អ្នករៀបចំព្រឹត្តិការណ៍កីឡាអូឡាំពិកទីក្រុងតូក្យូឆ្នាំ ២០២០ បានចេញមកអះអាងជាថ្មីនៅថ្ងៃទី៦ ខែកុម្ភៈ ថាកីឡានេះនឹងដំណើរការទៅមុខតាមការគ្រោងទុកដដែល ទោះបីមានការបារម្ភខ្លាំងពីការរីករាលដាល់នៃមេរោគកូរ៉ូណាវីរុស។ អ្នករៀបចំក៏ចូលរួមប្រឆាំងនឹងព័ត៌មានបំភិតបំភ័យជុំវិញបញ្ហាមេរោគនេះផងដែរ។
នាយកប្រតិបត្តិកីឡាអូឡាំពិកក្រុងតូក្យូលោក Toshiro Muto និយាយថា អ្នករៀបចំព្រឹត្តិការណ៍នេះ បានបង្កើតក្រុមការងារដើម្បីប្រយុទ្ធប្រឆាំងនឹងការរីករាលដាលនៃកូរ៉ូណាវីរុសដែលបានសម្លាប់មនុស្សជាបន្តបន្តាប់។ លោកសន្យាថាការប្រកួតកីឡានេះនឹងមិនត្រូវបង្អាក់ឡើយ។
លោក Muto ធ្លាប់លើកឡើងម្តងរួចមកហើយអីពីការព្រួយបារម្ភពីផលប៉ះពាល់នៃមេរោគកូរ៉ូណាវីរុសថ្មី (2019-NoCv) ដែលអាចសម្លាប់មនុស្សអំឡុងការប្រកួតកីឡារដូវក្តៅនៅក្នុងប្រទេសជប៉ុននេះ។ លោកថែមទាំងសង្ឃឹមថា វីរុសថ្មីក្នុងប្រទេសចិននេះ នឹងអាចរកវិធីទប់ស្កាត់បានយ៉ាងឆាប់រហ័ស ដើម្បីបង្កើនទំនុកចិត្តក្នុងការឈានទៅកាន់ការប្រកួតកីឡាលំដាប់ពិភពលោកនាខែកក្កដា ខាងមុខ។
លោក Toshiro Muto នាយកប្រតិបត្តិកីឡាអូឡាំពិកក្រុងតូក្យូ
យ៉ាងណាក៏ដោយ បន្ទាប់ពីការពិនិត្យលើគម្រោងប៉ារ៉ាឡាំពិករួចរាល់ លោក Muto បានប្រាប់អ្នកយកព័ត៌មានថាកីឡាអូឡាំពិករដូវក្តៅ ឆ្នាំ២០២០ នឹងដំណើរការទៅតាមការគ្រោងទុក។
«ជារឿងសំខាន់ក្នុងការរក្សាគោលបំណងរបស់យើង និងផ្តោតអារម្មណ៍ឲ្យបានស្ងប់។ យើងមិនចង់ប្រកាសភាពអាសន្នជាសាធារណនោះទេ។ ការឆ្លងមេរោគកូរ៉ូណាវីរុសនៅមានកម្រិត ហើយមិនមានបញ្ហាក្នុងការដំណើរការព្រឹត្តិការណ៍កីឡាអូឡាំពិកនោះដែរ»។ នាយកប្រតិបត្តិកីឡាអូឡាំពិកក្រុងតូក្យូ អះអាងដូច្នេះ។
ដោយឡែក អ្នកនាំពាក្យគណៈកម្មាធិការកីឡាប៉ារ៉ាឡាំពិកអន្តរជាតិ (IPC) លោក Craig Spence បានត្អូញត្អែរជុំវិញការបន្លំ និងការបង្កើត«ព័ត៌មានមិនច្បាស់ការ» អំពីមេរោគឆ្លងកូរ៉ូណាវីរុសនេះ។ លោកយល់ឃើញថាព័ត៌មានទាំងនោះ អាចរារាំងការយល់ឃើញរបស់សាធារណជនក្នុងដំណើរឆ្ពោះទៅអូឡាំពិក និងប៉ារ៉ាឡាំពិក។
លោក Spence បង្ហាញកង្វល់ថា៖«ការភ័យខ្លាចកំពុងតែរីករាលដាលលឿនជាងកូរ៉ូណាវីរុសទៅទៀត។ វាសំខាន់ណាស់ដែលយើងត្រូវតែកម្ចាត់ភាពភ័យខ្លាចនេះ។ មានតែ១៩១ករណីប៉ុណ្ណោះដែលកើតមាននៅក្រៅប្រទេសចិន ដូច្នេះយើងទាំងអស់គ្នាគួរគិតឲ្យបានវែងឆ្ងាយ។ ប្រសិនបើអ្នកប្រៀបធៀបអត្រាទាំងនោះជាមួយនឹងជំងឺផ្តាសាយធម្មតា ពួកគេនៅតែមានចំនួនតិចតួចនៅឡើយ»។
អង្គការសុខភាពពិភពលោក (WHO) ក៏នៅមិនបានប្រកាសពីការរីករាលដាលនៃកូរ៉ូណាវីរុសក្នុងកម្រិតខ្លាំងក្លានោះដែរ។ កាលពីកីឡាអូឡាំពិក្រុងរីយ៉ូប្រទេសប្រេស៊ីលឆ្នាំ២០១៦ ក៏អ្នករៀបចំអាចដោះស្រាយជាមួយវីរុសហ្សីកា (Zika) បានផងដែរដោយត្រូវពឹងផ្អែកលើអ្នកជំនាញ មិនមែនលើព័ត៌មានទាំងស្រុងឡើយ៕