អន្តរជាតិ
ប្រធានាធិបតី ត្រាំ ចោទប្រធានសភាតំណាងថា «ប្រកាសសង្គ្រាមជាមួយលទ្ធិប្រជាធិបតេយ្យ» លោកស្រី ណាន់ស៊ី ផេឡូស៊ី (ឆ្វេង), លោកដូណាល់ត្រាំ និងលោក មៃ ផេន អំឡុងជំនួបនាពេលកន្លងទៅមួយ ក្នុងសេតវិមានអាមេរិក (afp)
× ប្រធានាធិបតីអាមេរិក ដូណាល់ ត្រាំ បានប្រាប់ទៅកាន់មេដឹកនាំរបស់បក្សប្រជាធិបតេយ្យក្នុងសភាថា ការដកហូតតំណែងលោក គឺជាការប៉ុនប៉ងធ្វើ «រដ្ឋប្រហារ» ដែលកំពុងធ្វើវិទ្ធង្សនាលើលទ្ធិប្រជាធិបតេយ្យរបស់អាមេរិក។
ក្នុងលិខិត៦ទំព័រដែលផ្ញើទៅលោកស្រី ណាន់ស៊ី ផេឡូស៊ី នៅថ្ងៃ១៧ ធ្នូ លោក ត្រាំ និយាយថា៖«ប្រវិត្តសាស្ត្រ នឹងវិនិច្ឆយអ្នក»។ លោកប្រធានាធិបតីបានចោទលោកស្រីថា បានប្រកាសសង្គ្រាមដោយបើកចំហជាមួយលទ្ធិប្រជាធិបតេយ្យ។
បើតាមលិខិតដដែល លោក ដូណាល់ ត្រាំ បានបង្ហាញការប្រឆាំងតវ៉ា «ដ៏មានអំណាច និងខ្លាំងក្លាបំផុត» របស់លោក ចំពោះការដកហូតតំណែងដែលផ្តួចផ្តើមឡើងដោយបក្សប្រជាធិបតេយ្យក្នុងសភាតំណាងអាមេរិក។ លោក សង្កត់ធ្ងន់ថា ការដកហូតតំណែងនេះ តំណាងឲ្យការរំលោភអំណាចផ្ទុយពីរដ្ឋធម្មនុញ្ញ ពីសំណាក់សមាជិកបក្សប្រជាធិបតេយ្យដែលជាបក្សប្រឆាំងដ៏ធំក្នុងសហរដ្ឋអាមេរិក។
ប្រធានាធិបតីអាមេរិកទី៤៥រូបនេះ ប្រឈមមុខការបោះឆ្នោតដកតំណែង (impeachment) ក្នុងសភាតំណាងដែលគ្រប់គ្របដោយបក្សប្រជាធិបតេយ្យ នៅថ្ងៃពុធ ១៨ ធ្នូ ជុំវិញការបទចោទប្រកាន់ថា លោកបានដាក់សម្ពាធលើប្រទេសអ៊ុយក្រែនដើម្បីផលប្រយោជន៍នយោបាយផ្ទាល់ខ្លួន។ ប្រសិនបើ ការបោះឆ្នោតទទួលបានជោគជ័យមែននោះ លោក ត្រាំ នឹងក្លាយជាប្រធានាធិបតីទី៣ ក្នុងប្រវត្តិសាស្ត្រអាមេរិក ដែលត្រូវដកហូតតំណែង។ បន្ទាប់មក លោកនឹងបន្តទៅជំនុំជម្រះក្តីក្នុងព្រឹទ្ធសភាដែលគ្រប់គ្រងដោយបក្សសាធារណរដ្ឋ។
ប្រាប់អ្នកសារព័ត៌មាន នៅអគារ Capitol លោកស្រី ផេឡូស៊ី បាននិយាយថា លោកស្រីពុំអានលិខិតនេះទាំងស្រុងឡើយ ក៏ប៉ុន្តែបានមើលឃើញខ្លឹមសារខ្លះ ហើយលោកស្រីយល់ឃើញថាវាពិតជាអាក្រក់ណាស់។ ដោយឡែកក្នុងសេចក្តីថ្លែងការណ៍ប្រកាសការបោះឆ្នោតលើការដកហូតតំណែងនៅថ្ងៃពុធ លោកស្រី បានបញ្ជាក់ថា សភាតំណាងអាមេរិក នឹងអនុវត្តអំណាចមួយដែលរដ្ឋធម្មនុញ្ញបានប្រគល់ឲ្យពួកគេ។
សូមបញ្ជាក់ថា លោក ដូណាល់ ត្រាំ កំពុងប្រឈមមុខនឹងបទចោទប្រកាន់ដកហូតតំណែងចំនួនពីរ។ ការចោទប្រកាន់ទី១គឺ លោក ត្រាំ បានអនុវត្តអំណាចប្រធានាធិបតីដើម្បីបានផលចំណេញផ្ទាល់ខ្លួន ខណៈមិនខ្វាយខ្វល់ ឬប៉ះពាល់ដល់ប្រយោជន៍ជាតិ ដោយដាក់សម្ពាធលើអ៊ុយក្រែនឲ្យជ្រៀតជ្រែកការបោះឆ្នោតជ្រើសរើសប្រធានាធិបតី ២០២០។ ការចោទប្រកាន់ទី២គឺ នៅពេលត្រូវបានចាប់កំហុសបាន, នៅពេលសភាតំណាងបានបើកការស៊ើបអង្កេត និងស៊ើបសួរក្នុងនីតិវិធីដកតំណែងប្រធានាធិបតីនោះ លោកត្រាំបានព្យាយាមរារាំងដំណើរការរបស់សភានេះ៕
Tag:
សហរដ្ឋអាមេរិក
ដូណាល់ត្រាំ
សភាតំណាង
impeachment
© រក្សាសិទ្ធិដោយ thmeythmey.com