អន្តរជាតិ
ឥណ្ឌូណេស៊ី នឹងបង្កើតភ្លៀងសិប្បនិម្មិត ដើម្បីទប់ស្កាត់គ្រោះទឹកជំនន់ រូបភាព៖ Reuters
× នាថ្ងៃទី៣ ខែធ្នូ ឥណ្ឌូណេស៊ី សម្រេចចាត់វិធានការ បង្កើតភ្លៀងសិប្បនិម្មិតឲ្យមានភ្លៀងនៅតំបន់ផ្សេងក្រៅពីរដ្ឋធានីហ្សាការតា។ ការបង្កើតភ្លៀងសិម្បនិម្មិតនេះ ដើម្បីបញ្ចៀសពពកកុំឲ្យរសាត់មកដល់រដ្ឋធានី។ ប្រសិនបើអាជ្ញាធរ មិនអាចទប់ស្កាត់ពពកនេះបានទេ ភ្លៀងនឹងនៅតែបន្តធ្លាក់នៅក្នុងទីក្រុងហ្សាការតា ហើយនឹងបង្កឲ្យមានគ្រោះទឹកជំនន់កាន់តែខ្លាំងជាងមុន។
កម្រិតទឹកភ្លៀង បានធ្លាក់យ៉ាងខ្លាំងនៅក្នុងឥណ្ឌូណេស៊ីតាំងពីថ្ងៃទី៣១ ខែធ្នូមក រហូតដល់ថ្ងៃទី១ ខែមករា។ ភ្លៀងធ្លាក់ដ៏ច្រើនសន្ធឹកបែបនេះ បានបង្កឲ្យមានទឹកជំនន់ និងបាក់ដីនៅតាមតំបន់ជុំវិញរដ្ឋធានីហ្សាការតា និងតំបន់ក្បែរៗនោះ។ គ្រោះមហន្តរាយនេះ បានបង្កឲ្យមនុស្សស្លាប់ បានកើនឡើងរហូតដល់ ៤៣នាក់ ខណៈពេលមនុស្សជាង ១ម៉ឺននាក់ត្រូវបានជម្លៀសចេញពីតំបន់ទឹកជំនន់។
ដើម្បីទប់ស្កាត់ទឹកភ្លៀង កុំឲ្យធ្លាក់ច្រើនពេកនៅក្នុងរដ្ឋធានី ពេលនេះឥណ្ឌូណេស៊ី បានចាត់វិធានការបង្កើតឲ្យមានភ្លៀងសិប្បនិម្មិតនៅតំបន់ផ្សេង។ ទីភ្នាក់ងារបច្ចេកវិទ្យាឥណ្ឌូណេស៊ី BPPT បាននិយាយនៅក្នុងសេចក្តីថ្លែងការណ៍ថា យន្តហោះតូចៗចំនួនពីរ ត្រូវបាចធាតុគីមីសូដ្យូមក្លរីត (NaCL) ដើម្បីឲ្យមានភ្លៀងធ្លាក់ នៅលើច្រកសមុទ្រ Sunda មុនពេលពពកអាចនឹងហោះមកដល់ទីក្រុងហ្សាការតា ចំណែកយន្តហោះធំជាងនេះមួយគ្រឿងទៀត នឹងប្រចាំការនៅច្រកសមុទ្រ Sunda នេះ។
បើតាមការបញ្ជាក់ថារបស់ទីភ្នាក់ងាបច្ចេកវិទ្យាដដែល ពពកដែលហោះសំដៅមករដ្ឋធានីហ្សាការតា ត្រូវតែបាញ់សារធាតុសូដ្យូមក្លរីត ដើម្បីប្រាកដថាពពកនឹងមិនអាចហោះមកដល់រដ្ឋធានី។ យ៉ាងណាក៏ដោយ ទីភ្នាក់ងារសង្ឃឹមថា ពពកនឹងបាត់អស់ មុនពេលហោះមកដល់រដ្ឋធានីហ្សាការតា។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាការពិត ការបង្កើតភ្លៀងសិប្បនិម្មិតនេះ ឥណ្ឌូណេស៊ី តែងតែធ្វើឡើងនារដូវក្តៅ ដើម្បីពន្លត់ភ្លើងឆេះព្រៃ។ ជាពិសេស កាលពីឆ្នាំ ២០១៣ ក្នុងពេលមានគ្រោះទឹកជំនន់បានវាយប្រហារលើទីក្រុងហ្សាការតា ឥណ្ឌូណេស៊ីក៏បានប្រើវិធីសាស្ត្របង្កើតភ្លៀងសិប្បនិម្មិតផងដែរ ដើម្បីទប់ស្កាត់ពពក កុំឲ្យរសាត់មកដល់ទីក្រុងហ្សាការតា៕
Tag:
ឥណ្ឌូណេស៊ី
គ្រោះទឹកជំនន់
© រក្សាសិទ្ធិដោយ thmeythmey.com