អន្តរជាតិ
ដើម្បីចរចា អាជ្ញាធរថៃ បាននាំម្តាយខ្មាន់កាំភ្លើងមកកន្លែងកើតហេតុ ប្រភពរូប៖ AFP
× ប៉ូលិសថៃ បានបង្ហើបថា ពួកគេបានព្យាយាមជាច្រើនលើកដើម្បីបញ្ចុះបញ្ចូលទាហានថៃម្នាក់ដែលបានសម្លាប់មនុស្សជាង២០នាក់ ឲ្យចេញមកសារភាពទោសកំហុស ។ ក្នុងនោះ ក្រុមប៉ូលិសក៏បាននាំម្តាយបង្កើតរបស់ខ្មាន់កាំភ្លើងមកលួងលោមកូនប្រុសថែមទៀតផង។
ហេតុការណ៍បាញ់ប្រហារនេះ បានកើតឡើងនៅម៉ោង ៣ រសៀល ថ្ងៃសៅរ៍ ៨ ខែកុម្ភៈ ដោយជនជាខ្មាន់កាំភ្លើងជាទាហាន មានឈ្មោះថា Jakrapanth Thomma វ័យ ៣២ ឆ្នាំ បានបាញ់សម្លាប់មេបញ្ជាការខ្លួន មុនបន្តលួចអាវុធពីបន្ទាយដើម្បីទៅធ្វើសកម្មភាពបាញ់ប្រហារ ក្នុងទីតាំងផ្សារទំនើបមួយកន្លែង ឈ្មោះថា Terminal 21។
ក្រោយមក ខ្មាន់កាំភ្លើងរូបនេះ ត្រូវបានបាញ់សម្លាប់ដោយប៉ូលិសនៅម៉ោង ៩ ព្រឹក ថ្ងៃអាទិត្យ ៩ កុម្ភៈ។ ក្នុងហេតុការណ៍នេះ មនុស្ស ៥៧ នាក់ផ្សេងទៀត បានរងរបួស និងស្លាប់ ២៩នាក់។ នេះបើតាមការចុះផ្សាយរបស់កាសែតបាងកកប៉ុស្តិ៍ ។
អំឡុងពេលប្រតិបត្តិការហ៊ុមព័ទ្ធ អាជ្ញាធរថៃ បាននាំម្តាយរបស់ខ្មាន់កាំភ្លើងមកពីស្រុកកំណើតគាត់ក្នុងខេត្ត Chaiyaphum មកកាន់ទីតាំងក្បែរផ្សារទំនើបនោះ ក៏ប៉ុន្តែលោកស្រី ពុំអាចចូលទៅខាងក្នុងអគារនោះបានឡើយ ។ លោកឧត្តមសេនីយ៍ Jirapob Puridet ដែលដឹកនាំកម្លាំងសន្តិសុខបើកប្រតិបត្តិការក្នុងអគារនេះ អះអាងបែបនេះ នៅថ្ងៃទី៩ ខែកុម្ភៈ ដែលដកស្រង់យកទៅចុះផ្សាយដោយសារព័ត៌មាន CNN ។
ម្តាយរបស់បុរសជាខ្មាន់កាំភ្លើងរូបនេះ ដែលឈ្មោះលោកស្រីពុំត្រូវបានបង្ហាញ បានលើកឡើងថា វាសឹងតែគ្មានប្រយោជន៍អ្វីឡើយក្នុងការចរចាជាមួយកូនប្រុសលោកស្រីនោះ ព្រោះថារូបគេមានបញ្ហាផ្លូវចិត្ត និងជាមនុស្សឆាប់ខឹងខ្លាំងណាស់ ។
សូមបញ្ជាក់ថា លោកនាយករដ្ឋមន្ត្រីថៃ ប្រាយុទ្ធចន្ទ អូចា កាលពីថ្ងៃអាទិត្យ ទី៩ កុម្ភៈ បានអះអាងថា ដើមចមនៃការបាញ់ប្រហារដ៏ផ្សៃព្រៃនេះ គឺផ្តើមមកពីបញ្ហាផ្ទាល់ខ្លួន។ លោកអះអាងទៀតថា បញ្ហាផ្ទាល់ខ្លួនរបស់បុគ្គលជាខ្មាន់កាំភ្លើងនោះគឺ ពាក់ព័ន្ធនឹងការលក់ផ្ទះមួយកន្លែង។ ប៉ុន្តែរឿងរ៉ាវលម្អិតបែបណានោះមិនត្រូវបានលោក លាតត្រដាងបន្ថែមឲ្យច្បាស់លាស់ឡើយ៕
Tag:
ថៃ
នគររាជសីម៉ា
យោធា
Jakrapanth Thomma
© រក្សាសិទ្ធិដោយ thmeythmey.com