ភ្នំពេញ៖ ដោយមិននិយាយពីសាលារដ្ឋ, អាណាព្យាបាល និងម្ចាស់សាលាឯកជនជាច្រើន បាននិងកំពុងដំឡើងសរសៃក ដាក់គ្នាទៅវិញទៅមក ក្នុងបរិបទវិបត្តិមេរោគកូវីដ១៩។ ដោយលើកហេតុផលរឿងបិទសាលា និងការសិក្សាពីចម្ងាយ, អាណាព្យាលមួយចំនួនធំទាមទារឲ្យម្ចាស់សាលាបញ្ចុះថ្លៃរហូតដល់៥០ភាគរយ។ តែម្ចាស់សាលាតបវិញថា ប្រាក់ចំណេញក្នុងជំនួញក្នុងវិស័យអប់រំមិនច្រើនទេ? តើអ្វីទៅជាដំណោះស្រាយ?
កូវីដ១៩មិនមែនសម្លាប់ជីវិតមនុស្ស និងអាជីវកម្មប៉ុណ្ណោះទេ តែមេរោគនេះ បាននិងកំពុងបង្កឲ្យមានជម្លោះរវាងមនុស្ស និងមនុស្សទៀតថែមទៀតផង។ នៅក្នុងប្រទេសកម្ពុជា អ្នកជំនួញ និងអតិថិជនក្នុងវិស័យអប់រំកំពុងតែដំឡើងសរសៃកដាក់គ្នាទៅវិញទៅមកជុំវិញថ្លៃឈ្មួលសិក្សាក្នុងបរិបទកូវីដ១៩នេះ។ ដោយសារសាលារៀនបានបិទទ្វារដោយជំនួសមកវិញនូវការសិក្សាតាមអនឡាញ ឬសិក្សាពីចម្ងាយ អាណាព្យាបាលស្នើសុំបង់ប្រាក់តែ៥០%នៃថ្លៃសរុប ប៉ុន្តែសំណើរនេះ ត្រូវបានបដិសេធដោយម្ចាស់សាលា។
តើអ្វីជាហេតុផលរបស់អាណាព្យាបាល?
គុណវិបត្តិនៃការសិក្សាពីចម្ងាយមានច្រើនក្នុងនោះមាន ដូចជា៖ សិស្សនិស្សិត មិនសូវយកចិត្តទុកដាក់ស្តាប់គ្រូប៉ុន្មានឡើយ ជាពិសេស កុមារតូចៗ។ សិស្សនិស្សិតខ្លះ បើកតែកុំព្យូទ័រចោល រីឯអាម្មណ៍ មិនដឹងជាហោះហើរទៅដល់ទីណាឡើយ។ សិស្សនិស្សិតខ្លះទៀត បើកកុំព្យូទ័របណ្តើរ រៀនបណ្តើរ ស្តាប់ចំរៀងបណ្តើរ ពិសានេះ ឬនោះបណ្តើរ ជួនកាលស្តាប់គ្រូផង ឈែតជាមួយមិត្តភក្តិផង។
និយាយជារួម ប្រសិទ្ធភាពនៃការសិក្សាពីចម្ងាយ មានកម្រិតទាប ជាពិសេស សម្រាប់កុមារតូចៗ។ ម្យ៉ាងទៀត អាណាព្យាបាលលើកហេតុថា សាលាមិនចំណាយផ្នែករដ្ឋបាល ចំណាយលើទឹក ភ្លើង។ល។ ម្យ៉ាងទៀត អាណាព្យាបាលបានលើកហេតុផលថា ពួកគេក៏កំពុងប្រឈមនឹងការធ្លាក់ចុះនៃប្រាក់ចំណូលដែរ ព្រោះ ជំនួញពួកគេមិនដំណើរការ។ ដូច្នេះ សាលាត្រូវតែបញ្ចុះតម្លៃយ៉ាងតិច៥០%។
ហេតុផល និងការទាមទាររបស់អាណាព្យាបាលមិនខុសទេ។ តែអ្នកជំនួញក្នុងវិស័យអប់រំបានពន្យល់តបវិញថា ជំនួញក្នុងវិស័យអប់រំនេះ មិនចំណេញច្រើនទេ។ អ្នកជំនួញក្នុងវិស័យអប់រំបានពន្យល់ថា ជាទូទៅក្នុងពេលធម្មតា សាលាត្រូវចំណាយលើប្រាក់បៀវត្សរ៍ អគារ ទឹក ភ្លើង រដ្ឋបាល ថ្លៃបណ្តុះបណ្តាលគ្រូ ការស្រាវជ្រាវ ទីផ្សារ ទំនាក់ទំនងសាធារណៈ ថ្លៃបង់រំលោះបំណុល។ល។ ដូច្នេះ ប្រាក់ចំណេញសល់ពីចំណូល គឺមានកម្រិតក្នុងរង្វង់តែ១០ទៅ២០%ប៉ុណ្ណោះ។ ហើយនេះ គេនៅមិនទាន់គិតពីការចំណាយផ្សេងៗទៀតផង។
ម្ចាស់សាលាឯកជន ឬអ្នកជំនួញក្នុងវិស័យអប់រំ បានបន្តពន្យល់ទៀតថា ការសិក្សាពីចម្ងាយធ្វើឲ្យសាលាបន្តចំណាយច្រើនគួរសម និងស្មុគស្មាញបន្ថែមទៀត ព្រោះ សាលាត្រូវបន្តធ្វើការរដ្ឋបាលសម្របសម្រួលជាមួយអាណាព្យាបាលច្រើនជាងមុន ជាពិសេស សិស្សតូចៗ។ ម្យ៉ាងទៀត សាលាត្រូវបណ្តុះបណ្តាលគ្រូមួយចំនួនដែលមិនសូវចេះបច្ចេកវិទ្យាព័ត៌មាន។ លើសពីនេះទៅទៀត សាលាខ្លះត្រូវវិនិយោគបន្ថែមលើប្រព័ន្ធសិក្សាពីចម្ងាយនេះ។
សរុបសេចក្តីមក ម្ចាស់សាលាឯកជន និងអាណាព្យាល ដែលរងគ្រោះដោយសារមេរោគកូវីដ១៩ដូចគ្នា មិនគួរបង្កជម្លោះនឹងគ្នាឡើយ។ ផ្ទុយទៅវិញ ពួកគេគួររកដំណោះស្រាយរួមគ្នា មានន័យថា សាលាគួរបញ្ចុះថ្លៃបន្តិច(២០%) អាណាព្យាបាលសុខចិត្តខាតបន្តិច (២០ ឬ៣០%) គ្រូបង្រៀនគួរធ្វើសម្បទាន២០ ឬ៣០% រីឯម្ចាស់អគារអាជីវកម្មគួរចុះថ្លៃខ្លះ។ ប្រសិនបើគ្រប់ភាគីពាក់ព័ន្ធសម្រេចធ្វើយ៉ាងនេះ ពេលនោះ គ្មានបញ្ហាកើតឡើងឡើយ។ ក្នុងគ្រាប្រឈមដ៏លំបាកនេះ គ្រប់ភាគីមិនគួរបង្កបញ្ហាឡើយ តែត្រូវជួយគ្នាទៅវិញទៅមកជាការប្រសើរជាង៕