សង្គមអន្តរជាតិ
អន្តរជាតិ
លោក មូន ចេអ៊ីន ទទួលយកការលាលែងតំណែងរបស់រដ្ឋមន្ត្រីបង្រួបបង្រួម រដ្ឋមន្រ្តីបង្រួបបង្រួមកូរ៉េខាងត្បូង លោក Kim Yeon-chul។ រូបភាព៖ Yonhap។
× ប្រធានាធិបតីកូរ៉េខាងត្បូង លោក មូន ចេអ៊ីន នៅថ្ងៃទី១៩ ខែមិថុនា បានទទួលការលាលែងតំណែងរបស់រដ្ឋមន្ត្រីបង្រួបបង្រួមកូរ៉េខាងត្បូងហើយ។ ការលាលែងរបស់រដ្ឋមន្ត្រីបង្រួបបង្រួមរូបនេះ ធ្វើឡើងដោយផ្អែកលើភាពបរាជ័យក្នុងការចាត់ចែងទំនាក់ទំនងអន្តរកូរ៉េឲ្យមានស្ថិរភាព និងបន្ទាប់ពីទំនាក់ទំនងកូរ៉េខាងត្បូង និងកូរ៉េខាងជើងចុះទាបដល់កម្រិត។
ក្នុងសន្និសីទសារព័ត៌មាននាថ្ងៃទី១៧ ខែមិថុនា លោក Kim Yeon-chul បានសុំចុះចេញពីតំណែងរដ្ឋមន្ត្រីបង្រួបបង្រួមរបស់កូរ៉េខាងត្បូង ដើម្បីទទួលខុសត្រូវចំពោះភាពបរាជ័យក្នុងការគ្រប់គ្រងទំនាក់ទំនងបងប្អូនកូរ៉េខាងទាំងពីរឲ្យមានស្ថិរភាព។ ក្រសួងនេះ ជាស្ថាប័នធ្វើការលើកទំនាក់ទំនងទាំងអស់ជាមួយកូរ៉េខាងជើង។
ពីរថ្ងៃបន្ទាប់ ប្រធានាធិបតីមូន ចេអ៊ីន បានទទួលការលាលែងរបស់រដ្ឋមន្ត្រីបង្រួបបង្រួមកូរ៉េ។ លោក Kim ត្រូវបានគេស្គាល់ថា គឺជាអ្នកជំនាញលើបញ្ហាកូរ៉េខាងជើង។ ទាក់ទិននឹងការលាលែងចេញពីតំណែងនេះ លោក Suh Ho អនុរដ្ឋមន្ត្រីបង្រួបបង្រួម ត្រូវគេរំពឹងថា នឹងធ្វើជារដ្ឋមន្ត្រីស្តីទីបណ្តោះអាសន្នសិន។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ការតែងតាំងមនុស្សជំនួសលោក Kim ជារដ្ឋមន្ត្រីបង្រួបបង្រួម កំពុងស្ថិតក្នុងភាពស្រពេចស្រពិល។ តាមការចុះផ្សាយរបស់ Yonhap អ្នកអង្កេតការកូរ៉េខាងត្បូងមួយចំនួនរំពឹងថា លោក មូន អាចស្នើឲ្យ លោក Im Jong-seok អតីតប្រធានខុទ្ទកាល័យនៃវិមានប្រធានាធិបតីឲ្យកាន់តំណែងមួយនេះ។ អ្នកខ្លះថា លោក Lee In-young ឬ លោក Sul Hoon ឬលោក Hong Ihk-pyo ដែលសុទ្ធសឹងជាសមាជិកសភាកូរ៉េខាងត្បូង អាចនឹងកាន់តំណែងរដ្ឋមន្ត្រីបង្រួបបង្រួម។
លោក Kim Yeon-chul គឺជារដ្ឋមន្ត្រីបង្រួបបង្រួមកូរ៉េខាងត្បូងទី២ នៅក្នុងអាណត្តិរបស់លោកមូន បន្ទាប់ពីលោក Cho Myoung-gyon។
សូមបញ្ជាក់ថា បញ្ហានៅឧបទ្វីបកូរ៉េនៅពេលនេះ កំពុងឡើងកម្តៅយ៉ាងខ្លាំង ដោយសារកូរ៉េខាងជើង បានបំផ្ទុះការិយាល័យទំនាក់ទំនងអន្តរកូរ៉េ និង ព្រមានពីការដាក់ពង្រាយកងទ័ពនៅតាមបណ្តោយព្រំដែនជាមួយកូរ៉េខាងត្បូងជាថ្មី។ តំបន់ព្រំដែនទាំងនោះមានតំបន់ឧស្សាហកម្មរួម Kaesong និងតំបន់ទេសចរណ៍ភ្នំ Kumgang៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com