COVID-19
ជាតិ
សង្គមជាតិ
រដ្ឋមន្ត្រីអប់រំ ស្នើឪពុកម្តាយទិញទូរទស្សន៍ កំព្យូទ័រ ឬទូរសព្ទ និង ភ្ជាប់អ៊ីនធឺណិត សម្រាប់ឲ្យកូនរៀន
សកម្មភាពកុមាររៀនតាមកម្មវិធីThink Think ដែលជួយបង្កើនការគិតផ្នែកគណិតវិទ្យា រូបភាពពីThinkThink Cambodia
×![]()
ភ្នំពេញ៖ លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា បានស្នើឲ្យឪពុកម្តាយនិងអាណាព្យាបាល បំពាក់ទូរទស្សន៍ កុំព្យូទ័រ ឬIpad និងភ្ជាប់សេវាអ៊ីនធឺណិតនៅតាមផ្ទះ សម្រាប់ឲ្យកូន សិក្សាតាមអនឡាញ ប្រកបដោយគុណភាពខ្ពស់។ 
តាមរយៈសេចក្តីណែនាំ នៅថ្ងៃទី២៤ ខែមេសា ឆ្នាំ២០២០ លោក ហង់ ជួន ណារ៉ុន បានស្នើឲ្យឪពុកម្តាយចំណាយពេលអង្គុយបង្រៀនកូនរាល់ម៉ោង ដែលគ្រូ បង្រៀននៅក្នុងកម្មវិធីសិក្សាពីចម្ងាយនានា ដើម្បីឲ្យសិស្សទទួលបានចំណេះដឹងពេញលេញ។
លោករដ្ឋមន្ត្រី ប្រាប់ទៅឪពុកម្តាយនិងអាណាព្យាបាលថា៖«កុំគិតថាខ្លួនមិនចេះ ឬចេះតិចជាងកូន មិនអាចជួយកូនបាន ប៉ុន្តែត្រូវគិតថានៅពេលដែលបាននៅក្បែរកូនពេល កំពុងរៀន គឺជាការលើកទឹកចិត្តដ៏ប្រពៃ»។
ជាមួយគ្នានេះ លោក បានបង្គាប់ឲ្យគណៈគ្រប់គ្រងសាលានីមួយៗ រៀបចំជាឯកសារមេរៀន និងបែងចែកកាលវិភាគបង្រៀនឲ្យបានទៀងទាត់ ណែនាំឲ្យអាណាព្យាបាលសិស្សទាំងអស់ចេះប្រើប្រាស់ប្រព័ន្ធអេឡិចត្រូនិក និងណែនាំឲ្យគ្រូនីមួយៗ ត្រូវមានទំនាក់ទំនងជាមួយអាណាព្យាបាលសិស្ស ដើម្បីឆ្លើយតបចម្ងល់សិស្ស និងការស្នើសុំរបស់អាណាព្យាបាល។
លើសពីនេះ មុនបើកសាលាឲ្យដំណើរការវិញ រដ្ឋមន្ត្រីអប់រំ ណែនាំឲ្យគ្រប់គណៈគ្រប់គ្រងសាលាបោសសម្អាតបរិវេណសាលា និងបន្ទប់រៀនឲ្យបានស្អាត។ លោក អះអាងថា ពេលបើកសាលាវិញ ក្រសួងនឹងពិចារណា ពីការបន្ថែមពេលវេលារៀន និងកាត់បន្ថយរយៈពេលវិស្សមកាលធំផងដែរ។
សូមរម្លឹកថា ក្រសួងអប់រំ បានបន្ថែមការផ្សាយមេរៀនតាមទូរទស្សន៍២ប៉ុស្តិ៍បន្ថែមទៀតគឺទូរទស្សន៍អប្សរា និងទូរទស្សន៍One TV ដែលឡើងដល់ការផ្សាយចំនួន៦០ប៉ុស្តិ៍ហើយ និងបន្តការផ្សាយមេរៀនតាមកម្មវីធីThink Think សម្រាប់កុមារតូចៗ និងផ្សាយតាមវិទ្យុសម្រាប់កុមារជនជាតិភាគតិចចាប់ពីថ្នាក់មេត្តយ្យដល់ថ្នាក់ទី៣ ពីលើកម្មវិធី E-Learning School, E-School Cambodia និងBEEP៕
អត្ថបទទាក់ទង
Tag:
COVID-19
រៀនអនឡាញ
© រក្សាសិទ្ធិដោយ thmeythmey.com
