COVID-19
អន្តរជាតិ
COVID-19៖ កូរ៉េខាងត្បូង កើនដល់២៣៣៧ករណី ក្រោយតេស្តឃើញ៣១៥នាក់ទៀត ប្រភពរូប៖ AFP
× គិតត្រឹមរសៀលថ្ងៃទី២៨ ខែកុម្ភៈ អាជ្ញាធរសុខាភិបាលកូរ៉េខាងត្បូង បានប្រកាសរកឃើញអ្នកជំងឺផ្លូវដង្ហើមកូរ៉ូណា (COVID-19) ចំនួន៣១៥នាក់ថ្មី ដែលធ្វើឲ្យករណីឆ្លងសរុបឡើងដល់ ២៣៣៧ករណីហើយ។ នេះបើតាមមជ្ឈមណ្ឌលគ្រប់គ្រងនិងបង្ការជំងឺបស់កូរ៉េខាងត្បូង។ បើបូកទាំងតួលេខរកឃើញកាលពីព្រឹកថ្ងៃសុក្រនេះ ដែលមាន២៥៦នាក់ ករណីឆ្លងពេញមួយថ្ងៃនេះ មានដល់៥៧១ករណី។
ក្នុងចំណោមអ្នកឆ្លងទាំងនេះ ជាង៩០ភាគរយនៃករណីឆ្លង ស្ថិតក្នុងទីក្រុង Daegu ដែលជាចំណុចផ្ដើមនៃការផ្ទុះរាលដាលជំងឺ COVID-19 ក្នុងប្រទេសកូរ៉េខាងត្បូង ហើយនិងខេត្តក្បែរក្រុងនេះ គឺខេត្ត North Gyeongsang ។ បើមជ្ឈមណ្ឌលគ្រប់គ្រងនិងបង្ការជំងឺបស់កូរ៉េខាងត្បូង (KCDC) បញ្ជាក់ក្នុងសេចក្តីថ្លែងការណ៍បែបនេះ ខណៈអ្នកស្លាប់នៅតែ១៣នាក់ដដែល។
តាមការចុះផ្សាយរបស់ទីភ្នាក់ងារព័ត៌មាន Yonhap អភិបាលក្រុង Daegu លោក Kwon Young-jin គូសបញ្ជាក់ថា អ្នកឆ្លង COVID-19 សរុបរបស់ទីក្រុងនេះ អាចឈានដល់ ៣០០០នាក់ ក្នុងពេលប៉ុន្មានថ្ងៃខាងមុខ ខណៈលទ្ធផលធ្វើតេស្តបន្ថែមលើសមាជិកវិហារសាសនាគ្រឹស្ត Shincheonji ចេញជាបន្តបន្ទាប់។ អាជ្ញាធរសុខាភិបាលកូរ៉េខាងត្បូង បានចាប់ផ្ដើមត្រួតពិនិត្យលើសុខាភាពសមាជិក ២១០ ០០០ នាក់របស់វិហារសាសនាគ្រឹស្តនេះ។
វិហារសាសនានេះ ក្លាយជាចំណុចផ្ដើមនៃការផ្ទុះរីករាលដាលជំងឺ COVID-19 ក្រោយពីស្ត្រីកូរ៉េខាងត្បូងវ័យ ៦១ឆ្នាំម្នាក់ បានចេញរោគសញ្ញាក្តៅខ្លួន កាលពីថ្ងៃ១០ ខែកុម្ភៈ។ ក៏ប៉ុន្តែលោកស្រីបានទៅកាន់វិហារនេះយ៉ាងតិច ៤ ដង ក្នុងទីក្រុង Daegu ដែលជាទីក្រុងធំបំផុតលំដាប់ទី៤ ជាមួយប្រជាជន ២,៥លាននាក់ មុនពេលដឹងថាកើតជំងឺ៕
© រក្សាសិទ្ធិដោយ thmeythmey.com