប៉ូលិស ក៏កំពុងរៀបចំដាក់ចេញចំណាត់ការផ្លូវការ លើមេដឹកនាំបាតុកម្មនេះដែរ។
ទោះបីជាប៉ូលិស បានអះអាងថា គ្មានការអនុញ្ញាតសម្រាប់ការប្រមូលផ្តុំនេះក៏ដោយ ពួកគេមិនបានធ្វើអន្តរាគមន៍នៅក្នុងព្រឹត្តិការណ៍ដ៏ខ្លី ដែលមានការចូលរួមពីមនុស្សរាប់រយនាក់នេះឡើយ ហើយប្រជាជនថៃ បានប្រមូលផ្តុំគ្នាប្រហែលជាមួយម៉ោងដោយគ្មានការរំខានអ្វីឡើយ។ ទីតាំងនៃការប្រមូលផ្តុំគ្នា គឺស្ថិតនៅសង្កាត់ Pathumwan ដែលជាទីប្រជុំជនដ៏ធំប្រចាំរាជធានី បាងកក។
មែនទែនទៅ ការប្រមូលផ្តុំគ្នានេះ បានកោះហៅដោយលោក Thanathorn បន្ទាប់ពីគណៈកម្មការរៀបចំការបោះឆ្នោតថៃ (EC) បានសម្រេចចិត្តស្នើសុំឲ្យតុលាការធម្មនុញ្ញ ពិចារណារំលាយបក្សរបស់លោក។ គ.ជ.បថៃ បានចោទប្រកាន់ថា បក្សអនាគតឆ្ពោះទៅមុខរបស់លោក Thanathorn បានបំពានច្បាប់បក្សនយោបាយ ដោយទទួលយកកម្ចី ១៩១លានបាត ពីលោក ដើម្បីផ្គត់ផ្គង់យុទ្ធនាការអំឡុងពេលបោះឆ្នោត។
សូមបញ្ជាក់ថា ក្នុងខែឧសភា ឆ្នាំ២០១៩ កន្លងទៅ លោក Thanathorn បានប្រាប់វេទិកាក្នុងស្រុកមួយថា លោកបានផ្តល់កម្ចីជិត២០០លានបាត ឬស្មើនឹងជាង៦,៦លានដុល្លារ ទៅកាន់គណបក្សអនាគតឆ្ពោះទៅមុខ (FFP)។ លោកក៏បានប្រកាសលុយកម្ចីនេះ ក្នុងការប្រកាសទ្រព្យសម្បត្តិលោក ដោយដាក់ឈ្មោះគណបក្សនេះ ជាកូនបំណុលមួយរបស់លោក។ ម្យ៉ាងទៀត កិច្ចសន្យាខ្ចីបុលចំនួនពីរ ត្រូវបានធ្វើឡើង រវាងលោក Thanathorn និងប្រធានហិរញ្ញវត្ថុរបស់បក្ស ដោយមួយធ្វើឡើងក្នុងខែ មករា និងមួយទៀតធ្វើឡើងក្នុងខែមេសា ឆ្នាំ២០១៩៕
Tag:
ថៃ
Thanathorn Juangroongruangkit
បាតុកម្ម
© រក្សាសិទ្ធិដោយ thmeythmey.com
