​មន្ត្រីជាន់ខ្ពស់​របស់​អ៊ីរ៉ង់​អាយុ ៧២ ឆ្នាំ​រូបនេះ បាន​ស្លាប់ នៅ​ព្រឹក​ថ្ងៃ​ចន្ទ​នេះ នៅ​មន្ទីរពេទ្យ​មួយ​ឈ្មោះថា Masih Daneshvari ក្នុង​ទីក្រុង​តេ​ហេ​រ៉ង់ ។ មន្ទីរពេទ្យ​នេះ បានទទួល​ព្យាបាល​អ្នកជំងឺ COVID-19 ជាច្រើន​ឲ្យ​សម្រាក​នៅទីនេះ​។ 

 

​លោក Mirmohammadi ត្រូវបានតែងតាំង​ដោយផ្ទាល់​ពី​មេដឹកនាំ​កំពូល Ayatollah Seyyed Ali Khamenei កាលពី​សីហា ឆ្នាំ​២០១៧ ជា​សមាជិក​មួយរូប​នៃ​ក្រុមប្រឹក្សា​ផ្ដល់យោបល់ (Expediency Discernment Council) ។ តួនាទី​របស់​ក្រុមប្រឹក្សា​នេះ គឺ​ដោះស្រាយ​រាល់​ជម្លោះ​នានា ដែល​កើតឡើង​រវាង​សភាតំណាងរាស្ត្រ និង​ក្រុមប្រឹក្សា​អាណាព្យាបាល​របស់​អ៊ីរ៉ង់​។​

 

​មុន​កាន់តំណែង​នេះ លោក​ក៏​ធ្លាប់ជា​សមាជិកសភា​រប​ស់​អ៊ីរ៉ង់​ចំនួន​ពីរ​អាណត្តិ​ផងដែរ​។ ម្យ៉ាងវិញទៀត លោក​ក៏​ជា​ក្មួយប្រុស​របស់​មេដឹកនាំ​សាសនា​ឥស្លាម​ម្នាក់ ដែល​បាន​ស្លាប់​ព្រោះ​ជំងឺ COVID-19 កាលពីពេល​ថ្មីៗ​នេះ​។ មុន​ករណី​ស្លាប់​របស់លោក Mirmohammadi អតីត​អគ្គរដ្ឋទូត​របស់​អ៊ីរ៉ង់​ប្រចាំ​បុរី​វ៉ា​ទី​កង់ លោក Hadi Khosroshahi ក៏បាន​ស្លាប់​ដោយសារ COVID-19 ផងដែរ​។​

 

​សូមបញ្ជាក់ថា គិត​ត្រឹម​រសៀល​ថ្ងៃ​ចន្ទ ទី​០២ មីនា នេះ អ៊ីរ៉ង់ មាន​ករណី​ឆ្លង COVID-19 សរុប ៩៧៨ ករណី​ហើយ ខណៈ​អ្នកស្លាប់​ឡើងដល់ ៥៥​នាក់​។ ក្នុងនោះ​អ្នកជា​សះស្បើយ​មាន​១៧៥​នាក់​។ 

 

​កាលពី​ថ្ងៃទី ២៧ ខែកុម្ភៈ​សប្តាហ៍​មុន លោកស្រី Masoumeh Ebtekar អនុ​ប្រធានាធិបតី​អ៊ីរ៉ង់ ទទួលបន្ទុក​កិច្ចការនារី និង​គ្រួសារ មាន​លទ្ធផល​តេស្ត​វិជ្ជមាន​កូ​រ៉ូ​ណាវី​រុស​។ អនុរដ្ឋមន្ត្រី​សុខាភិបាល​អ៊ីរ៉ង់ ក៏បាន​អះអាងថា ខ្លួន​បាន​ឆ្លង COVID-19 ផងដែរ​៕