ជាតិ
ចិន អាមេរិក អាល្លឺម៉ង់ និងជប៉ុន បានផ្តល់ជំនួយជួយកម្ពុជាប្រឆាំង COVID-19
× ភ្នំពេញ៖ ក្នុងពេលដែលចំនួនអ្នកឆ្លងមេរោគកូវីដ១៩នៅកម្ពុជាបន្តកើនឡើងជាលំដាប់ ប្រទេសជាមិត្តរបស់កម្ពុជាដែលខ្លួនឯងកំពុងប្រឈមនឹងមេរោគកូវីដ១៩ដូចគ្នាដែរនោះ ក៏ឆ្លៀតផ្តល់ជំនួយជួយដល់កម្ពុជាដើម្បីប្រយុទ្ធប្រឆាំងនឹងកូវីដ១៩ផងដែរ។ «មិត្តល្អជួយគ្នាក្នុងគ្រាលំបាក»។ គិតត្រឹមថ្ងៃទី២៥ខែមីនាឆ្នាំ២០២០នេះ ប្រទេសចិន អាមេរិក អាល្លឺម៉ង់ និងជប៉ុន បានផ្តល់ជំនួយជួយដល់ប្រទេសកម្ពុជាដើម្បីប្រយុទ្ធប្រឆាំងនឹងមេរោគកូវីដ១៩។
មិនបង្អង់ពេលយូរឡើយ ប្រទេសដៃគូរបស់កម្ពុជាចាប់ផ្តើមផ្តល់ជំនួយជាបន្តបន្ទាប់ដើម្បីប្រយុទ្ធប្រឆាំងនឹងការរីករាលដាលមេរោគកូវីដ១៩។ ប្រទេសអាល្លឺម៉ង់បានផ្តល់ថវិកាចំនួន១លាន៦សែនដុល្លារដល់វិទ្យាស្ថានជាតិប៉ាស្ទើរាជធានីភ្នំពេញកម្ពុជាដើម្បីប្រតិបត្តិការប្រឆាំងមេរោគកូវីដ១៩។
ដូចគ្នាដែរ សាធារណៈរដ្ឋប្រជាមានិតចិនដែលជាមហាមិត្តរបស់កម្ពុជា បានបញ្ជូនវេជ្ជបណ្ឌិតចំនួន៧នាក់ និងសម្ភារវេជ្ជសាស្ត្រមួយចំនួនមកដល់ប្រទេសកម្ពុជាដើម្បីទប់ស្កាត់មេរោគកូវីដ១៩កាលពីប៉ុន្មានថ្ងៃមុននេះ។
មិនខុសគ្នាប៉ុន្មានថ្ងៃផង សហរដ្ឋអាមេរិកតាមរយៈទីភ្នាក់ងារអភិវឌ្ឍ USAID ក៏បានប្រកាសផ្តល់ជំនួយប្រមាណជា២លានដុល្លារអមេរិកដល់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងមេរោគកូវីដ១៩ផងដែរ។
ប្រទេសជប៉ុនក៏មិនឈរអោបដៃនៅស្ងៀមឡើយ។ ភ្លាមៗបន្ទាប់ពីមេរោគកូវីដ១៩ឈ្លានពានកម្ពុជា, ជប៉ុនបានប្រកាសជំហរជួយកម្ពុជាជាសម្ភារវេជ្ជសាស្ត្រដើម្បីគ្រប់គ្រង និងប្រយុទ្ធប្រឆាំងនឹងមេរោគកូវីដ១៩នៅកម្ពុជា៕
© រក្សាសិទ្ធិដោយ thmeythmey.com