COVID-19
អន្តរជាតិ
ចិនថា ប្រមុខការទូតអាមេរិក គ្មានព័ស្តុតាងច្បាស់លាស់ពីដើមកំណើត COVID-19 ឡើយ
អ្នកនាំពាក្យក្រសួងការបរទេសចិន លោកស្រី Hua Chunying។ រូបភាព៖ ក្រសួងការបរទេសចិន
×![]()
ដោយ: ធៀន ភារិន្ទ
ទីក្រុងប៉េកាំង នាថ្ងៃទី៦ ខែឧសភា បានវាយបកទៅនឹងការលើកឡើងរបស់ប្រមុខការទូតអាមេរិក លោក ម៉ៃ ប៉ុមប៉េអូ ដោយថា គ្មានព័ស្តុតាងច្បាស់លាស់ ជុំវិញការលេចចេញនៃកូរ៉ូណាវីរុស ដែលបង្កទៅជាជំងឺរលាកសួត (COVID-19) ពីមន្ទីរពិសោធន៍មួយកន្លែង ក្នុងទីក្រុងវូហាន ប្រទេសចិន។ ការឆ្លើយតបរបស់ចិននៅពេលនេះ ធ្វើឡើងបន្ទាប់ពីអាមេរិក បានអះអាងថា ខ្លួនមានព័ស្តុតាងដ៏ច្រើន លើកូរ៉ូណាវីរុស លេចចេញពីមន្ទីរពិសោធន៍។ 
អត្ថបទទាក់ទង
ទំនាក់ទំនងរវាងអាមេរិក និងចិន កាន់តែមានភាពអួរអាប់យ៉ាងខ្លាំង បន្ទាប់ពីប្រធានាធិបតីអាមេរិក ដូណាល់ ត្រាំ បានចោទចិនថា បានធ្វើឲ្យបែកធ្លាយ COVID-19 ចេញពីមន្ទីរពិសោធន៍វីរុស នៅក្នុងទីក្រុងវូហាន និងគ្រប់គ្រងជំងឺឆ្លងមិនបានល្អ។ មិនត្រឹមតែប្រធានាធិបតីទេ ប្រមុខការទូតអាមេរិក លោក ម៉ៃ ប៉ុមប៉េអូ ក៏បានចេញមុខមកវាយប្រហារចិនដែរ ដោយលើកឡើងថា អាមេរិក មានព័ស្តុតាងជាច្រើន ដែលបង្ហាញថាកូរ៉ូណាវីរុស គឺមានដើមកំណើតចេញពីមន្ទីរពិសោធន៍។
ជាការឆ្លើយតបទៅនឹងការលើកឡើង របស់ប្រមុខការទូតអាមេរិក លោកស្រី Hua Chunying អ្នកនាំពាក្យក្រសួងការបរទេសចិន នៅសន្និសីទកាសែត នាថ្ងៃទី៦ ខែឧសភា បានលើកឡើងថា ប្រសិនបើមានមែន ព័ស្តុតាងមែន អាមេរិកគួរតែប្រគល់វា ឲ្យអ្នកវិទ្យាសាស្ត្រ និងសាស្ត្រាចារ្យវេជ្ជសាស្ត្រ ជាអ្នកបកស្រាយ ហើយវាមិនមែនជាតួនាទីរបស់អ្នកនយោបាយ ដែលចូលចិត្តកុហក ដើម្បីផលប្រយោជន៍នយោបាយរបស់ខ្លួនឡើយ។
បើតាមការបញ្ជាក់របស់លោកស្រី Hua ប្រមុខការទូតអាមេរិក តែងនិយាយម្តងហើយម្តងទៀតថា កូរ៉ូណាវីរុស គឺលេចចេញពីមន្ទីរពិសោធន៍ ហើយមានព័ស្តុតាងជាច្រើន ប៉ុន្តែលោកបែរជាមិនអាចបកស្រាយ ព័ស្តុតាងទាំងនោះបាន។ «តើលោក ប៉ុមប៉េអូ ធ្វើបានយ៉ាងដូចម្តេច»។ នេះជាសំណួរ របស់លោកស្រីអ្នកនាំពាក្យក្រសួងការបរទេសចិន ចោទសួរត្រលប់ទៅភាគីអាមេរិកវិញ នៅចំនួនមុខអ្នកសារព័ត៌មានជាច្រើននាក់។
មិនត្រឹមតែវាយបកទៅវិញទេ អ្នកនាំពាក្យវ័យរូបនេះ ក៏បានទាមទារឲ្យប្រមុខការទូត របស់ទីក្រុងវ៉ាស៊ីនតោន ដកពាក្យ «ព័ស្តុតាង» របស់ខ្លួនទៅវិញដែរ ដោយសារអាមេរិកគ្មានហេតុផលត្រឹមត្រូវ។ លោកស្រី Hua ថែមទាំងបានទាមទារឲ្យ ប៉ុមប៉េអូ ពន្យល់ពីរឿង ថាតើកូរ៉ូណាវីរុស អាចបែកធ្លាយចេញពីមន្ទីរពិសោធន៍ និងកំហុសក្នុងគ្រប់គ្រង COVID-19 ផងដែរ ។
កន្លងមក អង្គការសុខភាពពិភពលោក ក៏ដូចជានាយកវិទ្យាស្ថានជាតិ នៃជំងឺរមាស់ និងជំងឺឆ្លង លោក Anthony Fauci បានលើកឡើងថា គ្មានព័ស្តុតាងណាមួយ ដែលបង្ហាញថា កូរ៉ូណាវីរុស ត្រូវបានគេបង្កើតនៅក្នុងមន្ទីរពិសោធន៍ឡើយ ប៉ុន្តែវាទំនងកើតចេញពីសត្វច្រើនជាង។
បើតាមវេបសាយរបស់ Worldometer គិតមកត្រឹមពេលនេះ អាមេរិក បានកើនឡើងករណីCOVID-19 សរុបចំនួន ១,២៦លាននាក់ អ្នកស្លាប់មានចំនួនជាង ៧ម៉ឺននាក់ និងអ្នកជាសះស្បើយមានចំនួន ២១ម៉ឺននាក់។ ចំណែកចិនវិញ មានករណីឆ្លងសរុបចំនួនជាង ៨ម៉ឺនករណី មានអ្នកស្លាប់ ៤៦៣៣នាក់ និងអ្នកជាសះស្បើយមានចំនួន ៧៧៩៥៧នាក់។ អ្នកជំងឺរបស់ចិន នៅសល់តែ ២៩៥នាក់ប៉ុណ្ណោះ៕
Tag:
ចិន
អាមេរិក
COVID-19
© រក្សាសិទ្ធិដោយ thmeythmey.com
