ជាតិ
សង្គមជាតិ
សម្ដេច ស ខេង៖ បើចរាចរណ៍រញ៉េរញ៉ៃ គេអាចគិតថាប្រទេសយើងគ្មានសណ្ដាប់ធ្នាប់ សម្តេច ស ខេង ដែលចូលរួមក្នុងពិធីផ្ទេរតំណែងអភិបាលខេត្តកែប កាលពីថ្ងៃទី២៩ ខែឧសភា ឆ្នាំ២០២០។ (រូបភាព ពីគេហទំព័រក្រសួងមហាផ្ទៃ)
× ភ្នំពេញ៖ ការបើកបរមិនគោរពច្បាប់ មិនត្រឹមតែបណ្តាលឲ្យកើតមានគ្រោះថ្នាក់ចរាចរណ៍ដែលនាំឲ្យបាត់បង់ជីវិត របួស ឬខូចខាតទ្រព្យសម្បត្តិនោះទេ ប៉ុន្តែឥរិយាបថនេះ ក៏បង្ហាញពីសណ្តាប់ធ្នាប់របស់ប្រទេសដែរ។ នៅក្នុងពិធីប្រកាសតែងតាំងអភិបាលថ្មីខេត្តកែប កាលពីថ្ងៃទី២៩ឧសភា សម្ដេច ស ខេង រដ្ឋមន្ត្រីក្រសួងមហាផ្ទៃ បានលើកឡើងថា បើពលរដ្ឋបើកបររញ៉េរញ៉ៃ គេអាចសន្និដ្ឋានថាប្រទេសគ្មានសណ្តាប់។ សម្តេច ស ខេង ថ្លែងដូច្នេះ«បើភ្ញៀវបរទេសមកប្រទេសយើង រញេររញ៉ៃ ធ្វើដំណើរចុះឡើង វាបញ្ជាក់ឲ្យឃើញថាស្រុកហ្នឹងវាមិនកើត អត់សណ្ដាប់ធ្នាប់ អត់របៀបរៀបរយ។ នេះជាបញ្ហា»។
ដើម្បីកាត់បន្ថយគ្រោះថ្នាក់ចរាចរណ៍ ដែលបណ្តាលឲ្យពលរដ្ឋកម្ពុជា រាប់ពាន់នាក់បាត់បង់ជីវិត របួស និងខាតបង់សេដ្ឋកិច្ចរាប់លានដុល្លារនៅក្នុងមួយឆ្នាំៗ រដ្ឋាភិបាលបានចាប់ផ្តើម រឹតបន្តឹងការអនុវត្តច្បាប់ចរាចរណ៍ជាថ្មី ចាប់តាំងពីដើមខែឧសភាមក។ ហើយកាលពីថ្ងៃទី២៩ ខែឧសភា នៅក្នុងពិធីប្រកាសតែងតាំងអភិបាលថ្មីខេត្តកែប សម្តេច ស ខេង រដ្ឋមន្ត្រីក្រសួងមហាផ្ទៃ បានអះអាងថា រដ្ឋាភិបាល នឹងមិនដកថយ ចំពោះការរឹតបន្តឹងនេះឡើយ។
ទោះជាយ៉ាងនេះ នៅក្នុងដំណាក់កាលដំបូងនេះ សម្តេច ស ខេង ក៏បានរំឭកជាថ្មីថាទៅនគរបាលថាមិនត្រូវដាក់ប៉ារាស់ ដើម្បីឆែករកមើលឯកសារនោះឡើយ។ ការឃាត់ និងសួររកឯកសារ គឺធ្វើឡើងសម្រាប់តែពលរដ្ឋដែលបើកបរល្មើសច្បាប់ប៉ុណ្ណោះ។ នេះបើតាមរដ្ឋមន្ត្រក្រសួងមហាផ្ទៃ ដែលបានបន្តទៀត មន្ត្រីនគរបាល ត្រូវម៉ឹងមាត់ ប៉ុន្តែក៏ត្រូវរក្សាឥរិយាបថទន់ភ្លន់ រាបសារជាមួយប្រជាពលរដ្ឋ ក្នុងពេលអនុវត្តការងារផងដែរ។
រដ្ឋមន្ត្រីក្រសួងមហាផ្ទៃ បានឲ្យដឹងថា គិតត្រឹមរយៈពេល២៩ថ្ងៃ នៃខែឧសភា ធៀបនឹងរយៈពេលដូចគ្នានៃខែមេសា ជនរងគ្រោះដែលបណ្តាលមកពីគ្រោះថ្នាក់ចរាចរណ៍បានថយចុះ ក្នុងនោះ អ្នកស្លាប់ថយចុះ១៥នាក់ ខណៈអ្នករបួស ជាង៨០នាក់។ ការថយចុះនេះ ត្រូវបានសម្តេច ស ខេង ចាត់ទុកថា គឺជាជោគជ័យមួយ ហើយដែលបានជំរុញឲ្យរដ្ឋាភិបាលនៅតែបន្តឥតដកថយនោះឡើយ ចំពោះការរឹតបន្តឹងការអនុវត្តច្បាប់ចរាចរណ៍នេះ។
ជាមួយគ្នានេះដែរ រយៈពេល៣០ថ្ងៃនៃការរឹតបន្តឹងច្បាប់ចរាចរណ៍ នគរបាលចរាចរណ៍បានត្រួតពិនិត្យ និងពិន័យយានយន្តល្មើសចំនួន ៤៣ ៥៣០គ្រឿង ក្នុងនោះមានរថយន្តចំនួន ១១ ៧៧៥គ្រឿង និងម៉ូតូ ៣១ ៧៥៥គ្រឿង។ នេះបើតាមលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ប្រាប់សារព័ត៌មានថ្មីៗតាមទូរស័ព្ទរនៅថ្ងៃទី៣១ ឧសភា ឆ្នាំ២០២០៕
Tag:
ចរាចរណ៍
កែប
ច្បាប់
© រក្សាសិទ្ធិដោយ thmeythmey.com