អន្តរជាតិ
កូរ៉េខាងជើង បំផ្ទុះការិយាល័យទំនាក់ទំនងអន្តរកូរ៉េដែលបង្កើតនៅឆ្នាំ២០១៨
ប្រភពរូបទូរទស្សន៍ NHK
×![]()
កូរ៉េខាងជើង បានបំផ្ទុះការិយាល័យទំនាក់ទំនងអន្តរកូរ៉េ ដែលមានទីតាំងក្នុងទឹកដីខ្លួន គឺក្នុងទីក្រុង Kaesong ។ នេះបើតាមការបញ្ជាក់របស់ក្រសួងបង្រួបបង្រួមកូរ៉េនៅថ្ងៃទី១៦ ខែមិថុនា ដែលផ្សាយដោយទីភ្នាក់ងារព័ត៌មាន Yonhap ។ 
«កូរ៉េខាងជើង បានបំផ្ទុះការិយាល័យទំនាក់ទំនងនៅម៉ោងជាងពីររសៀល (ម៉ោងនៅកូរ៉េ)។» ក្រសួងបង្រួបបង្រួមកូរ៉េសរសេរបែបនេះក្នុងសារទៅកាន់ប្រព័ន្ធផ្សព្វផ្សាយ។
មុនការប្រកាសនេះ គេឃើញមានខ្មៅហុយឡើង និងឮសំឡេងផ្ទុះក្នុងទីក្រុង Kaesong នៅថ្ងៃអង្គារនេះ ដែលបង្កទៅការសង្ស័យថា ប្រជាជាតិកម្មុយនីស្តមួយនេះ អាចបំផ្ទុះការិយាល័យទំនាក់ទំនងអន្តរកូរ៉េនៅទីនោះ។
មែនទែនទៅ រដ្ឋាភិបាលក្រុងព្យុងយ៉ាង បានព្រមានប្រឆាំងកូរ៉េខាងត្បូងជាច្រើនលើកមកហើយ ក្នុងពេលប៉ុន្មានថ្ងៃចុងក្រោយនេះ ហើយក៏បានគំរាមកម្ទេចការិយាល័យដែលបានបង្កើតឡើងក្នុងឆ្នាំ២០១៨នេះផងដែរ។
ជាក់ស្តែង កាលពីថ្ងៃទី១៣ មិថុនា លោកស្រី គីម យ៉ូចុង ប្អូនស្រីបង្កើតមេដឹកនាំកូរ៉េខាងជើង គីម ជុងអ៊ុន បានផ្ញើសារគំរាមកូរ៉េខាងត្បូង ដោយអះអាងថា កងទ័ពកូរ៉េខាងជើង នឹងកំណត់ពីជំហានបន្ទាប់ប្រឆាំងកូរ៉េខាងត្បូងដែលបំពានមេដឹកនាំកំពូលរបស់ខ្លួន។
ប្អូនស្រីមេដឹកនាំកូរ៉េខាងជើងរូបនេះ មិនបានបញ្ជាក់អ្វីឲ្យច្បាស់ពីជំហានបន្ទាប់របស់ទីក្រុងព្យុងយ៉ាងប្រឆាំងសេអ៊ូលឡើយ។ ប៉ុន្តែគេជឿថា ការិយាល័យកិច្ចការអន្តរកូរ៉េនៅឯ Kaesong ទំនងជាគោលដៅរបស់កូរ៉េខាងជើង។ ការិយាល័យនេះ ជាកន្លែងទំនាក់ទំនងរវាងកូរ៉េទាំងពីរ ដែលត្រូវបានបង្កើតក្រោមកិច្ចព្រមព្រៀងរវាងលោក គីម និងប្រធានាធិបតី មូន ចេអ៊ីន អំឡុងពេលដែលទំនាក់ទំនងបងប្អូនកូរ៉េកក់ក្ដៅខ្លាំងចាប់ពីឆ្នាំ២០១៨ មក។
សេចក្ដីថ្លែងការណ៍របស់លោកស្រី គីម គឺជាសារព្រមានមួយទៀតរបស់កូរ៉េខាងជើងចំពោះកូរ៉េខាងត្បូងដែលចាប់ផ្ដើមតាំងពីសប្ដាហ៍មុន។ មួយថ្ងៃមុនលោកស្រី គីម មន្ត្រីកូរ៉េខាងជើងម្នាក់ក៏បានចេញសារព្រមានទីក្រុងសេអ៊ូល និងថា ព្យុងយ៉ាងអស់ការទុកចិត្តលើសេអ៊ូល ព្រោះអាជ្ញាធរកូរ៉េខាងត្បូងបណ្ដែតបណ្ដោយឲ្យជនភៀសខ្លួនកូរ៉េខាងជើងបង្ហោះខិត្តបណ្ណដែលមានន័យប្រមាថមេដឹកនាំកំពូលកូរ៉េខាងជើង៕
Tag:
កូរ៉េខាងជើង
កូរ៉េខាងត្បូង
ការិយាល័យទំនាក់ទំនង
© រក្សាសិទ្ធិដោយ thmeythmey.com
